Bulogala Bwaina Makawala MADIU La Ginigini
Kabovitouula
Mapilana Bulogala Bwaina Makawala Madiu La Ginigini, biga baisa bulogala bwaina, paila ililivala kidamwa Yesu matauna Tokwatumova, matauwena Yaubada leikatotila bima. Paila metoya baisa matauna, Yaubada leivigimkulovi avaka ikatotila baisa la tomota mapilana kabutubogwa. E baisa mokwita wala Bulogala Bwaina paila tomota komwaidosi, ikugwa paila matausina Yesu la tomota baisa mina Yudia, deli goli paila komwaidosi mina watanawa.
Mapilana Madiu kala togini saina iyamati la buki katupwaila. Ikugwa igini paila Yesu la kaloubusi, la tuta bapitaiso deli tamnabi, e oluvi igini ammakawala ivitouli la wotetila mapilana Galili; baisa la kamatula, e kasi vakeda tomota deli ammakawala iyomovi tokwatoula. Oluvi igini ammakawala Yesu isilavi Galili ililoula ilokaia Yerusalem. E la ginigini kala vigimkovila baisa Yesu la kaliga deli la movavau.
Mapilana ivitulokaidasi Yesu Tovakeda Toveka, paila isim la karaiwaga bivituloki bimilakatila Yaubada nanola paila tomota, deli iuvituloki paila Labuma Karaiwogala. Vituloki makwaisina paila Labuma Karaiwogala si kabosisu kwailima olopola mapilana buki, e baisa makawala.
1) Yesu la vituloki wa koya. Baisa kasi vituloki tomotala Labuma Karaiwogala, si bubunela, si wotetila, kasi mitakwai deli si pikwaku paila momova kwekanigaga (Uula 5 bila 7).
2) Yesu iuvakadi la toligalega paila si wotetila (Uula 10).
3) Bigavisaiki paila Labuma Karaiwogala (Uula 13).
4) Yesu ivituloki avaka toligalega si wotetila uulela (Uula 18).
5) Yesu ivituloki ammakawala tovana valu kala vigimkovila deli ammakawala Labuma Karaiwogala bima (Uula 24 bila 25).
Buki kala katumimisa
Yesu Keriso tubula liliusi deli la kaloubusi 1.1—2.23
Yoni Tobapitaisi la kamituli 3.1-12
Yesu la bapitaiso deli kala tamnabi 3.13—4.11
Yesu ititavina mapilana Galili 4.12—18.35
Isilavi Galili ililoula ilokaia Yerusalem 19.1—20.34
Wiki Kwebumaboma mapilana Yerusalem 21.1—27.66
Guyau imovavau e ila walakaiwa 28.1-20
Yesu Keriso liliula
(Lk 3.23-38)
1Baisa liliusi tubula Yesu Keriso dalela Debida matauna dalela Eberaam.
2-6aMetoya Eberaam bilokaia Guyau Debida eigini tubula igasi baisa makawala. Eberaam; Aisake; Yekobe; Yuda toyo budala; Peresi toyo Sera, e inasi Tamara; Esironi; Ram; Aminadaba; Nasoni; Salimoni; Bwasa, e inala Raabi; Obedi, e inala Ruti; Yese; e guyau Debida.
6b-11Metoya Debida bilokaia tuta matutona ilauwaisi mina Isireli ilosi Babiloni, eigini tubula igasi baisa makawala. Debida; Solomoni, e inala Uraia kubuyala; Rioboam; Abia; Asa; Yeosepata; Yeoram; Usaia; Yotam; Eyasi; Esekaia; Manasa; Amona; Yosaia; Yekonaia toyo budala.
12-16E bogwa ilauwaisi mina Isireli ilosi Babiloni ilokaia tutala Yesu ikaloubusi, eigini tubula igasi baisa makawala. Yekonaia; Sealitieli; Serubabela; Abiuda; Eliakim; Asori; Sadoki; Akim; Eliuda; Eleasa; Matani; Yekobe; Yosepa, matauna Meri la mwala, e baisa Meri ivilulu Yesu, matauna idokaisi Mesaia.
17Mapaila liliusi komwaidona metoya baisa Eberaam meitobu baisa Debida kala bawa tubwa tubuluwotala tubovasi; e metoya baisa Debida meitobu okala tuta ilauwaisi mina Isireli ilosi Babiloni kala bawa tubwa tubuluwotala tubovasi; e metoya okala tuta ilauwaisi mina Isireli ilosi Babiloni meitobu baisa Mesaia kala bawa tubwa tubuluwotala tubovasi.
La kaloubusi Yesu Keriso
(Lk 2.1-7)
18E, la kaloubusi Yesu Keriso makawala baisa. Tutala inala Meri ipakusi sola Yosepa, igau gala bivaisi kasitaiyu, minana kala lumkola eisuma metoya baisa Baloma Tobumaboma. 19E Yosepa Meri la mwala, tomitukwaibwaila matauna e gala magila biyomsili minana, idoki bikium bipaiki minana; 20ininanamsa makawala, e la anelosi Guyau iyoumatila baisa matauna wa mimi, ikaibiga, kawala, “Yosepa, yoku dalem Debida, taga kukokola bukuvakouli Meri m kwava; paila leisuma minana uula Baloma Tobumaboma. 21E minana bivilulu tau, e bukudoki yagala Yesu, paila bikatumovi la tomota metoya osi mitugaga.”
22Baisa komwaidona ikaloubusi, kidamwa avaka Guyau bogwa ilivala metoya ola tovitoubobuta gala bisala, kawala, 23“Ka, vilakapugula bisuma, biuni tau, e bukudokaisi yagala Emanueli.” (Yagala bitakatumikaisi, “Yaubada deli yakidasi.”)
24E tutala Yosepa imamata, ivagi makawala la anelosi Guyau leiluki matauna; ivaiya minana, 25mitaga gala bisividuli minana igau iunibogwi tau; e Yosepa idoki magudina yagala Yesu.