1Mboro ŋa ma yɛn jɛɛlɛ pe ni fuun tiyɔɔn,

ma ndanlafɔ wi kari se yeri?

Ma ndanlafɔ wi kari kɛɛ kikiin na? Ki yo we kan wɔɔn saga woo lagaja.

2Na ndanlafɔ wì kari wa wi naŋgɔ kɔlɔgɔ ki ni,

wa laga ŋga tipire nuwɔ taan woro ti yɛn;

jaŋgo mbe saa wi yaayoro ŋgbelege ki kɔnri kila kaa wa,

mbe masho pɔlɔ yarifyɛɛnrɛ ta kɔn wa.

3Mi yɛn na ndanlafɔ wi woo,

na ndanlafɔ fun wi yɛn na woo;

wi yɛn naa yaayoro ti kɔnri tila kaa wa masho pɔlɔ yarifyɛɛnrɛ ti sɔgɔwɔ.

4E, na wɔnlɔnjɔ, ma yɛn ma yɔn dɛ, paa Tiriza ca tiyɔngɔ ki yɛn,

ma yɛn letiyɔɔn paa Zheruzalɛmu ca ki yɛn,

ma yɛn sunndo kɔngɔ ni paa maliŋgbɔɔnlɔ ŋgbelege yɛn ki dirapoye pe ni.

5Ma yɛgɛ ki laga na na,

katugu ma welege ki mala jatere wi piri na na.

Ma yinzire ti yɛn ma tɔnlɔndɔnlɔ ma wɔ paa sikaŋgbelege yɛn,

ŋga ki yɛn na tinri ma yiri wa Galaadi tara yanwira ti na.

6Ma ŋgangala kè filige paa simbafiile ŋgbelege yɛn,

mbele pè yiri wa pe wolisaga na paan;

pe pe ni fuun naa pe waan yɛɛnlɛ,

wa kpɛ suu woo la.

7Ma kanŋguŋgolo ke ni fuun nuŋgba nuŋgba kè yanlaga ma yɔn paa girenadi tige pige walaga yɛn,

wa ma gbato wi nɔgɔ.

8Wunlunaŋa jɛɛlɛ pe mbe ya pye nafa taanri,

wi cɛnfɛnnɛ pè pye nafa tijɛrɛ,

konaa wi sumbonɔ pe yɔn kiga ka ya mbe jɛn.

9Ɛɛn fɔ mi wo yeri, jɛlɛ nuŋgba pe wi yɛn laga dunruya wi ni,

wo wi yɛn na jɛndɛtuwa tiyɔɔn we, na jɔ ŋa wi yɛn maa yɛɛ yɔn fili.

Wo nuŋgba pe wi yɛn wi nɔ wi yeri,

wi kala li yɛn ma gbɔgɔ wi nɔsee wi yeri.

Sumbonɔ sanmbala pe kaa yan, pe maa ki yuun wi wogo na ma yo wi yɛn fɛrɛwɛ na.

Wunlunaŋa jɛɛlɛ poro naa wi cɛnfɛnnɛ pe ni pe kaa yan, pe maa wi sɔnni.

10Jɛlɛ tiyɔɔn wiwiin wi yɛn na paan wa yɛɛn paa lalaaga yɔn yɛn?

Wi yɛn ma yɔn paa yeŋge ki yɛn,

wi yɛn na yɛngɛlɛ paa yɔnlɔ ki yɛn;

wi yɛn sunndo kɔngɔ ni paa maliŋgbɔɔnlɔ ŋgbelege yɛn ki dirapoye pe ni.

11Mì tigi wa naŋgɔ kɔlɔgɔ ki ni, ko ŋga tire nda ti yɛn pire sɛworo ti yɛn wa we,

mbe sa yaara ti finmɛ pi wele wa gbunlundɛgɛ ki ni,

mbege wele na kaa pye ɛrɛzɛn tiire ti yɛn na funnu,

mbege wele na kaa pye girenadi tire ti yɛn na fyɛnwɛ.

12Mi woro na kala lo la jɛnni naa, nayinmɛ pi kala na,

ma mbe yo fɔ lere ŋa yɛn na malaga gbɔnwotoro fee mɛgbɔgɔfɔ ni†.