1Handih natikod hidiyen dogon nangastigun APU DIOS ke dida ya kananan da Moses ke Eleasar an imbabalen Aaron di 2“Bilangon yu bo nadan linalakin muntoon hi duwampulu weno nahawwal ta mainilay kaatnah ohan pamilyay mabalin an muntindalu.”

3Kediye ya nungkampu nadan holag Israel nah nundotal ad Moab nah pingngit nan Wangwang an Jordan ya dommang di Jericho. Inun-unud da Moses ke Eleasar hidiye ot iolden da nadah aap-apun holag Israel di aton dan mumbilang nadah linalaki. 4Kanan day “Bilangon yun am-in di linalakin holag Israel an muntoon hi duwampulu weno nahawwal mipuun hi kinalin APU DIOS an maat. Datuwe nadan holag Israel an timmayan ad Egypt.”

5Datuwey nahlag ke Reuben an panguluwan an imbabalen Jacob an Israel di ohan ngadana: nadan holag Hanok, nadan holag Pallu, 6nadan holag Hesron, ya nadan holag Karmi. 7Hay bilang am-in dadiyen linalakin holag Reuben ya 43,730. 8Hi Pallu di nahlagan Eliab 9an aman Nemuel, hi Dathan ya hi Abiram. Da Dathan ke Abiram handin nangipangpanguluh holag Israel an nakibaddang ke Korah an nungngohe da Moses, hi Aaron ya hi APU DIOS. 10Mu nadhak nan luta ot maunug dad dalom takon hi Korah. Ya pinaten di apuy nadan nangun-unud ke didan 250. Hidiyen naat ke diday pangitib-an di udum an tatagut tumakut dan mangat hi umat hi inat da. 11Mu nadan imbabalen Korah ya uggeda nate kediyen algo.

12Datuwey nahlag hi imbabalen Simeon: nadan holag Nemuel, nadan holag Jamin, nadan holag Jakin, 13nadan holag Serah ya nadan holag Saul. 14Hay bilang am-in dadiyen linalakin holag Simeon ya 22,200. 15Datuwey nahlag ke Gad: nadan holag Sephon, nadan holag Haggi, nadan holag Suni, 16nadan holag Osni, nadan holag Eri, 17nadan holag Arodi ya nadan holag Areli. 18Hay bilang am-in dadiyen linalakin holag Gad ya 40,500. 19Da Er ke Onan an imbabalen Judah ya nate dad Kanaan. 20Hanadan nahlag ke Judah ya nadan holag Selah, nadan holag Peres ya nadan holag Serah. 21Hanadan nahlag ke Peres ya nadan holag Hesron ya nadan holag Hamul. 22Hay bilang am-in dadiyen linalakin holag Judah ya 76,500. 23Hanadan nahlag ke Issakar: nadan holag Tola, nadan holag Puah, 24nadan holag Jashub ya nadan holag Simron. 25Hay bilang am-in dadiyen linalakin holag Issakar ya 64,300. 26Hanadan nahlag ke Sebulun: nadan holag Sered, nadan holag Elon ya nadan holag Jahleel. 27Hay bilang am-in dadiyen linalakin holag Sebulun ya 60,500. 28Hanadan nahlag ke Joseph: nadan holag da Manasseh ke Eplaim. 29Hanadan nahlag ke Manasseh: nadan holag Makir ya nadan holag Gilead. (Hi Gilead ya imbabalen Makir.) 30Hanadan nahlag ke Gilead: nadan holag Ieser, nadan holag Helek, 31nadan holag Asriel, nadan holag Sekem, 32nadan holag Semida ya nadan holag Hepher. 33(Hi Selophehad an imbabalen Hepher ya maid di linalakin imbabalena. Binabai ya abuy imbabalena an hi Mahlah, Noah, Hoglah, Milkah ya hi Tirsah.) 34Hay bilang am-in dadiyen linalakin holag Manasseh ya 52,700. 35Hanadan nahlag ke Eplaim: nadan holag Suthelah, nadan holag Beker ya nadan holag Tahan. 36Nahlag hi Suthelah ot nadan holag Eran. 37Hay bilang am-in dadiyen linalakin holag Eplaim ya 32,500. 38Hanadan nahlag ke Benjamin: nadan holag Bela, nadan holag Asbel, nadan holag Ahiram, 39nadan holag Supham ya nadan holag Hupham. 40Hanadan nahlag ke Bela: nadan holag Ard ya nadan holag Naaman. 41Hay bilang am-in dadiyen linalakin holag Benjamin ya 45,600. 42-43Nahlag hi Dan ot nadan holag Suham. Hay bilang am-in dadiyen linalakin holag da Dan ya 64,400. 44Hanadan nahlag ke Asher: nadan holag Imnah, nadan holag Isbi ya nadan holag Beriah. 45Hanadan nahlag ke Beriah: nadan holag Heber ya nadan holag Malkiel. 46(Hi Asher ya waday imbabalenah babain hi Serah.) 47Hay bilang am-in dadiyen linalakin holag Asher ya 53,400. 48Hanadan nahlag ke Naptali: nadan holag Jahseel, nadan holag Guni, 49nadan holag Jeser ya nadan holag Sillem. 50Hay bilang am-in dadiyen linalakin holag Naptali ya 45,400. 51Hay bilang am-in di linalakin holag Israel an nitudok ya 601,730.

52Kanan APU DIOS ke Moses di 53“Ganodwaom nan luta mipuun hi kadakol nadan holag Israel ta ikap-ong mun dida. 54Idat muy bilbilog an luta nah dakdakol ya idat muy it-itay nah o-oha. Matiboy kadakol nan ohan puun nah kabilog di lutan midat ke dida. 55Tibom ta ibunut muy atom an mangikap-ong nah luta ya mipuun nah nitudok an bilang nadan nahlag hi imbabalen Israel. 56Mahapul nimpen mibunut di atom an mangikap-ong nah luta ta deket dakdakol da nah ohan puun ya bilbilog di midat ke dida ya deket o-oha dah ohan puun ya it-itay boy midat ke dida.”

57Hanadan nahlag ke Libay: nadan holag Gershon, nadan holag Kohat ya nadan holag Merari. 58Datuwey udum an nahlag ke Libay: nadan holag Libni, nadan holag Hebron, nadan holag Mahli, nadan holag Mushi ya nadan holag Korah. Hi Kohat di aman Amram 59an nangiinen Jokebed. Hi Jokebed an nitungod Egypt ya nahlag metlaing ke Libay. Nun-imbabale dah duwan lalaki ot da Aaron ke Moses ya ohan babai an hi Miriam. 60Hi Aaron ya opat di linalakin imbabalena: hi Nadab, hi Abihu, hi Eleasar ya hi Itamar. 61Nate da Nadab ke Abihu handih nun-appitan dan APU DIOS yaden uggeda inun-unud di kinalin APU DIOS hi aton dan munggohob hi insenso.

62Hay bilang nadan linalakin nahlag ke Libay an himbulana ya nahawwal ya 23,000. Naappil pey listaan di bilang da te adida midattan hi tawidon dan lutad Israel.

63Danaey binilang da Moses ke Eleasar handih numbilangan dan am-in hi holag Israel nah nundotal ad Moab nah pingngit di Jordan an Wangwang ya dommang di Jericho. 64Uggeda nakibilang handih namangulun numbilangan Moses nadah holag Israel handih kawada dad Sinai an adi maboblayan. Dadiyen nabilang handi ya maid ke diday natdaan an matagu. 65Te kinali tuwalin APU DIOS handi an mate dan am-in nah adi maboblayan. Mu ammunah Kaleb an imbabalen Jephunneh ya hi Joshua an imbabalen Nun an matdaan an matagu.