1“Apu Dios, adim anhan kal-iwan nadan na-na-at ke dakami. Ya uhdungan dakamit tibom di nibabainan mi. 2Binoltan di tatagun nalpuh udum an bobley boble mi. Ot diday miha-ad hi nunhituwan mi. 3Ya napuh-ig kami te pinaten di buhul miy aama mi ot mabaluy iina mi. 4Hay danum an inumon mi ya hay itungu mi ya mahapul an bayadan mi yaden nangina. 5Namahig an naligat di ipangunu dan dakamin mialig kamih kabayu ya nuwang. Ya takon di naka-atu kami ya adi dakami iabulut an mun-iyatu. 6Ta hay mo aton min tumagu ya ekami mungkodkodoh kanon mid Egypt ya Assyria. 7Handidan aammod miy nunliwat mu nate da ot dakamiy namoklah liwat da.

8Nihannot nadan nakababban tatagun di buhul mi nadah aap-apu mi ot diday mun-ap-apun dakami. Ya ongal di kabaelan dat maid di pakaihwang ke dakami. 9Ya ilamangan miy nitaguwan mi gapuh emi panamakan hi kanon mi nadah e-elen di boble. 10Gapuh namahig an inagang mi ya mundogo kami ya mun-aatung di adol min kay pugun. 11Pinilit di buhul min inhuyop di inayan mi ya iimbabale min binabaih tud Zion. 12Ya intayun da nadan aap-apu mi. Maid boy lispitu dah aam-ama. 13Pinilit day kakat-agun linalakin iimbabale min munggiling hi wheat an kay da himbut. Eda impun-ubuy u-ungan imbabale min linalakih kakaiw yaden mundangngewan da gapuh dam-ot na. 14Hanada ken aam-ama ya adida mo e um-umbun nah hoob nan boble ya nadan kakat-agu ya adida mo mumpagangoh pun-an-anlaan.

15Maid moy an-anla mih biyag mi. Kanan ot ya abuy manmannayo kami gapuh amlong mi ya kon ot u-umyung kami. 16Maid moy dayaw di Zion an ipahhiya mi ya mahmok kami mo te nakastigu kami gapuh liwat mi. 17U-umyung kamin abu ya kumogakoga kamit adi kami pakatiboh ang-angon mi te mihaniy luwa mi. 18Man-uke ya nadadag di boble mi an Zion ta kaiingle ya kikimngao te nataynan. Ta abuna mo nadan mailom an aggayam di mundallanan hidi.

19Mu takon di athidi ya he-a Apu Dios di mun-ap-aput nangamung. 20Tipet edakami inwalong hi nabayag? Kon ahi dakami bo nomnomon? 21Ayagan dakami anhan Apu Dios ta mibangngad kamin he-a! Ya daan mo anhan ta ibangngad mu handin dayaw mi tuwali 22weno kon iwalong dakamit inggana? Kon nanongnan bumobboh-ol kan dakami?”