Diabolo itamnabi Yesu
(Mk 1.12-13; Lk 4.1-13)
1Wa tuta matutowena Baloma Tobumaboma iviyelu nanola Yesu e ivakouli ilau oviloupakala kidamwa Diabolo bitamnabi matauna. 2E bogwa yam kweluwovasi deli bogi kweluwovasi ipusoposuma, oluvi Yesu ikamolu. 3E totamnabi imakaia iluki matauna, kawala, “Kidamwa yoku Latula Yaubada, kukwaraiwaga dakuna makwaisina bimila kaulasi.”
4Mitaga Yesu ivitakaula, kawala, “Buki Pilabumaboma kala ginigini isisu, ‘Gala kaula wala bimovasi tomota mitaga biga komwaidona avaka bilivala Yaubada.’ ”
5E Diabolo ilau Yesu ilosi Yerusalem, baisa Valu Kwebumaboma, isaili matauna odabala Bwala Kwebumaboma, 6iluki matauna, kawala, “Kidamwa yoku Latula Yaubada, kukokuwa, paila Buki Pilabumaboma kala ginigini isisu,
‘Bikaraiwogi la anelosi paila yoku,
oyumasi bikauwaimsi,
taga biwaiya kaikem dakuna.’ ”
7Yesu iluki matauna, kawala, “Tuvaila Buki Pilabumaboma kala ginigini isisu, ‘Taga bukuwakoli Guyau m Yaubada.’ ”
8Tuvaila Diabolo ilau matauna wa koya saina kwaiveka e ikavitusi baisa matauna valu watanawa kala kabokwaraiwaga komwaidona toyo kasi katububula; 9e iluki matauna, kawala, “Vavagi makwaisina komwaidona basakaim, kidamwa bukukwavagina bukutemmalaigu.”
10E Yesu iluki matauna, kawala, “Setani kula, paila Buki Pilabumaboma kala ginigini isisu, ‘Bukutemmali Guyau m Yaubada e matauna kalamwaleta bukuwotitali.’ ”
11Oluvi Diabolo isilavi matauna, e anelosi imakaiasi ipilasaisi matauna.
Yesu ivitouula la kamatula mapilana Galili
(Mk 1.14-15; Lk 4.14-15)
12Tutala ilagi Yoni leikatupipaisi, Yesu ikaimilavau mapilana Galili; 13igala metoya Nasaredi imakaia mapilana olumata milaveta Galili yagala Kapaneum, itotu oluwalaisi mapilasina valu Sebuloni toyo valu Napitalai; 14kidamwa la biga Aisea tovitoubobuta gala bisala, kawala,
15“Valu Sebuloni toyo valu Napitalai,
okedala lumata, Yoridani mapilana ewaiwa,
Galili si valu matausina gala mina Yudia.
16Tomota isikailisi odudubila,
lumalama sainela leigisaisi.
Lumalama iyuwoula baisa matausina
isikailisi oviluwela kaliga saina dudubila.”
17Tuta matutona Yesu ivitouula ikamituli, kawala, “Kuninavilasi, paila Labuma Karaiwogala bogwa ivakatitaikina.”
Yesu idou bibokulaisi matauna taivasi topoula
(Mk 1.16-20; Lk 5.1-11)
18Iuvayali okawolawala milaveta Galili, igisi matausina kasitaiyu topoula, Saimoni idokaisi Pita sola bodala Anideru, ipwapoulasi obolita. 19E iluki matausina, kawala, “Kubokulaigusi, bavigakaimi kasi topoula tomota.” 20E nanakwa isilavaisi si wota, ibokulaisi matauna.
21Itowada tuvaila, igisi ituwoli kasitaiyu Sebedi litula, Yemesa sola bodala Yoni, isisuaisi wa waga toyo tumasi Sebedi, iyayaimasi si wota. E idou matausina bibokulaisi. 22E nanakwa isilavaisi si waga toyo tumasi, e ibokulaisi matauna.
Yesu iuwotetila baisa saina tobobawa
(Lk 6.17-19)
23E, Yesu ititavina Galili komwaidona, iuvituloki osi bwala tapwaroru, ikikamituli Bulogala Bwaina paila Labuma Karaiwogala, ikatumovi tomota komwaidona kasi lelia toyo kasi katoula. 24E bulogala ikaligiaki Siria komwaidona; imiakaisi matauna tokwatoula komwaidona, kasi lelia tuwoli, kasi mmayuyu tuwoli, matausina isikailasi baloma gaga, matausina tobulomata, toyo matausina totatuva; e Yesu ikatumovi matausina. 25Saina tobobawa ibokulaisi matauna metoyasi mapilasina Galili, Valu Kweluwotala, Yerusalem, Yudia, toyo Yoridani mapilana ewaiwa.