Bìac Broq Da Boc Plình
Đawit Achìh
1Plình anoi 'noh bìac 'ngah 'ngai da Boc Plình, mat mahì,
mat khê, mat halŏng ta plình patô 'noh cwìang itai tì Haq broq.
2Hì cô trùh hì da èh anoi 'noh bàu hnài,
wa mang cô trùh mang da èh anoi 'noh bìac loq 'nì.
3Ùh i ca atêh bàu, ùh i ca bàu capoch,
ùh lah tàng bàu wì haq.
4Mahaq bàu 'noh da wì haq khoi pachaq jàp crŏng taneh,
bàu 'noh da wì haq tanam trùh xèm plình.
Chuaq khoi broq traiq ca mat mahì ŏi 'ne plình.
5Mat mahì tìah ca con ŏng loh enh adùq ta'nèp,
tìah ca mangai dêh padren jò cadàu thì.
6Mat mahì tŏc enh gàu plình
cô cadàu clìh enh cloh plình tau,
ùh i cleq jah tàt hòi tôq da haq.
7Ranenh da Chuaq aih joq lem lình gêh tôm,
jah parìh hlài can rìh da mahua yiang,
bàu hnài da Chuaq joq đang ca canòm,
jah broq mangai blùng loh ca rabiaq.
8Trong broq troq da Chuaq aih joq lem jang,
broq ca manoh mangai jah lem bùi;
bàu thê rabiaq da Chuaq aih hadròih,
broq 'ngah ca mat.
9Bìac loq yùq crè ca Chuaq aih lem hreo,
jah ŏi i hloi hloi.
Bìac hadrah ca Chuaq aih joq 'nàng,
wa dìq ta-atoq.
10Dìq ca bìac aih lem yi hnao ca wang 'nàng,
yi hnao ca wang khoi bùh ta ùnh;
nhim yi hnao ca diac xùt,
yi hnao ca diac xùt hatôh loh dèh enh tot da xùt.
11Yi hnao ca aih hòm, nhò ranenh aih hapŏng Ìh jah pa'yèp.
Mangai leq loq dì tiaq ranenh aih, èh jah bìac baha càn.
12Cabô ma jah loq tôiq ma hlèp ta manoh?
Xìn Chuaq baxŏng tôiq khoi hlèp ta manoh au.
13Chuaq ôi, xìn wèq hapŏng Ìh cô jah claih ca bìac to broq tôiq,
xìn paq đòiq ca tôiq lôi aih wèq cwìang au,
èh au ùh hìaq i bìac đang ca trech
wa au hadai jah baxŏng tôiq càn.
14Waiq Chuaq, Ìh joq 'nàng Hmu xèm wa Chuaq Rŏt Dèch Hlài au.
Waiq xìn bàu capoch da au wa manoh hèm haboq da au
jah broq lem manoh Ìh.