1Ha-lê-lu-ya! Phai padràu hau lem bùi ca Chuaq.
Ô Manè bùi Chuaq, ma jah 'màng aih Haq dìq jaq lem.
Can xa-ŏch xam manoh loq waq da Haq ŏi hloi hloi.
2Cabô nui ta'mon hlài bìac halac da Chuaq broq?
Cabô jah padràu hau lem bùi ca Haq tôm tàu?
3Xôq ramŏt ca mangai leq wèq jah bìac ta-atoq,
hloi hloi broq bìac troq.
4Waiq Chuaq, xìn hmàng trùh ca au jò ìh am xôq ca jàn Ìh,
xìn hmàih ca au jò trùh hmàih ca wì haq.
5Đòiq au jah hnoq bìac lem jìang ta wì mangai ma Ìh khoi jah ràih,
đòiq jah axong bìac lem bùi da jàn Ìh
wa jah calêu padèch pajùm xôxech da Ìh.
6Nhèn xam boc yaq da nhèn khoi broq tôiq:
nhèn khoi broq bìac ùh troq, khoi broq bìac dù.
7Ta Aicàp boc yaq nhèn khoi ùh nhàn hnoq bìac halac ma Ìh khoi broq,
ùh hmàng trùh can loq waq càn caiq da Ìh,
mahaq wì haq khoi loh nòih ca Ìh ti 'bò diac raxìq,
aih Diac Raxìq Gòh.
8'Nhac 'màng aih, Chuaq khoi taiq hiniq Haq dèch claih wì haq,
đòiq mahno loh cwìang itai da Haq.
9Chuaq lech Diac Raxìq Gòh, haq loh ca croh xrŏt,
Chuaq ajènh wì lam cwa diac raxìq bu dàng lam ta đùng braih càn.
10'Màng aih Chuaq dèch wì enh tì mangai ma tagit ca wì,
wa dèch wì khoi ca mangai tajraq hlài ca wì.
11Diac làp dìq ca mangai ma tagit ca wì haq,
ùh mòiq ngai leq jah claih.
12Jò aih wì haq lùi Chuaq
wa calêu padèch hiniq Haq.
13Mahaq wì renh hèt đac bìac Chuaq khoi broq,
ùh gòm ngan hnoq bìac Chuaq enh broq.
14Ta đùng braih càn, wì haq xa-ông loh manoh ham enh
wa 'bàt thù Boc Plình nòi đùng braih càn.
15'Màng aih, Chuaq am ca wì haq bìac wì ma xìn,
mahaq broq ca mahua yiang wì haq loq hŏnh.
16Ta nòi broq traiq wì haq ta'mrua ta'bì ca Môise wa Arôn,
aih pajàu ha'nhèq hadròih da Chuaq.
17Taneh hađah lŏn Đathan,
wa catùh da lù da A-bi-ram.
18Ùnh cheo lù wì haq,
ùnh bùh đac 'bài mangai dù.
19Wì haq broq mòiq toq 'bo ta Hôrêp
khoi èh cùh waiq dua 'mù tùh padì aih.
20'Màng aih wì haq dahlìh can 'ngah 'ngai da Chuaq
xam mòiq toq dua 'mù tìah ca 'bo loq caq nhat.
21Wì haq khoi hèt đac Boc Plình, Haq ma dèch claih wì haq,
Haq ma khoi broq rìm bìac càn caiq ta Aicàp,
22Haq ma khoi broq bàc bìac halac ta taneh da Ham,
bìac ma càn caiq wa ramòt ta Diac Raxìq Gòh.
23Taiq 'màng aih Chuaq doi Haq jêh đac wì.
Mahaq Môise, mangai Haq khoi ràih,
yòng enh ngìa ca Chuaq wa jàn.
Môise waiq xìn Chuaq tàt can nòih, paq jêh đac wì.
24Khoi ca aih wì haq ngan ùh loh cleq taneh lem,
wì ùh lùi bàu hùaq da Chuaq.
25Wì mamùc mamac ta traiq dađeh
ùh tamàng tiaq bàu hùaq da Chuaq.
26Taiq 'màng aih Chuaq dèch tì pachac doi:
Au jah broq wì haq cachìt lùch ta đùng braih càn,
27Broq ca xinoi da wì haq cadàu manhài trài ta rìm Diac,
'bìq lam lac ta rìm gùng.
28Boc yaq nhèn khoi cùh waiq kiac dù Ba-an ta Pêo,
caq ngè tadreo ca mangai cachìt.
29'Màng aih, bìac broq da wì haq khoi broq ca Chuaq loh nòih,
'màng aih khoi i mòiq bìac hiniq ramòt trùh ca wì haq.
30Trùh jò aih Phi-nê-hat yòng tàt đac,
'màng aih can hiniq ramòt càn yòng hlài.
31Enh 'nhòng cô trùh 'nhòng ma atìq,
bìac broq da haq aih jah doi ta-atoq hloi hloi jah hmàng trùh rìm 'nhòng.
32Boc yaq nhèn khoi broq ca Chuaq nòih bìac diac ôq ta Mê-ri-ba;
taiq bìac cô Môise ep pòq wê đeh tôiq lôi.
33Taiq wì broq ca manoh haq manhài,
'màng aih hacùng haq capoch hloh bàu ùh hèm adroi.
34Wì ùh jêh đac dìq ca jàn
ma Chuaq khoi thê jêh.
35Mahaq alôn ca 'bài jàn aih,
wa broq tiaq bìac dù ma wì haq broq.
36Wì patìh bìac ca dua 'mù ma wì haq broq loh;
bìac aih khoi broq manet ca wì haq.
37Wì dèch am dèh con calô con cadrì
broq ngè tadreo ca kiac dù.
38Wì khoi broq ta-ùc ca mahem ùh i tôiq cleq,
aih mahem da con cadrì wa con calô da wì haq,
ma wì haq khoi dèch am ca can kiac dù ta Ca-na-an,
taiq 'màng aih taneh aih khoi amùa taiq mahem aih.
39Taiq 'màng aih wì haq khoi wìa amùa taiq bìac broq dađeh
wa khoi wìa mangai tango yŏc 'bac bìac caq ŏi da wì haq.
40Chuaq nòih dèh ca jàn cla,
Haq ramòt dèh ca xôxech Haq.
41Chuaq am wì haq mùt ta tì wì mangai diac 'noiq,
wa am ca wì ma git ca wì haq wèq cwìang wì haq.
42Mangai ma git ca wì haq padit padiang wì haq.
Wì haq ep chìuq broq hapŏng wì aih.
43Khoi bàc yàng Chuaq enh dèch wì haq,
mahaq wì haq xôq chaq trong tajraq hlài
wa hlòp jrùq tam yi hnao hòm ta tôiq lôi dađeh.
44'Nhac ca 'màng aih jò tàng bàu dang creo,
Chuaq xôq ngan hnoq can nan xa da wì haq.
45Taiq wì haq ma Chuaq hmàng hlài dèh ca wêh jao dađeh,
wa nhò can xa-ŏch xam manoh loq waq càn caiq da Chuaq,
Haq xa-ŏch ca wì haq.
46Chuaq broq ca wì haq jah xôq enh ngìa ca wì
ma rùp wì haq broq hapŏng.
47Waiq Chuaq Ìh Boc Plình da nhèn,
xìn dèch nhèn ahlài enh rìm diac,
đòiq nhèn jah calêu padèch hiniq hadròih da Ìh,
jah yŏc manoh bùi, wa calêu padèch hiniq Ìh.
48Padràu hau lem bùi ca Chuaq, Haq Boc Plình da Is-ra-ên!
Haq rìh hloi hloi.
Dìq ca jàn khòh doi: “Amen!”
Padràu hau lem bùi ca Chuaq beq!