1Enaku mukaaga owegyabitirewo, oYesu nʼayaba nʼoPeetero, nʼabaganda ababiri oYaakobbo nʼoYokaana, nʼabeekubbembera, ni baniina olusozi oluwanvu egibabbaire bonkani.* 2Awo embonekaye nʼecuuka nga babona. Omumaisoge ni munekaaneka ooti isana, era ebizwalobye ni bimirikiinya ooti kitangaala. 3Ananyere awo oMusa nʼEriya ni babeerukira nga batumula nʼoYesu. 4Awo oPeetero nʼakoba oYesu ati, “Musengwa, kisa okubba aanu. Singa ewataka, naluka aanu obusiisira busatu: Akamo kako, akandi ka Musa, nʼakandi kʼEriya.”

5Oweyabbaire ngʼakaali atumula ebyo, ekireri ekimirikiinya ni kiiza, ni kibabbuunaku nʼekiiriirye kyakyo. Era eigono ni lizwera omu kireri ekyo nga likoba liti, “Onu niiye oMwana wange oguntaka eino, era ogunsiima eino, mumuwulisisye.”*

6Era abeegi abo owebawuliire ekyo, ni bagwa nga bakotamirye amaiso ansi okwitakali olwʼokutya ino. 7Neye oYesu nʼayaba egibali, nʼabakwataku, nʼabakoba ati, “Musetuke, timwatya!” 8Awo owebagangamukire, kadi kubonaku omuntu, okutoolaku oYesu yenkani.

9Era owebabbaire baniinuka oku lusozi, oYesu nʼabasisiitira ati, “Ekimuboine timukikoberangaku muntu yenayena paka oMwana wa Muntu ngʼabamalire kumuzuukiza.”

10Awo abeegibe ni bamubuulya bati, “Olwo lwaki abakugu omu byʼaMateeka ga Musa bakoba bati Eriya niiye ateekwa okusooka okwira kaisi oKurisito aize?”*

11OYesu nʼabairamu ati, “Kituuce, Eriya niiye aali nʼokusooka okwira, okwirya emyoyo gyʼabantu obuyaaka. 12Neye mbakobera nti omuntu aali ooti Eriya yaizire ira, neye abantu tibamutegeire, ni bamukola ebintu byonabyona ebibatakire. Era nʼomu ngeri enanyere eyo oMwana wa Muntu yena baaba okumugadya.”*

13Awo abeegi abo ni bategeera bati yabbaire atumula ku Yokaana oMubatizi.

14Awo oYesu nʼabeegibe abasatu owebatuukire awabbaire ekiziima kyʼabantu, omusaiza moiza nʼayaba egiri oYesu nʼamukomera amazwi. 15Era nʼamukoba ati, “Musengwa, okwatire omutaane wange ekisa olwakubba agwa empimbu, era agadira nakimo ino. Emirundi mingi agwa omu musyo, ooba omu maizi. 16Era mmuleetereku egiri abeegibo, neye ni bakaya okumulamya.” 17Awo oYesu nʼairamu ati, “Abantu inywe abʼomulembe gunu ababula okwikirirya era abʼeitalo, nalimala na inywe kiseera kyenkana aina nga mbaguminkiriza?” Awo nʼakoba oiteeye wʼomwisuka ati, “Ondeetere aanu omwisuka nago.” 18Era awo oYesu nʼakaawuukira omuzimu, ni guzwa oku mwisuka nago, era nʼalama omu kaseera ako.

19Oluzwanyuma abeegi ni baaba egiri oYesu bonkani, ni bamubuulya bati, “Olwo lwaki iswe titwezyerye okugumubbingaku?”

20Awo oYesu nʼabairamu ati, “Ekyo kityo olwakubba mudamba okwikirirya okumala. Mbakobera amazima nti singa mubba nʼokwikirirya okutyai ooti kampeke aka kalidaali, mwezya okukoba olusozi lunu muti, ‘Ozwe aanu, oyabe aadi,’ era ni lwaba. Era mpaawo ekyalibakaisya.* [ 21Neye omuzimu ogwʼengeri eyo, tibagubbinga oku muntu anambula kusaba oKibbumba nʼokusiiba].”*

22Lumo oYesu nʼabeegibe owebakumbaaniire omu Galiraaya, yabakobere ati, “OMwana wa Muntu baaba okumulyamu olukwe era bamuweeyo eeri abʼobwezye, 23era balimwita. Neye oluzwanyuma lwʼenaku ibiri, oku lwokusatu yalizuukira.” Awo owebawuliire entumula eyo ni baizula enima omu myoyo gyabwe.

24OYesu nʼabeegibe owebatuukire e Kaperenawumu, abasolooji ba musolo ogwʼeYeekaalu ni baaba egiri oPeetero, ni bamubuulya bati, “OMusomesya waanywe iye tawa omusolo gwʼeYeekaalu?”* 25Nairamu ati, “Awa.”

Oluzwanyuma oPeetero oweyaingiire omu nyumba, oYesu nʼamwesooka okutumula, nʼamukoba ati, “Oseega otya, Simooni? Abakabaka bʼomu kyalo munu, empooza ooba omusolo babitoola ku bantuki? Ku bantu baabwe ababyaliranwa, ooba ku bantu abatali babyaliranwa?”

26Awo oPeetero nʼamwiramu ati, “Ku bantu abatali babyaliranwa.”

OYesu nʼamukoba ati, “Nʼolwekyo abantu baabwe ababyaliranwa tibateekwa okuwa omusolo. 27Neye obutabanyiigisya, oyabe olobe omu nyanza. Onyanyi oguwasooka okupapalya, wamwasamya omunwa, era wayajiryamu ogundusu gwʼefeeza. Wagutwala nʼogubawa, okusasulira nze na iwe omusolo.”