1Saŋkan la ka Joon one suud nidib Winaꞌam kuꞌom la keŋ Juuda moogin n moon 2n yet ye, “Tiakimi ya sunya ka bas ya tuumbeꞌed; ka Winaꞌam naꞌam la liꞌelne.” 3Winaꞌam nodiꞌes on ka ba buon Azaya la da sob yel Joon yela la, ye,

4Joon da yene fukan ka ba maal ne yugum konbid, ka nok gbauŋ senbidiŋ n loo o sia. Ka o diib da ane naꞌazomnam ne siint. 5Ka nidib da yi Jerusalem ne Juuda soꞌolim wusa ne teens bane kpiꞌe Joodan moꞌar wusa n kenn o saꞌan na, 6ka peligi ba poos n tuꞌasi ba tuumbeꞌed. Ka o suu ba Winaꞌam kuꞌom moꞌarin la.

7Ka on nye ka Farisee dim ne Sadusii dim bedego kenna ye o suu ba Winaꞌam kuꞌom la, o yeli ba ye, “Yanam bane wenne wiigi nwa, anoꞌone yeli ya ye ya zom Winaꞌam supeen yela line kenna la? 8Ala zug tumme tuum bane paꞌan ye ya tiakeya, 9ka da tenꞌesid ye, Abraham ane ya yaaba. Ka m yeti ya ye, Winaꞌam tunꞌe zaŋ kuga nwa n maal yaas tis Abraham. 10Nannanna lieŋ be tiis gbinin. Ka tikan wusa pu wel welsumaa, ba na nwaesi lob bugumin.

11“Man suudi ya Winaꞌam kuꞌom, ka li paꞌal ya tiaker yela. Ka one doli mam nyaꞌaŋ la mor paŋ gati m. Ka m pu nar ye m zal o taꞌada. On na suu ya ne Winaꞌam Siig Suŋ ne bugum. 12O zanl wanzauk o nuꞌugin ka na yeleg ki line be zieŋin la, ka na vaae ki bielim la n su buorin, ka nyuꞌe udug la ne bugum line pu kpiisida.”

13Ka Yesu yi Galilee n kenn Joodan moꞌarin na ye Joon suu o Winaꞌam kuꞌom. 14Ka Joon zanꞌas, ka yel ye, “Li suꞌum ka fun na suu man, fu lee kene man saꞌan naa?”

15Ka Yesu lebisi yel o ye, “Kel ka ti siak niŋ ala nannanna, bozugo li suꞌum ye ti tum Winaꞌam bood siꞌem la wusa.” Ka o siak ala.

16Ka one suu o naae la, Yesu du kuꞌom gbeug na, ka nye ka arazana yoꞌog. Ka o nye Winaꞌam Siig Suŋ sigid na wenne dawan ne n zoon o zugin. 17Ka kukor yi arazana ni na n yel ye, “Oŋa ane man binoŋir, one ke ka m sunf malis bedego.”