1Susulud, lu mipanggop si timpuʼn makwaan cha alla, chakampun un masapuɏʼn isuɏatmi kan chikayu. 2Ti tilataggammuyu un ha eɏgew un mangulilan Apu Jesus utla pita, ked isun chi umaliyan chi osaʼn man-aakaw si labi un achipun cha tagu maammuwan. 3Lu gumatong chi timpuʼn mangibyeg-an cha tagu un mallin-awacha ya lappun manchalagencha, hachi magalatongan chi machusaancha. Ked isun chi sigeb chi umalak un byebyai. Ked achipuncha malisiyan chi machusaancha.

4Ngim chikayuʼn susulud, lu chumtong chi hachiʼn timpu, achi kayu matataeg un isun cha achipun mamati. Ti chicha, isun chi iinggewcha si manggikbot, ked hachi mataagencha un isun chi mapukaw lu lumlok chi man-aakaw. 5Chitakuʼn mamati, sililawan Apudyus chi somsomok taku ked isun chi padcha willu eɏgew chi iinggewan taku, chakampun un isun chi gikbot willu labi igew taku. 6Ked hachi achipun taku otyan maluɏachen si ugalin cha achipun mamati un isucha lasusuyop, ngim masapuɏʼn lakasagala taku ya tingngeɏon taku long-eg taku. 7Somsomkon taku un labi masuyopan cha tagu ya labi bo mabuukan cha kabubuuk. 8Ngim gapu ta mamati taku isun chi padcha iinggewan taku, masapuɏʼn tingngeɏon taku long-eg taku ya popotpotan taku pammati taku un siya isun chi useɏon takuʼn mansolod. Ked ha man-aayat taku siya isun chi mambyetukung taku si lamlama taku un mataguwan taku ing-inggala. 9Ti ha lanchutukan Apudyus kan chitaku, chakampun un malusaala kan chitaku ngim chilutukan chitaku ta matatagu taku si ing-inggala gapu kan Apu takuʼn Jesu Kristu. 10Latoy si Jesus para kan chitaku ta makwaʼn makatagu taku kan siya, ulay lu langkakatoy taku willu sissiyaʼn matattagu taku si umaliyala. 11Ked ituɏutuɏuyyuʼn man-asisegeg ya man-asituɏung ta kumoscheɏ kayu si allaʼn pammatiyu, un isun chi pin-ayu koon.

12Awed bo pionmiʼn chawaton kan chikayuʼn susulud. Bibiɏu lu potgonyuʼn ustu cha mangkawakawachi kan chikayu. Chicha mangichaychaɏan ya mangibyegbyega kan chikayu mipanggop si pammatiyu kan Apu Jesus. 13Ipailayu mampopotogyu ya ayatyu kan chicha mipagapu si kawachicha. Ya bibiɏu otyan chi mantitimpuyugenyu losan.

14Alla bo cha uchum un ibyegami. Masapuɏʼn tudtuchuwanyu cha mantungatungangaw, segagonyu cha chummauy, tuɏunganyu cha lakapsut, ya ipailayu alusyu kan cha losan. 15Lu awed mangwa si lawwing kan chikayu, achi kayu bumaɏos ngim pasigyu bibiɏuwon cha koonyu kan cha biɏunyu ya cha losan un tagu.

16Pasig kayu otyan lagalas. 17Pasig kayu bo malluwalu. 18Ulay silu makwa kan chikayu, manyaman kayu kan Apudyus ti siya piola kan chikayu un lititimpuyug kan Kristu.

19Achiyu tipochon chi pion chi Ispiritun Apudyus un ibyega kan chikayu. 20Achiyu amsiwon cha ibyegbyegan cha propeta, 21ngim masapuɏʼn paloklokanyu cha losan un litudtuchu taplu ammuwonyu lu tuttuwaʼn lampeɏpu kan Apudyus. Ked suɏutonyu cha bibiɏu 22ya man-awichenyu cha losan un lawwing.

23Chawatonmi kan Apudyus un puun chi lumin-awaan taku, ta ustu-ustuʼn papeɏkasola chikayu. Chawatonmi bo ta ayyuwalala somsomokyu, kalichodwayu ya long-egyu taplu lappun pulus machillawanyu si kasin Jesu Kristu un Apu taku umaliyan. 24Si Apudyus un langayeg kan chikayu, koola cha alla, ti siya ked mantegochen.

25Susulud, iluwaluwanyu yan chikami.

26Pakumustaonyu cha losan un susulud taku utlat ta siya mangipaila un man-asiayat kayu.

27Gapu si kalobbongak un lampeɏpu kan Apu Jesus, ibilinku kan chikayu un ibyasayu allaʼn suɏatku kan cha losan un susulud taku utlat.

28Iluwaluk ta kacheguwan chikayu kan Jesu Kristu un Apu taku.