1Ye simbapɔlɔ yɛnrɛgɛ mbanlaga ki win ye leele pe yeri!

Jɔlɔgɔ yɛn na paan mbe to Yawe Yɛnŋɛlɛ li woolo pe na paa yɔn yɛn.

Yawe Yɛnŋɛlɛ lì yo fɔ:

«Katugu Izirayɛli woolo pànla yɔn finliwɛ pi jɔgɔ,

pè yiri ma je na lasiri wi na.

2Pe yaa kaa gbele mbaa na saga jaa, mbaa yuun fɔ:

‹We Yɛnŋɛlɛ, woro Izirayɛli woolo wele, pa wɔ̀ɔn jɛn yɛɛn!›

3Izirayɛli woolo pè je ŋga ki yɛn jɛŋgɛ ki na.

Ki kala na, pe juguye pe yaa ka pe purɔ.

4Pe ma wunlumbolo tɛgɛ pe yɛɛ go na,

mbe sigi ta pe silan yewe.

Pe ma teele tɛgɛ pe yɛɛ go na,

mbe sigi ta pe sigi yo na kan.

Pè yarisunndo yanlɛrɛ gbegele pe yɛɛ kan pe warifuwe naa pe tɛ wi ni,

a ko pye pyelɔmɔ pa mbe pe tɔngɔ.

5«Samari tara fɛnnɛ, mi ŋa ye Yɛnŋɛlɛ, mì je ye napige yanlɛgɛ ki na.

Mì nawa ŋgban ye ni.

Ye se ya mbe ye yinwege ki pye fyɔngɔ fu fɔ sa gbɔn wagati wiwiin?

6Ye napige yanlɛgɛ pa kì yiri wa yoro Izirayɛli woolo ye yeri.

Kapyɔ jɛnfɔ wìgi gbegele.

Ki woro Yɛnŋɛlɛ.

Ki kala na, ki Samari tara napige yanlɛgɛ ki yaa ka purugu mbe wɔ wa.

7Ki kaa pye tifɛlɛgɛ ko yè lugu paa yariluguro yɛn,

tifɛlinjolo ye yaa ka ta paa yarilire yɛn.

Na bile wii fuuru,

wi se pire le.

Ali na wi ka si fuuru mbe pire le,

tara ta yɛgɛ woolo pe yaa ka kari ki yarilire pire ti ni.

8«Cɛngɛlɛ kele yɛgɛ Izirayɛli woolo pè koli ma kari pe ni.

Koni, pe mbele wa cɛngɛlɛ sanŋgala ke sɔgɔwɔ,

pe yɛn paa yaraga ka yɛn, ŋga ki kala woro lere na.

9Katugu pè kari wa Asiri tara.

Yan sofile wi ma koro wi yɛɛ kan,

ɛɛn fɔ Efirayimu cɛnlɛ woolo poro na, pè kɛɛnlɛ ta pe yɛɛ kan.

10Ali mbege ta pè yarikanra lɛgɛrɛ kan cɛngɛlɛ kele yɛgɛ woolo yeri,

koni wagati wì gbɔn mbe pe gbogolo.

Sanni jɛnri pe yaa la jɔlɔ wunlumbolo piile pe wunluŋgbɔɔ wi kɛɛ.

11«Efirayimu cɛnlɛ woolo pè saraga wɔsara lɛgɛrɛ kan,

mbaa kapere ti kala yagawa jasaara woo wa ti na.

Ɛɛn fɔ ki saraga wɔsara tì kan, a paa kapere piin.

12Ali na mi kanla lasiri sɛnrɛ ti yɔnlɔgɔ yɔnlɔgɔsaga lɛgɛrɛ na mberi kan pe yeri,

ti yaa pye pe yɛgɛ na paa sɛnrɛ nambannda yɛn.

13Pe ma saraga yaayoro ti wɔ na yeri mari gbo,

mari kara ti ka.

Ɛɛn fɔ mi ŋa Yawe Yɛnŋɛlɛ, pe saara tii na ndanla.

Koni, mi ŋa Yawe Yɛnŋɛlɛ mi yɛn na jatere piin pe kajɔgɔrɔ ti na,

mi yaa ka pe kajɔgɔrɔ ti fɔgɔ tɔn pe na.

Poro wo na, pe yaa ka sɔngɔrɔ wa Ezhipiti tara naa.

14Izirayɛli woolo pè fɛgɛ pe dafɔ wi na,

ma wunlumbolo yinrɛ kan pe yɛɛ kan.

Zhuda tara woolo pè malaga sigecara lɛgɛrɛ kan.

Ɛɛn fɔ mi yaa ka kasɔn le ti ni.

Kasɔn ki yaa ka pe wunluwɔ yinrɛ ti sogo.»