1Datuwey kinalin APU DIOS an itugun Moses nadah holag Israel 2“Gagala mo ya ume kayud Kanaan an boblen indat kun dakayu ya datuwey popoppog na: 3hay poppog nah nangappit hi south ya mipalpu nah adi maboblayan an Sin nah poppog di Edom. Ya hay poppog nah nangappit hi timilan di algo ya mipalpu nah Naten Baybay. 4Numpalikkod nah south an mala-uwan di Scorpion Pass ta mumpaed Sin ingganad Kades Barnea, ya mumpaed Hasar Addar ingganad Asmon. 5Mipalpud Asmon ot mumpalikkod nah wa-el di Egypt ot mipoppog nah Baybay an Mediterranean. 6Hay poppog nah nangappit hi kalin-oban di algo ya nan pingngit di Baybay an Mediterranean. 7Hay poppog nah nangappit hi north ya mipalpu nah Baybay an Mediterranean ta mumpaeh nangappit hi timilan di algo nah Bilid an Hor 8ingganad Lebo Hamat ta mumpaed Sedad ya 9Sipron ingganad Hasar Enan. Danaey poppog nan boble yuh nangappit hi north. 10Hay poppog nah nangappit hi timilan di algo ya mipalpud Hasar Enan ta mumpaeh nangappit hi south ad Sepham 11ya mumpadayyud Riblah nah nangappit hi timilan di algod Ain. Mipalpu boh di ot mumpadayyu nah pingngit di Baybay an Galilee nah nangappit hi timilan di algo. 12Ya in-un-unud na nah Wangwang an Jordan inggana nah Naten Baybay. Danaen am-in di poppog nan boble yu.” 13Kanan bon Moses nadah holag Israel di “Hituwen bobley punggogodwaan yun ibunut yu. Hay mangikap-ong ketuwe ya nadan hiyam ta godwan di holag Israel. 14Hanada ken holag Reuben ya holag Gad ya godwan di holag Manasseh ya nidatan da mo tuwalih luta da ot ganodwaon da mipuun hi pamilya da. 15Hidiyen boblen nunggogodwaan da ya pingngit nan Wangwang an Jordan nah nangappit hi timilan di algo ya dommang di Jericho.”

16Indani ya kanan APU DIOS ke Moses di 17“Datuwe nadan tatagun mangodwa nah luta, hi Eleasar an padi ya hi Joshua an imbabalen Nun. 18Ya ayagan yuy hin-oh-a nadah holag Israel an bumaddang. 19Datuwey ngadan da: hi Kaleb an imbabalen Jephunneh hi holag Judah, 20hi Semuel an imbabalen Ammihud hi holag Simeon, 21hi Elidad an imbabalen Kislon hi holag Benjamin, 22hi Bukki an imbabalen Jogli hi holag Dan, 23hi Hanniel an imbabalen Ephod hi holag Manasseh an imbabalen Joseph, 24hi Kemuel an imbabalen Siptan hi holag Eplaim an imbabalen Joseph, 25hi Elisaphan an imbabalen Parnak hi holag Sebulun, 26hi Paltiel an imbabalen Assan hi holag Issakar, 27hi Ahihud an imbabalen Selomi hi holag Asher 28ya hi Pedahel an imbabalen Ammihud hi holag Naptali.” 29Datuwe nadan tatagun pinilin APU DIOS an maniboh kaganodwaan di Kanaan ta mikap-ong nadah holag Israel.