1Yesu n daa pianꞌ pianꞌad nwa naae la, ka yel o nyaꞌandolib la ye, 2“Baŋimi ye li kpelim daba ayi ka kuꞌum malek gaadug maluŋ la tienr dabisir paae. Ba na zaŋ Ninsaal Biig la n tis ka ba kpaꞌ o tabil dapuudir zug.”

3Ka Winaꞌam maalmaan kpeenmnam ne teŋin kpeenmnam laꞌas taaba n ken Kaifas yin. Kaifas da ane Winaꞌam maalmaan kpeenm. 4Ka ba tuꞌas ne taaba n gbanꞌe noor yinni ban na niŋ siꞌem n suaꞌ gbanꞌe Yesu n ku o. 5Ka ba yel ye, “Kaꞌa maluŋ la daar laa, bozugo nidib la na ti zabidi o zug.”

6Ka Yesu daa be Simon one da a kukom la yin n be Betani teŋin. 7Ka Yesu da be ani n dit ka poꞌa soꞌ da kenn o saꞌan na n mor alabasta kugir kolibir ne tudaare din ligidi zuꞌe hale bedego n kpaꞌe n waligi Yesu zug.

8Ka o nyaꞌandolib n nye li la, ba sunya pelig ne. Ka ba buꞌos ye, “Bo ligsaꞌuŋi nwa? 9Bozugo ba naani kuosin tudaare nwa ligidi bedego n zaŋi li suŋ noŋ dim.”

10Amaa Yesu baŋ ba tenꞌesug ka yeli ba ye, “Bo ka ya daam poꞌa la ala? O maal man yelsum. 11Noŋ dim bene ya saꞌan daar wusa, amaa man ku be ne yanam saŋa wusa. 12On kpaꞌe tudaare niŋe m niŋgbiŋ nwa, paꞌal ye o tiꞌebidi ban na ti mum mam siꞌem. 13Yelmeŋir ka m yeti ya ye, labasuŋ la n ken zinꞌisiꞌa wusa dunia zug, ba na yel poꞌa nwa yela, ka li niŋ o tienr.”

14Ka Yesu nyaꞌandol yinni, on yuꞌur buon Judas Iskariot, daa keŋ maalmaan kpeenmnam saꞌan 15n yeli ba ye, “Ya na tisi m bo, ka m zaŋ Yesu niŋ ya nuꞌugine?” Ka ba yo o anzurifa ligidi piistanꞌ. 16Ka din saŋa, ka o pinꞌil n bo suer kan ka o na zam Yesu.

17Maluŋ pinꞌilug daar kan ka ba na di bodobodo lin ka ba pu niŋ dabin la, Yesu nyaꞌandolib kenn o saꞌan na n buꞌos o ye, “Fu bood ye ti maal zinꞌikane ka fu na di maluŋ tienr diib la?”

18Ka o lebis n yeli ba ye, “Kemi teŋ poogin la soꞌ saꞌan n yel o ye, ‘Ti Paꞌan la yel ye, “M saŋa paaeya. Ka m na maal maluŋ tienr fu yin, man ne m nyaꞌandolib.” ’ ” 19Ka o nyaꞌandolib la niŋ wenne Yesu n yeli ba la, n maal maluŋ tienr la diib.

20Ka zaam maꞌae, ka o zinꞌin ne o nyaꞌandolib pii ne yi la ye ba di. 21Ka ban dit la, Yesu yeli ba ye, “Yelmeŋir ka m yeti ya ye, nid yinni ya saꞌan nwa na zam man.”

22Ka ba sunya saꞌam hale, ka ba pinꞌil n buꞌosid o yinni yinni ye, “Zugsoba, li ane man bee?”

23Ka Yesu lebisi n yeli ba ye, “On ka o nuꞌug na siaꞌal ne m nuꞌug laan la, one na zam man. 24Ninsaal Biig la na kpi wenne din pun da sob m yela siꞌem la. Amaa toog be one zam Ninsaal Biig la zug. Li da pu suꞌum ye o ma duꞌa o.”

25Ka Judas one na zam Yesu la lebis n yel ye, “Paꞌana, li ane man bee?”

Ka Yesu yel o ye, “Fun yel ala.”

26Ka ban daa dit la, Yesu zaŋ bodobodo n puꞌus Winaꞌam bareka ka gbenꞌes n tis o nyaꞌandolib la, ka yeli ba ye, “Diꞌem nwa n di. Lina a m meŋ niŋgbiŋ.”

27Ka o zaŋ nwam n puꞌus Winaꞌam bareka ka tisi ba ye, “Ya wusa diꞌem nu. 28Bozugo nwa ane man ziim line ane nonaar yela. Ziim line yi ye nidib bedego nye suguru. 29M yeti ya ne ye, m ku lem nu daam nwa yaꞌase, asee daar kan ka m na lem nu danpaal ne ya, m Baꞌ soꞌolim ni la.”

30Ka ban daa yuum Winaꞌam yuuma n naae la, ba yi n ken Olives Zuerin la.

31Ka Yesu yeli ba ye, “Yanam wusa na kiꞌis ka bas man zina yuꞌuŋa, bozugo li sobne ye,

33Ka Piita lebis ye, “Hale baa bama wusa yaꞌa na zo ka bas fun, man ku bas foo.”

34Ka Yesu yel Piita ye, “Yelmeŋir ka m yet uf ye, zina yuꞌuŋa nwa, fu na kiꞌis man noor atanꞌ ka noraug naan kaas.”

35Ka Piita lebis yel ye, “Hale baa li yaꞌa suꞌum ye man kpi ne fun, m ku kiꞌisi fu.” Ka o nyaꞌandolib la wusa me yel ala.

36Ka ban ne Yesu yi ken zinꞌikan buon Gesemane la, ka o yel o nyaꞌandolib la ye, “Kpelimi kpela, ka man keŋ tuon n sos Winaꞌam.” 37Ka Yesu dol Piita ne Zebedee biis ayi. Ka o suunr saꞌam bedego. 38Ka o yeli ba ye, “M suunr saꞌameya, hale ka li wenne mam ye m kpine. Kpelimi kpela ka guri m.”

39Ka o keŋ tuon biꞌela n vanbin teŋin, ka sos Winaꞌam ye, “M Baꞌ, li yaꞌa a suꞌum, ke ka daam nwam nwa line paꞌal m namisug la, gaad ka ke mam. Amaa kaꞌane ye m sunf boodim, amaa lin ka fu bood ye li niŋ la.”

40Ka o leb o nyaꞌandolib la saꞌan n nye ka ba gbisidne. Ka o buꞌos Piita ye, “Yanam ku tunꞌe nie ne man baa biꞌela? 41Niemi, ka sos Winaꞌam ka ya da kpenꞌ makirine. Siig la bood Winaꞌam dolim, amaa ya niŋgbina kaꞌ paŋa.”

42Ka o lem leb yaꞌas n sos Winaꞌam n yel ye, “M Baꞌ, daam nwam nwa yaꞌa ku gaad ka ke mam asee m nu li, kel ka li niŋne fu yaꞌam boodim.”

43Ka o lem leb o nyaꞌandolib la saꞌan na yaꞌas, ka nye ka ba kpelim gbisidne, bozugo gbenn um daa more ba hale.

44Ka o ke ba, ka leb yaꞌas, noor atanꞌ daan n sos Winaꞌam ne pianꞌad yin la gullim. 45Ka o lem leb o nyaꞌandolib la saꞌan na, ka buꞌosi ba ye, “Ya kpelim gbisidne ka vuꞌusidaa? Gosimi, saŋa paae na, ka ba pun zam Ninsaal Biig la, ka zaŋ o niŋ tuumbeꞌed dim nuꞌusin. 46Duomi ka ti keŋ. Gosim one n zam man la paae na.”

47Ka on nam kpelim pianꞌad la, ka Judas one a o nyaꞌandolib pii ne yi la nid yinni, kenna ne nidib bedego bane yi maalmaan kpeenmnam ne kpeenmnam saꞌan na, ne suꞌuraad ne balaya. 48One zam o la, pun paꞌali ba siꞌel ye, “On ka m muak o noor la, one la. Gbanꞌam o.” 49Ka Judas paae Yesu saꞌan na ka kpelim puꞌus o ye, “Naa, Paꞌana,” ka muak o noor.

50Ka Yesu buꞌos o ye, “M zua, fu kena ye fu niŋ bo?”

Ka ba kena gbanꞌe Yesu. 51Ka Yesu nid yinni fue o suꞌuraug n kiaꞌ maalmaan tumtum tobir n fiꞌig.

52Ka Yesu yel o ye, “Lebisim fu suꞌuraug la su li teongun, bozugo bane zabid ne suꞌus la na kpi ne suꞌus.” 53Ka Yesu buꞌos o ye, “Fu pu baŋ ye m tunꞌe sos m Baꞌ ka yimmo ka o na tis man maleknam tusa siꞌem naa? 54Ka li yaꞌa niŋ ala, Winaꞌam gbauŋ n daa yel siꞌel la, na niŋ wala ka li a ameŋa?”

55Ka Yesu buꞌos nidib bedego la ye, “Ya kena ne suꞌuraad ne balaya ye ya gbanꞌe m wenne faand bee? Daar wusa ka m be Winaꞌam yin n zamisid nidib, ka ya pu gbanꞌe ma. 56Amaa nwa wusa niŋne n paꞌal ye Winaꞌam nodiꞌesidib n daa yel siꞌel n sob Winaꞌam gbauŋin la, ane ameŋa.” Ka o nyaꞌandolib la wusa bas o ka zo.

57Ka bane gbanꞌ o la, mor o keŋ maalmaan kpeenm Kaifas yin. Anina ka gbauŋmiꞌidib ne kpeenmnam daa pun laꞌas. 58Ka Piita be nyaꞌaŋ sa n dol hale n paae maalmaan kpeenm la samanin. Ka o kpenꞌ zakin zinꞌi ne tumtumnib, ye o baŋ li koosug a siꞌem.

59Ka maalmaan kpeenmnam ne nimbane yiti gbanꞌe noor Jew dim yela la zanꞌasa, bo ziri kaset dim ye ba maꞌ tis Yesu, ka ba ku o. 60Ka ba pu nye baa yinni, hale baa ziri kaset dim bedego daa maꞌ ziri tis o.

Li nyaꞌaŋ la ka nidib ayi due 61n ziꞌe, ka yel ye, “Dau nwa daa yel ye, o na tunꞌe nwaꞌe Winaꞌam puꞌusum yir la, ka lem nok daba atanꞌ n meꞌ li naae.”

62Ka maalmaan kpeenm la due n ziꞌe, ka buꞌos Yesu ye, “Fu ku lebis siꞌel ne bane yet siꞌem wusa tis uf laa?” 63Amaa ka Yesu pu lebis siꞌela.

Ka maalmaan kpeenm lem pianꞌad ne Yesu yaꞌas ye, “Poom ne Winaꞌam one voe la, ka yele ti, fu yaꞌa ane Kiristo one a Winaꞌam Biig la.”

64Ka Yesu lebis n yel o ye, “Fun yel ala.” Amaa m yeti ya ye, “Lin pinꞌil zina zaŋ ken sa, ya na ti nye Ninsaal Biig la ka o zinꞌin Winaꞌam one soꞌe paŋ la datiuŋ ka kenna ne saŋgbana.”

65Ka maalmaan kpeenm aaenn o meŋ fuud, ka yel ye, “Fu tuꞌud Winaꞌam. Ti pu lem bood ye soꞌ lem di kaset yaꞌase. Ya pu wum on tuꞌud Winaꞌam siꞌem la. 66Ya tenꞌesid ye bo?”

Ka ba lebis ye, “O suꞌum ne kuꞌum.”

67Ka ba tubis nintoond n mad o nindaa, ka nweꞌ o ne kpisinkpila. Ka sieba nweꞌ o ne tampianꞌas 68n yel o ye, “Fun Kiristo, baŋim one nweꞌ uf la.”

69Ka Piita daa zinꞌi zakin la, ka bipuŋ keŋ o saꞌan na n yel o ye, “Fu me daa bene ne Yesu, one yi Galilee la.”

70Ka o kiꞌis ba wusa tuon n yel ye, “M pu baŋ fun yel siꞌel laa.”

71Ka o yi yaŋirin ka bipuŋ soꞌ lem nye o, ka yel bane be anina la ye, “Oŋa me daa be ne Yesu, one yi Nazaret la.”

72Ka Piita kiꞌis yaꞌas, ka po ye, “M ziꞌ oo.”

73Li niŋ biꞌela, ka bane ziꞌe la liꞌel Piita ka ye, “Ameŋa, oŋa ane Yesu nid yinni, bozugo o pianꞌad viig o gbin.”

74Ka Piita pinꞌili po, ka kaanb kaanbbeꞌed tis o meŋ ye, “Mam ziꞌ dau nwaa.” Ka saŋkan la ka noraug kaas. 75Ka Piita yuꞌun tienn Yesu n sa yel siꞌel la ye, “Fu na kiꞌis noor atanꞌ ye, fu ziꞌ ma, ka noraug nyaan kaas.” Ka o yi yiŋ n kum hale bedego.