1Awo oYesu nʼabeegibe, owebabbaire batira okutuuka omu kibuga e Yerusaalemi, era nga baigereire e Bbesufaage nʼe Bbesaniya, ebiri oku lusozi olubeeta oLusozi olwʼeMisaale eMizaituuni, oYesu nʼatuma babiri oku beegibe ati, 2“Mwabe omu kitundu ekyo ekiri omu maiso aawo era owemwabba mwankangira muti, mwabona ompunda omutomuto ogubatatyamangaku ogubasibire awo. Mumuteere era mumuleete. 3Owewabbaawo ababuulya ati, ‘Lwaki mukola ekyo?’ Mwairamu muti, ‘OMusengwa waiswe amwetaaga, era ngʼamalire okumutambuliraku, yalagira ni bamwirya aanu mangu.’ ”

4Batyo ni baaba, ni baajirya ompunda omutomuto ogubasibire oku mulyango, ngʼayemereire e nza oku luguudo, ni bamuteera. 5Abamo oku babbaire beemereire aawo, ni bababuulya bati, “Mukola niki? Lwaki muteera ompunda oyo?” 6Ibo ni babairamu ngʼoYesu oweyabbaire abakobere. Badi ni babaleka baaba.

7Batyo abeegi ni baleetera oYesu ompunda, ni bamwalaku ebizibaawo byabwe okumuwa ekitiisya, era nʼamutyamaku. 8Era abantu bangi ni baala omu nzira ebizwalo byabwe, era abandi ni baalamu bikoola ebibatemere omu misiri.

9Awo ababbaire beekubbembeire, nʼababbaire bazwa e nyuma, ni baaminkirira bati,

11Awo oYesu nʼatuuka omu Yerusaalemi, nʼaingira omu Yeekaalu. Oweyamalire okubityabitya amaiso okubona ebintu byonabyona, nʼawuluka. Nʼayaba aamo nʼabeegibe eikumi na babiri e Bbesaniya, omu kifo egibabbaire baaba okugona olwakubba obwire bwabbaire bwatira okwirugala.

12Oku lunaku olwairireku, oYesu nʼabeegibe owebabbaire bazwa e Bbesaniya, oYesu enzala nʼemuluma. 13Oweyalengeire omusaale omutiini oguliku ebikoola, nʼayaba okubona obanga yagwajaaku ebineneka. Oweyagutuukireku, nandi nʼayajaaku kineneka kadi kimo, okutoolaku ebikoola byonkani olwakubba kyabbaire tiniikyo ekiseera emitiini omu ginenekera. 14Nʼagukoba ati, “Okuzwa atyanu tiwaabbaawo alya oku binenekabyo tete!” Ebibono binu abeegibe ni babiwulira.

15Awo oYesu nʼabeegibe owebatuukire e Yerusaalemi, oYesu nʼaingira omu luuga lwʼeYeekaalu, era nʼatandiika okubbingamu abo ababbaire batundiramu era nʼababbaire baguliramu ebintu. Nʼagangulyaga amamenza gʼabawanyisya empiiya, nʼebityamo ebyʼababbaire batundiramu enjiiwa. 16Era nʼaloberya buli muntu okubitya ebintu omu Yeekaalu.

17Ananyere awo nʼayegesya ababbairewo ati, “Tibakiwandiikire bati, ‘Enyumba yange yaabbanga nyumba abantu bʼamawanga gonagona omu basabiranga?’ Neye inywe mugisuucirye mpuku yʼabanyagi omu beebisa!”*

18Abakabona abakulu nʼabakugu omu byʼaMateeka owebawuliire ebibono ebyo, ni basala amalabuki agʼokujigirica oYesu. Babbaire bamutiire olwakubba ekiziima kyʼabantu kyonakyona kyabbaire kiwuninkiriire olwʼenjegesyaye.

19Obwire owebwairugaire, oYesu nʼabeegibe ni bazwa omu kibuga.

20Eizo waaku amakeezi, oYesu nʼabeegibe owebabbaire babitawo, ni babona omusaale omutiini gudi nga gukalire okuzwera nakimo oku kikolo. 21Awo oPeetero nʼayewukirya, nʼakoba oYesu ati, “Musomesya, obone, omusaale omutiini oguwalaamire gukalire!”

22OYesu nʼabairamu ati, “Mubbe nʼokwikirirya omu Kibbumba. 23Mbakobera amazima nti omuntu owaakoba olusozi lunu ati, ‘Weeginge oyabe weemume omu nyanza, ekyo balikimukolera, kasita nʼatabuusabuusa omu mwoyogwe, neye nʼaikirirya ati ekyakoba kyatuukirira.’* 24Nʼolwekyo mbakoba nti, buli ekimwasabanga oKibbumba, mwikiriryenge muti mukisunire, era mwalikisuna.

25“Era buli owemwirya emyoyo gyanywe eeri oKibbumba, owewabbaawo abba akolere ekibalumirirya inywe, mumusoniye, kaisi oItewaanywe aali omwigulu atire abasoniye nywena ebikole byanywe ebibbibibbi.* [ 26Neye owemutasoniya, era nʼoItewaanywe aali omwigulu tiyalibasoniya ebibbibibbi byanywe].”**

27Olundi oYesu nʼabeegibe ni baira tete e Yerusaalemi. OYesu oweyabbaire atambulira omu Yeekaalu, abakabona abakulu nʼabakugu omu byʼaMateeka, nʼabantu abakulu omwigwanga, ni baaba egyali. 28Ni bamubuulya bati, “Oli na bwezyeki okukola ebintu ebyo ebyokola? Era naani eyakuwaire obwezye obwo?”

29OYesu nʼabairamu ati, “Zena oleke mbabuulye ekibuulyo kimo. Owemwanjiramu, zena nabakobera egintoola obwezye okukola ebintu binu. 30Naani eyatumire oYokaana okubatiza, Kibbumba, ooba bantu? Munjiremu.”

31Awo ni beegeyamu bati, “Singa tumwiramu tuti, Kibbumba niiye eyamutumire ayaba okutubuulya ati, ‘Kaisi lwaki oYokaana iye timwamwikiririiryemu?’ 32Neye singa tumwiramu tuti, ‘Abantu niibo abamutumire’ tutya abantu olwakubba abantu bonabona baikirirya bati oYokaana dala yabbaire naabbi.” 33Kale ni bairamu oYesu bati, “Titumaite.” Awo oYesu yena nʼabakoba ati, “Aale zena tinabakobere obwezye obundinabwo okukola ebintu binu.”