Izirayɛli woolo pè yo pe yaa sɔngɔrɔ Yɛnŋɛlɛ li kɔrɔgɔ
1Ye yɛn na yuun fɔ:
«Ye pan we sɔngɔrɔ Yawe Yɛnŋɛlɛ li kɔrɔgɔ.
Lo lì we wɛlɛgɛ,
ɛɛn fɔ li yaa we sagala.
Lo lì we gbɔn,
ɛɛn fɔ li yaa we wɛrɛ pye.
2Li yaa yinwege kan we yeri sanni piliye shyɛn,
ki pilige taanri wogo, li yaa we yirige,
we yaa la we yinwege ki piin li yɛgɛ sɔgɔwɔ.
3Ye ti we Yawe Yɛnŋɛlɛ li jɛn,
weli lagaja weli jɛn.
Ki woro na we kɔɔn shyɛn, lalaaga ki ma pan yɛgɛ ŋga na,
pa li yaa ka pan mbe we saga ma.
Li yaa ka pan we kɔrɔgɔ paa tisaga yɛn,
paa kanga tisaga yɛn, ŋga ki ma pan ma tara ti yinŋgi.»
4Yawe Yɛnŋɛlɛ li yɛn na yɔn sogomɔ kaan, ma yo fɔ:
«Yoro Efirayimu cɛnlɛ woolo, mbe yiŋgi pye ye na?
Yoro Zhuda tara woolo, mbe yiŋgi pye ye na?
Ye kagbaraga kila mɔ paa pinliwɛ yɔn fɔɔngɔ yɛn,
ki yɛn paa yirifaga mɛŋgɛ yɛn, ŋga ki ma yangara.
5Ki kala na, mìlan yɔn sɛnrɛ yofɛnnɛ pe yirige ma pe wa ye na;
a mì jɔlɔgɔ wa ye na na yɔn sɛnrɛ ti ni.
Na kiti wi yaa to ye na paa yɔnlɔ yanwa yɛn.
6Katugu kagbaraga ko ki yɛn mala ndanla, ɛɛn fɔ yaayoro saara to ma ti yɛn mala ndanla.
Leele panla jɛn Yɛnŋɛlɛ ko ki yɛn mala ndanla ma wɛ saara sogoworo to na.»
Izirayɛli woolo pe yɛn na kapegbɔrɔ piin
7«Yànla yɔn finliwɛ pi jɔgɔ paa yɛgɛ ŋga na Adama ca kìla ki pye we.
Pa yànla fanla wa ki laga ki na.
8Galaadi ca kì kanŋga ma pye kapege pyefɛnnɛ ca.
Leele mbele pè gbo pe kasanwa pi yɛn wa lagapyew.
9Beŋganri pyefɛnnɛ pe ma lara na leele pe singi yɛgɛ ŋga na,
pa saraga wɔfɛnnɛ ŋgbelege ki ma lara na leele pe singi ma, wa Sishɛmu ca kologo ki na, mbaa pe kuun.
Ki wogo ki yɛn katijaanga.
10Mì katijangara yan wa Izirayɛli tara.
Efirayimu cɛnlɛ woolo pe yɛn na nanjara piin, ma ti a Izirayɛli woolo pè cɛn fyɔngɔ ni.
11Yoro fun Zhuda tara woolo, yarilire kɔngɔ yɛn ma gbɛgɛlɛ ye kan,
na mi ka kaa jaa mbanla woolo pe wɔ wa kulowo pi ni sanga ŋa ni we.