(Jɛɛlɛ naa sumbonɔ pe sɛnyoro)
1Sɔngɔrɔ maa paan, sɔngɔrɔ maa paan, Sulamu ca sumboro!
Sɔngɔrɔ maa paan, sɔngɔrɔ maa paan, jaŋgo wɔɔn wele jɛŋgɛ!
(Sumboro wi sɛnyoro)
Yiŋgi na ye sila Sulamu ca sumboro wi wele jɛŋgɛ,
wo ŋa pòo fɔrɔgɔ leele gbogolomɔ shyɛn yɔrɔ ni we?
(Lefɔnŋɔ wi sɛnyoro)
2E, wunlunaŋa sumborombyɔ, ma tɔɔrɔ tì yɔn wa ma sawira ti ni dɛ!
Ma sɛnnɛ lì kɔn kiiri ma yɔn paa yɔlɔgɔ somu yɛn,
ŋa wi yɛn kapyɔ jɛnfɔ kɛɛ tunŋgo.
3Ma fuŋgbolo nɔgɔ kì kɔn kiiri ma yɔn paa wɔjɛnnɛ yɛn,
na duvɛn nuwɔ taan na kɔ wa li ni;
ma fuŋgbolo li yɛn paa bile ŋa wi yɛn ma gbogolo wi yɛn,
ŋa masho pɔlɔ yarifyɛɛnrɛ yɛn maa maga.
4Ma yinŋgele shyɛn ke yɛn jɛgɛlɛ jɛgɛlɛ paa safuwe piile shyɛn yɛn,
ke yɛn paa lufaa piile waanla yɛn.
5Ma yɔlɔgɔ ki yɛn kiiri ma tɔnlɔ ma yɔn paa sanŋgazo yɛn,
ŋa pè kan solo ŋgangala ni.
Ma yɛnmbigile ke yɛn na yɛngɛlɛ paa Ɛshibɔn ca tɔnmɔ were ti yɛn,
wa ca ki yeyɔngbɔgɔ ŋga pe yinri Bati Arabimu ki tanla.
Ma numala li yɛn ma yɔn paa Liban tara sanŋgazo wi yɛn,
ŋa wi yɛn ma kan ma yɛgɛ wa wa Damasi ca ki yeri.
6Ma go ki yɛn caw ma yɔn ma na paa Karimɛli yanwiga ki yɛn,
ma go ŋga kì ti ki njegele ke yɛn ma yɔn paa kondoro pariyɛɛgɛ yɛn.
Ma go njegele ke tiyɔnwɔ pi mbe ya mbe wunlunaŋa wi yigi mboo jan.
7E, ma yɛn ma yɔn dɛ, ma kala lìlan ndanla jɛŋgɛ,
na ndanlafɔ, na lendanlawa.
8Ma tɔnlɔ faraw ma yɔn paa sɛngɛndige yɛn,
ma yinŋgele ke yɛn paa sɛngɛzhara yɛn.
9A mì sho fɔ mi yaa lugu wa sɛngɛndige ki ni, mbe sa ki shashara ti yigi.
Ki yɛn ma yala ma yinŋgele ke pye lɛgɛlɛgɛ na yeri paa ɛrɛzɛn shashaga yɛn.
Ki yɛn ma yala ma yɔn ki nuwɔ pi pye pi tanla paa pɔmu tige pire pende nuwɔ yɛn.
10Ma yɔn ki pye ki tanla paa duvɛn taan yɛn.
(Sumboro wi sɛnyoro)
E, ki duvɛn taan wi yɛn ma tɛgɛ na ndanlafɔ wo kan,
wi maa fuun wa we yɔngbasɛŋgɛlɛ ke na fɔ we ma ka saa wɔnlɔ.
Nayinmɛ mba pi ma pye wa, na yaga ye yɛɛ ndanla
(Sumboro wi sɛnyoro)
11Mi yɛn na ndanlafɔ wi woo,
na la ki yɛn wi na fɔ jɛŋgɛ.
12Na ndanlafɔ, pan we kari wa kɛɛrɛ ti ni,
we yaa sa wɔnlɔ wa kɛrɛ kapige ka ni.
13Pinliwɛ ni yirifaga na, we yaa kari wa ɛrɛzɛn kɛɛrɛ ti ni
mbe sari wele na kaa pye ɛrɛzɛn tiire tì fun, na kaa pye ti fyɛnwɛ ma pɛlɛgi;
na kaa pye girenadi tire ti fyɛnwɛ.
Wa ki laga ki na, mi yaa ki naga ma na fɔ ma yɛn mala ndanla.
14Yan wɛrɛ nda pe yinri madiragɔri ti nuwɔ taan pì yiri ma jaraga lagapyew;
tige pire nda tì tanlandanla ti cɛnlɛ pyew ta yɛn le we yeyɔngɔ ki na,
tige pire fɔnndɔ nda tì cɔ to naa lɛrɛ ti ni.
Na ndanlafɔ, mìri tɛgɛ mboro kan.