1Kimmalih Jeremiah an kananay “Impunholholtapak ke Apu Dios gapuh boh-ol na. 2Paddungnay dinog-alak ot pundallanonak hi tapottapol. 3Ya nadandani on kinastiguwak an kayak banakdungan.

4Ot mungkaliputan di adol ku ya nungkagi-uy gugunit ku. 5Kayak bo ingkalabut nah punholholtapak ta hidiye nan u-umyunganak. 6Pinilitak an miha-ad nah tapottapol an kawad-an di kate.

7Yaden maid bo udot di namnamak an bumtik te binangkilinganak. 8Namahig di pundasal kun mumpahpahmok ke hiya, mu adina hangudon an donglon. 9Hinaniyanay dalanok hi natag-en binattun alad ya impanguluwak nah dakol an nunhahappang ya nalikaw an dalan.

10Kay layon hi Apu Dios an numbotak ke ha-on. 11Paddungnay linapditak nah kalata ot iguyudak nah nidawwi ot liputanak ot taynanak.

12Indongdong nay pananan ha-on 13ot pumpanaak ot mungkipanot hi adol ku. 14Tinatataw-anak ya tinaltalanggaanak nadah tataguk. 15Paddungnay namahig an ligat di indat nan kanok ya inumok.

16Ya paddungnay inggatinak ot mungkalunggidan di angak ya inggutobak hi batu ot maplag di bab-ak. 17Maid moy linggop ku ya uggek mo inilay kanan dah an-anla. 18Kanak hi nomnom kuy: Makakkahmokak pe kattog! Maid moy namnamak ke Apu Dios.

19Deket ninomnom ku nadan punligligatak ya hay kamaid di ustuh nunhituwak ya makahakkit di nomnom ku. 20Adik kalkal-iwan datuwen naat ke ha-on. 21Mu deke bo on nawaday namnamak hin immalih nomnom kuh tuwe:

22Munnanong nan adi malumman an pamhod Apu Dios. Ya gapuh ongal an homok na ya ugge ditaku impakadaddag. 23Midinol ta nangamung nan munnanong an homok Apu Dios ke ditakuh kabigabigat. 24Kanak hi nomnom kuy: Hi Apu Dios ya abuy mahapul ku, ta hidiye nan hiya ya abuy pundinolak!

25Mauleh Apu Dios hanadah mangidinol ya manapul ke hiya. 26Kinali maphod an mun-anus takun munhood ke hiyan mangihwang ke ditaku. 27Ya maphod an ilappuh kaungan mun-anus.

28Deket waday immalin ligat ke ditaku ya anusan taku ya ipadin-ong takuy nomnom taku. 29Na-ala bo ya indinol takun hiya ta nangamung na ot waday namnama taku. 30Takon di mipaholholtap taku weno mapadngolan taku ya abuluton taku.

31Ongal di homok Apu Dios ta nangamung ya adi ditaku iwalong. 32Takon di idatan ditakuh ligat ya homkon ditaku te ongal di naminhod nan ditaku. 33Hay kakulugana ya adina pun-amlongan di pangipaholholtapanan ditaku.

34Kon uggena inilan namahig di punholholtapan takuh kalabut, 35hin ugge nidat ke ditakuy kalebbengan an indat na 36ya hin adi maandong di inat di huwes ke ditaku? Nunna-ud an inilanan am-in.

37Hanadan iabulut Apu Dios ya abuy maat, 38maphod weno ad-adih panibo taku. Mahapul an maat ten hidiyey in-oldena. 39Tipet etaku mundiklamu hin nakastigu taku gapuh liwat taku?

40Daan mot nomnomon takuy pangi-e takut ibangngad takun mangun-unud ke hiya. 41Kalyon takun hiyan am-in di wadah nomnom ya puhu taku nah pundasalan takun kanan takuy 42‘Naliwat kami, Apu Dios, te nginohe daka ya ugge dakami pinakawanan ke he-a.

43Ot gapuh boh-ol mu ya inunud dakami ot pumpate dakamin maid di homok mu. 44Hinaniyam di adol muh mahdol an kulabut ta adi pakadatong di dasal min he-a. 45Hay bo inat mu ya in-abulut mun kay kami lugit hi pangat di buhul min dakami.

46Pinanadngolan dakami ya bina-inan dakamih buhul mi. 47Ya bokon ammunah diye te nunligligat kami ya nadadag di boble mi ya tumattakut kami. 48Dehtun namahig an abuy kogak te nadadag di tataguk.

49Hay luwak ya mialig nah wa-el an adi matduk 50inggana iuhdung Apu Dios ta ipatibo nay homok nan ditaku. 51Apu Dios, u-umyungak gapuh inat di buhul mi nadah kakat-agun binabai tuh boble min Jerusalem.

52Ya u-umyungak te kayak hamutin e konakonaon nadan buhul kun mangihihhingit ke ha-on hi maid di gapuna. 53Eyak impukung nah naka-utan ot puntongbaak hi batu. 54Indani ya mangaliy danum nah nangipukungan dan ha-on ot hay punnomnom ku ya nunna-ud an mateyak.

55Kediyen wadaak hidid dalom ya nundasalak ke he-a Apu Dios 56ya dingngol muy dasal ku handih numpahpahmokak an kanak di: Baddanganak anhan ta ihwangak! 57Ya hinumangak ke he-an kanam di: Adi ka tumakut.

58Ot baddanganak ot ihwangak hi kate. 59Kanak bo: Daan mo anhan ta ipahhig mun ha-on di ulem, ot inilam nadan gaga-ihon na-na-at ke ha-on. 60Inilam nan namahig di pangihihhingit di buhul kun ha-on ya inilam di implanu dan aton ke ha-on.

61Dingngol muy numpanadngol dan ha-on, Apu Dios, ya inilam am-in di planu da. 62Kabigabigat ya kanalkalyon day mipanggep hi planu dah aton dan ha-on. 63Ya namahig di panaltalangga dan ha-on mipalpuh biggatna inggana mahilong.

64Kastiguwom dida, Apu Dios, gapu ke dadiyen at-atton da. 65Ya dug-aham didat munholholtap da! 66Gapuh boh-ol mu ya un-unudom didat dadagom dida inggana maid di matdaan ke dida.’ ”