ឞ្រាសយេឆូ លាប់តាប៝នយេរូឆាលឹម
(មក ១១:១-១១; លក ១៩:២៨-៤០; យហ ១២:១២-១៩)
1នោកឞ្រាសយេឆូ ហាន់ឞើយមាត៝ត់ប៝នក្វ៝ង់យេរូឆាលឹម លែៈត៝ត់តាប៝នបេតផាឆេ តាយោកតើមអោលីវ ពាង់ដាៈឞារហៃមពោលអ៝សម៝នពាង់ហាន់ល៝រ 2 ពាង់លាស៖ “អ៝ន់ខាន់មៃហាន់តាប៝នឞើសនាប់រី លាប់តាប៝ននៃខាន់មៃមរាឆៃទូមល៝ម់មែឆែសលៀឞូក៝ត់នអ៝ប់មាក៝នពាង់ដ៝ង់។ ខាន់មៃទ្រ៝សតេកលែៈឞារអាគ៝ប់អ្យា។ 3លាសគែសឞូអោបខាន់មៃ ខាន់មៃលាសមាពាង់កើតនអា៖ «កោរាញអុចទ៝ង់ពាង់ទឹងលែៈឞារ» ឞូមរាអ៝ន់ខាន់មៃតេករ៝”។ 4ទឹងលែៈនាវអ្យាគែស គៃមាតឹមទីដាសនាវមពោលឞូនុយ្សនតើយ្សនាវងើយកោរាញឞ្រាសកាល់អែនើសលែៈញចីសលាស៖
5«អ៝ន់មឞើសងក៝ចហ៝ម់មាផូងប៝នលានតាប៝នយេរូឆាលឹម ៖
«ល៝ង់អ្វាញ់អ្យា កាដាច់ខាន់អៃមៃវាច់។
ពាង់មលែសហោងាន់ ញច៝តាកាលើឆែសលៀ
ញច៝តាក៝នឆែសលៀដ៝ង់»»។
6ជេសរីឞារហៃមពោលអ៝សម៝នអីនៃហាន់ជានកើតនាវឞ្រាសយេឆូ ដាៈ។ 7ខាន់ពាង់តេកមែឆែសលៀ នអ៝ប់មាអីក៝នពាង់ ជេសរីនតាៈអាវក្វ៝ង់ខាន់ពាង់នើមតាកាលើលែៈឞារមល៝ម់ឆែសនៃ អ៝ន់ឞ្រាសយេឆូ ញច៝លាប់តាប៝ន។ 8ផូងប៝នលានទុតអ៝ក់ងាន់តាប៝ននៃ ខាន់ពាង់ទ្រ៝សអាវក្វ៝ង់ខាន់ពាង់នើមលាក់តាត្រ៝ង។ ឞូនុយ្សអាបាៈតែនថានឆីឞើសមីរលាក់រ៝ៈត្រ៝ងនៃដ៝ង់។ 9ឞូនុយ្សអ៝ក់ងាន់ឞ្រោៈតឹងឞ្រាសយេឆូ ឞើសនាប់ឞើសកើយ លែវឞាល់នតែរទ្រើវលាស៖
“រានេមាកោរាញឞ្រាសអ៝ន់មាអីក៝នឆៅកាដាច់ដាវីត !
ទាន់កោរាញឞ្រាសអ៝ន់នាវគែសជេងមាពាង់អីកោរាញឞ្រាសទែដាៈវាច់!
រានេមាកោរាញឞ្រាសអីគុកាលើត្រោកទុតព្រេសរី!”
10នោកឞ្រាសយេឆូ លាប់តាប៝នយេរូឆាលឹម ទឹងលែៈឞូនុយ្សតាប៝ននៃគែសនាវនទ្រ៝ត់ទុតហោងាន់ ខាន់ពាង់មោអោសវ៝ត់ អោប៖ “ឞូម៝សពាង់អីនៃ?” 11ផូងឞូនុយ្សអីតឹងឞ្រាសយេឆូ លាស៖ “ពាង់អ្យាយេឆូ ឞូនុយ្សនតើយ្សនាវងើយកោរាញឞ្រាសតាៈឞើសប៝ននាឆារែត ឞ្រីកាលីលេ ”។
ឞ្រាសយេឆូ មព្រើសផូងតាច់ទ្រាប់ឞើសជ៝ង់គូងញីសជានឞ្រាសមាកោរាញឞ្រាស
(មក ១១:១៥-១៩; លក ១៩:៤៥-៤៨; យហ ២:១៣-២២)
12ជេសរីឞ្រាសយេឆូ នទ្រែលមពោលអ៝សម៝នពាង់ហាន់លាប់តាជ៝ង់គូងញីសជានឞ្រាស។ ផូងអីតាច់រាគ៝ល់តានៃពាង់មព្រើសលែៈផ្យៅ។ ពាង់ងក្លឹគ្រែឞូគុរាគ៝ល់ព្រាក់ នអ៝ប់មាគ្រែឞូតាច់ព្លុក។ 13 ឞ្រាសយេឆូ លាសខាន់ពាង់អីនៃ៖ “តានាវកោរាញឞ្រាសងើយលែៈគែសញចីសកើតនអា៖ «កោរាញឞ្រាសលាស៖
«ញីសគ៝ប់ជេងនតុកមាមឞើសឆើមមាគ៝ប់»»
បេងមាខាន់មៃឆ៝ៈជាននតុកគុរាគូមមពោលនតុងច្រាវ”។
14នោកនៃគែសឞូនុយ្សចែសមាត់ នទ្រែលមាឞូនុយ្សក្វែតរាវែនហាន់អាឞ្រាសយេឆូ តាជ៝ង់គូងញីសជានឞ្រាសរី ជេសរីពាង់ជានឞាសទាទេ។ 15យើនមាមពោលកោរាញជានឞ្រាស នទ្រែលមាផូងនើមនតីនាវវៃផូងអីឆ្រាអែល ឆៃឞ្រាសយេឆូ ជាននទើអីនៃលែៈនាវងាន់ ជេសរីតាង់ផូងក៝នឆែនតែរតាជ៝ង់គូងញីសជានឞ្រាសលាស៖ “រានេមាកោរាញឞ្រាសមាអីក៝នឆៅកាដាច់ដាវីត !” ខាន់ពាង់ជីនូយ្សហោងាន់។ 16ខាន់ពាង់អោបឞ្រាសយេឆូ ៖ “មៃតាង់ដ៝ង់នាវផូងក៝នឆែនតែរនៃ?” ឞ្រាសយេឆូ អើស៖ “តាង់ដ៝ង់។ លាសនទ្រីខាន់មៃលែៈអ្វាញ់ដ៝ង់តានាវកោរាញឞ្រាសងើយញចីសកើតនអា៖
«អើកោរាញឞ្រាស មៃលែៈនទ្រាប់អ៝ន់នាវរានេមាមៃនើម
តាមឞូងក៝នឆែ នទ្រែលមាតាអ៝សឞេហោមពូត៝ស»”។
17ជេសរីឞ្រាសយេឆូ នត្លើយខាន់ពាង់គុតានៃ។ ពាង់លោសឞើសនតុកនៃហាន់តាប៝នបេថានី គុតាប៝ននៃទូមាង់។
ឞ្រាសយេឆូ រាតាប់តើមព្លៃរាវី
(មក ១១:១២-១៤, ២០-២៤)
18ត៝ត់អើមអោយ អោយតៃឞ្រាសយេឆូ ព្លឹតៃតាប៝នយេរូឆាលឹម ។ នោកនៃពាង់ជីង៝ត។ 19 ពាង់ឆៃតើមព្លៃរាវី ទូតើមរ៝ៈត្រ៝ង ជេសរីពាង់ហាន់ទាច់តើមព្លៃអីនៃជ៝យព្លៃ យើនមាមោអោសគែសព្លៃ គែសនហាទើម។ ពាង់លាសមាតើមព្លៃអីនៃ៖ “នតើមឞើសនារអ្យា មៃតើមព្លៃអីអ្យាលើយហោមអោសគែសព្លៃ!” ជេសរីទោមានទ្រ៝រ៝តើមរាវី អីនៃ។ 20ត៝ត់មាមពោលអ៝សម៝នឆៃកើតនៃ ខាន់ពាង់នទ្រ៝ត់ហីសរាហ៝ល់ងាន់ ខាន់ពាង់អោប៖ “មើមនទ្រ៝នទាលតើមរាវី អីអ្យាហ្យាស?” 21 ឞ្រាសយេឆូ លាសមាខាន់ពាង់៖ “គ៝ប់លាសនហេលនានេៈងាន់មាខាន់មៃ លាសខាន់មៃលែៈគែសនាវញឆីងន៝ប់មោគែសនាវវិវែៈតានូយ្សនហ៝ម់ មោអោសទើនកើតមាគ៝ប់ជានតើមព្លៃរាវី អ្យាទើមខាន់មៃទើយជាន យើនមាលាសខាន់មៃដាៈយោកអ្យា៖ «ទូហ៝ម់ឞើសនតុកអ្យា អ៝ន់តុបអាទាកវាច់ទាកវារ់រី» ពាង់គែសកើតនៃងាន់រ៝។ 22ម៝សនទើខាន់មៃមឞើសឆើមទាន់កោរាញឞ្រាសមានូយ្សនហ៝ម់គែសនាវញឆីង ខាន់មៃគែសងាន់រ៝”។
នាវទើយឞ្រាសយេឆូ ឞើសតាៈ
(មក ១១:២៧-៣៣; លក ២០:១-៨)
23ជេសរីឞ្រាសយេឆូ លាប់តាជ៝ង់គូងញីសជានឞ្រាសមាកោរាញឞ្រាស។ នោកពាង់នតីឞូ គែសមពោលកោរាញជានឞ្រាស នទ្រែលមាមពោលឞូរាញផូងប៝នលានហាន់អាឞ្រាសយេឆូ អោបពាង់៖ “មឞើសអ៝ន់មាហេនគឹត នទើមៃជានអ្យាឞើសតាៈនាវទើយ? ឞូម៝សអ៝ន់នាវទើយអីនៃមាមៃមេស?” 24 ឞ្រាសយេឆូ អើស៖ “គ៝ប់អោបទូនាវមាខាន់មៃប៝ត់ ល៝ង់ខាន់មៃអើសមាគ៝ប់ដ៝ង់ នទ្រីមើគ៝ប់មរាមឞើសមាខាន់មៃ ឞើសតាៈនាវទើយមានទើអីគ៝ប់ជាន។ 25លាសនទ្រីឞូម៝សដាៈយោហាន-បាប់តែម ជានបាប់តែមយុកមាទាក? តាៈឞើសកោរាញឞ្រាស មោលាសតាៈឞើសឞូនុយ្ស?” ខាន់ពាង់តឹមញច្រាៈអេង៖ “លាសឞ៝ន់លាស៖ «តាៈឞើសកោរាញឞ្រាស» ពាង់មរាលាសឞ៝ន់៖ «លាសនទ្រីមើមទឹងខាន់មៃមោអ្យាត់នាវពាង់?» 26លាសឞ៝ន់អើស៖ «តាៈឞើសឞូនុយ្ស» នទ្រីឞ៝ន់ក្លាចផូងប៝នលានជីនូយ្ស យ៝រមាអ៝ក់ឞូនុយ្សអ្យាត់នាវយោហាន-បាប់តែម កើបពាង់ជេងឞូនុយ្សនតើយ្សនាវងើយកោរាញឞ្រាសរ៝”។ 27ជេសរីខាន់ពាង់អើសមាឞ្រាសយេឆូ ៖ “ហេនមោអោសគឹត!” ឞ្រាសយេឆូ លាសមាខាន់ពាង់៖ “លាសនទ្រីគ៝ប់មោមឞើសអ៝ន់មាខាន់មៃគឹតដ៝ង់ ឞូម៝សអ៝ន់នាវទើយគ៝ប់ជានអ្យា”។
នាវងើយនតឹតមាឞារហៃក៝នឞូក្លោ
28“មើមខាន់មៃវ៝ត់មានាវនតឹតឞារហៃក៝នឞូក្លោ? គែសទូហ្វេឞូក្លោគែសឞារហៃក៝នឞូក្លោ ពាង់លាសមាក៝នឞោកទាក៖ «អើនោ នារអ្យាដាៈមៃហាន់ជានការតាមីរព្លៃយុងយារប៝នរី»។ 29អីក៝នពាង់អើស៖ «គ៝ប់មោអុចហាន់អោស!» យើនមាឞើសកើយនៃពាង់រាគ៝ល់នាវមឹន ជេសរីហាន់តាមីរ។ 30ជេសរីអីឞឹងើយកើតនៃដ៝ង់មាក៝នអាអេង ក៝នអីនៃអើស៖ «អើគ៝ប់ហាន់ឞឹ!» យើនមាពាង់មោហាន់អោស។ 31លាសនទ្រីទឹងលែៈឞារហៃក៝នអីនៃ ឞូម៝សអីអ្យាត់នាវឞឹពាង់?” ខាន់ពាង់អើស៖ “អីនោ”។ ឞ្រាសយេឆូ លាសមាខាន់ពាង់៖ “គ៝ប់លាសនហេលនានេៈងាន់មាខាន់មៃ មពោលក៝ប់ឆ៝ៈព្រាក់ផូងប៝នលានគៃមាអ៝ន់កោរាញម៝ត់អ្វាញ់ នទ្រែលមាឞូអូរវាង់តឹរ ខាន់ពាង់អីនៃលាប់តានាវកោរាញឞ្រាសម៝ត់អ្វាញ់ល៝រឞើសនាប់ខាន់មៃ។ 32យ៝រលាសយោហាន-បាប់តែម លែៈវាច់នតុមនតីនាវគុរេសតឹងនាវកោរាញឞ្រាសអុចមាខាន់មៃ តីសមាខាន់មៃមោអុចអោសអ្យាត់ពាង់។ មពោលក៝ប់ឆ៝ៈព្រាក់ផូងប៝នលានអីនៃ នទ្រែលមាឞូអូរវាង់តឹរអីនៃ ខាន់ពាង់អ្យាត់នាវពាង់។ ល៝ង់ខាន់មៃឞ៝លលាសលែៈឆៃទឹងលែៈនាវអីនៃកាដោយ ខាន់មៃហោមអែមោអុចអោសរាគ៝ល់នូយ្សនហ៝ម់គឹតមឹនមាពាង់ មោអុចញឆីងមាពាង់ដ៝ង់”។
នាវងើយនតឹតមាមពោលម៝ត់អ្វាញ់មីរតើមព្លៃយុងយារប៝ន
(មក ១២:១-១២; លក ២០:៩-១៩)
33“ទាន់អ្យាត់ទូនាវងើយនតឹតអេងជឹត។ គែសទូហ្វេឞូក្លោតាម់ទូលោកមីរតើមព្លៃយុងយារប៝ន។ ពាង់ជានងគារជុមមីរនៃ ជានទូនតុកមាឞូញជ៝តព្លៃអីនៃ នទ្រែលមាជានទូមល៝ម់ច្វាញងកើងដ៝ង់គៃមាញជ្រាង់។ ជេសរីអ៝ន់ឞូម៝ត់មីរអីនៃ ដាៈឞូពាៈព្លៃមាពាង់អាប់នាម់។ ពាង់នើមរីហាន់គុឞ្រីអេង។ 34ត៝ត់ទីខៃទុមព្លៃយុងយារប៝នរី ពាង់ដាៈទឹកពាង់អាបាៈហាន់តឹមម៝ប់មាមពោលម៝ត់មីរអីនៃ គៃមាឆ៝ៈព្លៃអីឞូពាៈនៃ។ 35មពោលម៝ត់មីរអីនៃញុបខាន់ពាង់ អីទូហ្វេមឞាង អីទូហ្វេងខឹតលើយ ជេសរីអីទូហ្វេជឹតនតុបអោឞាល់មាលុ។ 36ជេសរីពាង់ដាៈតៃទឹកពាង់អាអេងជឹតហាន់ អ៝ក់រាលាវទឹកអីឞើសកើយនើស។ យើនមាមពោលម៝ត់មីរលើសខាន់ពាង់កើតទឹកអីឞើសកើយនើសជឹត។ 37កេងមាទុតពាង់ដាៈអីក៝នឞូក្លោពាង់នើមហាន់ឞើសកើយឞូ ពាង់មឹនអេងលាស៖ «ឞូក្លាចយើកមាក៝នគ៝ប់រ៝»។ 38យើនមាត៝ត់មពោលម៝ត់មីរឆៃពាង់ ខាន់ពាង់តឹមលាស៖ «ពាង់អីនៃរ៝នត្រ៝ៈនទើនមីរអីអ្យានារជឹតនាប់តៃ។ ហាន់ឞ៝ន់ងខឹតលើយពាង់អីនៃទោស ឆ៝ៈមីរអីអ្យាមាឞ៝ន់រ៝»។ 39ជេសរីឞូទែញុបអីក៝នពាង់នើមអីតើមមីរនៃ មអារ់អោឞាល់ឞើសទីសមីរអីនៃ ងខឹតលើយអោឞាល់។ 40លាសត៝ត់ពាង់នើមអីតើមមីរហាន់ មើមពាង់ជានមាមពោលម៝ត់មីរអីនៃ?” 41ខាន់ពាង់អើសមាពាង់៖ “ពាង់ងខឹតងក្រីតលើយមពោលអ្យើសអីនៃរ៝ មោអោសគែសរ៝ង ជេសរីជ៝យងខោមអ៝ន់ឞូអេងជឹតម៝ត់មីរពាង់ មពោលអីពាៈព្លៃមាពាង់ត៝ត់ទីខៃពែៈព្លៃ”។ 42 ឞ្រាសយេឆូ លាសមាខាន់ពាង់៖ “នទ្រីខាន់មៃមោគែសរ៝ៈឆ៝ម់បុតនាវកោរាញឞ្រាសងើយលែៈគែសញចីសលាស៖
«ឞូនុយ្សឞ្លាវជានជៃលុឞ្ល៝នលែៈមអារ់លើយទូមល៝ម់លុឞ្ល៝ន
យើនមាលុឞ្ល៝នអីនៃងខើងមាជេងលុទុតន៝ប់ខ្លៃរាលាវឞូមាជានជៃ។
កោរាញឞ្រាសនើមជាននាវអីនៃលែៈនាវងាន់
ឆៃកើតនៃអ៝ន់ឞ៝ន់នទ្រ៝ត់ហីសរាហ៝ល់ហោងាន់»។
43កើតនទ្រីទឹងគ៝ប់លាសមាខាន់មៃ កោរាញឞ្រាសឆ៝ៈលើយនាវពាង់នើមម៝ត់អ្វាញ់តាៈឞើសខាន់មៃអ៝ន់ផូងឞូនុយ្សអេងអីអ៝ន់គែសព្លៃមាពាង់។ 44លាសនទ្រីម៝សនាវឞូនតឹតអ្យា? លុឞ្ល៝នអីនៃជេងនតឹតមាគ៝ប់។ ឞូម៝សអីចោតតាលុឞ្ល៝នអីនៃ ពាង់អីនៃលេករាហ៝ច់រ៝។ ជេសរីលាសលុឞ្ល៝នអីនៃតុបកាលើទូហ្វេឞូនុយ្ស ឞូនុយ្សអីនៃហាច់លែៈផ្យៅ”។ 45នោកមពោលកោរាញជានឞ្រាស នទ្រែលមាផូងផារីឆី តាង់នាវនតឹតកើតនៃ ខាន់ពាង់គឹតលាសឞ្រាសយេឆូ លាសនត្រ៝ង់ជឹតខាន់ពាង់ងាន់រ៝។ 46ខាន់ពាង់អុចញុបឞ្រាសយេឆូ តីសមាខាន់ពាង់ក្លាចមាផូងប៝នលាន យ៝រលាសផូងប៝នលានកើបពាង់ជេងឞូនុយ្សនតើយ្សនាវងើយកោរាញឞ្រាស។