1-2Ked susulud, awed chi ibyegami kan chikayu. Lagamputyu ilacheɏ cha intudtuchumi kan chikayu mipanggop si mambibiyeg un mampagalas kan Apudyus. Ti ilammuyu imbilinmi mipagapu kan Apu Jesus un langatod si kalobbonganmi un mangibyega. Ked maila un laawatanyuʼn ustu ti siya mit cha pin-ayu koon si sala. Ngim byegbyegaanmi chikayu gapu si kalobbonganmi un illidchon Apu Jesus. Kewayu ta pabiɏubiɏuwonyu cha ugaliyu.

3Ti ha pion Apudyus, mampeɏkas taku si mambibiyeg taku. Ked masapuɏʼn achi kayu makaob-obog si chakampun un asawayu. 4Chikayuʼn leɏaki, masapuɏ boʼn ammuwonyuʼn ustu mangikabyeɏoy si asawayu si mampeɏkas ya bibiɏuʼn kopya. 5Chakampun otyan un cha kilagatkat un pion chi long-egyu mangichaɏan kan chikayu un isun chi kokòon cha taguʼn achipun mangagammu kan Apudyus. 6Ked lu mipanggop si kamatchi, allechenyu ta achi kayu makabyasuɏ kan cha suludyu. Achiyu lukuwon chicha un agumanyu chakampun un uwayu. Imbyegbyegami kan chikayu si sin-eɏgew un chusaon Apudyus cha mangmangwa si kamatchiʼn byasuɏ. 7Ti ha langayagen Apudyus kan chitaku, chakampun un koon taku cha kaisaw ngim umulud taku si mambibiyeg un mampeɏkas. 8Ked cha mallawing kan cha allaʼn tudtuchumi, chakampun un tagu lawingola ngim si Apudyus un langibuun si Ispiritula kan chikayu.

9Ngim lu mipanggop si man-aayatyu si susuludyuʼn mamati, achipun masapuɏ un awed yan isuɏatmi kan chikayu, ti gilamput Apudyus tiludtuchuwan chikayu un man-asiayat kayu. 10Tuttuwa mit un ay-ayatonyu cha losan un susulud takuʼn mamati si losan un iliʼd Macedonia. Ked ibyegami kan chikayuʼn susulud ta pakoskoscheɏonyu man-aayatyu.

11Bibiɏu lu siyad ipapatiyuʼn koon cha lumin-awaan chi mambibiyegyu ya achi kayu bumibiyang kan cha koon cha susuludyu, ya ha koonyu otyan mallagpot kayu un mangkawachi taplu awed mataguwanyu ti hachi imbyegbyegami kan chikayu si sin-eɏgew. 12Ta lu kamatchi ugaliyu, cha taguʼn achipun mamati, potgoncha chikayu ya achipun kayu mangkochekochew si kasapuɏanyu.

13Susulud, awed chi pionmiʼn ipakaammu kan chikayu taplu maaawwatanyu mipanggop kan cha mamati un lagamput langkakatoy taplu achipun kayu patunged manchachauy un isun cha uchum un taguʼn lappun lamlamacha. 14Mamati taku un latoy si Jesus ya kasin latagu, ked hachi gapun chi mamatiyan taku un kasin Apudyus taguwon cha losan un latoy un lamati kan Jesus ked ipaiyawit Apudyus chicha kan Jesus si umaliyala kasin. 15-16Ha allaʼn ibyegbyegami kan chikayu ked ha impakaammun Apu Jesus mipanggop si mangulilala kasin utla pita. Kamatla makwa: Si eɏgew un man-osgen Apu Jesus un mampeɏpuʼd langit, ipakuyla bilinla ya man-ugud chi osaʼn pangat cha angheles ya madngeɏ bo tangguyub Apudyus. Ngim chitakuʼn matattagu si hachiʼn eɏgew, chakampun un umun-ula taku umoy mangabot kan Apu Jesus, ngim umun-ula umuli matagu cha langkakatoy 17ked chitakuʼn mamati un sissiyaʼn matattagu, mitipug taku kan chicha mipangatu un umoy miyabot kan Apu Jesus si libuu. Ked ichagas taku iinggew kan siya si ing-inggala.

18Ked man-asisegeg kayu mipagapu kan cha allayaʼn suɏsuɏu.