1Jini chan miꞌ tsictisan i ñuclel Dios,

Miꞌ tsictisan i melbal i cꞌʌb.

2Cheꞌ bajcheꞌ muꞌ ti tꞌan jini chan ti jujumpꞌej qꞌuin.

Ti jujumpꞌej acꞌbʌlel miꞌ pʌs i ñatyʌbal Dios.

3Aunque maꞌix chʌ bʌ mi yʌl, maꞌix i tꞌan

Pero miꞌ tsictisan i ñuclel Dios.

4Ti pejtyelel mulawil chʌncol i pujquel majlel chʌ bʌ miꞌ pʌs.

Chʌncol i pujquel majlel chʌ bʌ miꞌ sub cꞌʌlʌ ti junxejlel mulawil.

Dios tiꞌ waꞌchocobe i yajnib qꞌuin yaꞌ ti chan.

5Lajal i cꞌotyajlel cheꞌ mi tsꞌʌyel qꞌuin cheꞌ bajcheꞌ i cꞌotyajlel winic chʌncol bʌ i loqꞌuel majlel ti ñujpuñel.

Chʌꞌʌch i tijicñʌyel qꞌuin yubil cheꞌ bajcheꞌ xꞌalas muꞌ bʌ quej i chaꞌlen wersa bʌ ajñel.

6Mi pasel qꞌuin tiꞌ junxejlel chan,

Mi ñumel cꞌʌlʌ ti yambʌ junxejlel chan.

Maꞌan majch chꞌujbi i putsꞌtyan i ticwʌlel.

7Ñoj tyojʌch i cʌntisa lac Yum.

Miꞌ tyojꞌisʌbeñonla lac pusicꞌal.

Melelʌch i tꞌan lac Yum.

Miꞌ cʌntisan jini machꞌʌ baꞌan miꞌ ñaꞌtyan.

8Tyojʌch i cʌntisa lac Yum. Mi yʌqꞌueñonla cꞌajacña bʌ la coj.

Tsiquil i sujmlel i mandar lac Yum.

Mi yʌqꞌueñonla lac chꞌʌmben i sujmlel.

9Sʌcʌch i tꞌan lac Yum.

Junyajlel tyoj. Mi yajñel ti beleꞌ ora.

10Yom más maꞌ mulan i tꞌan lac Yum bajcheꞌ oro.

Cheꞌ bajcheꞌ más tsaj bajcheꞌ i yaꞌlel chab chꞌʌyʌcña bʌ mi pꞌajtyel.

11Mic tyaj j cʌntisʌntyel ti a tꞌan como a wajtoñelon.

An cabʌl c tyojol yubil tiꞌ jacꞌol a tꞌan.

12¿Majchqui chꞌujbi i cʌn pejtyelel machꞌʌ wen bʌ miꞌ chaꞌlen?

Ñusʌbeñon c mul mach bʌ cʌmbil c chaꞌan.

13Tiqꞌuiyon ame mic chaꞌlen mulil chaꞌan ti tsʌtslel c pusicꞌal.

Mach com c yumin mulil.

Cheꞌ jini tyoj mi quejel cajñel. Machꞌan mi quejel c tyaj c mul tiꞌ tyojlel jini ñuc bʌ a mandar.

14Qꞌuele ti wen jini tꞌan chʌncol bʌ c subeñet.

Yicꞌot jini chʌncol bʌ c pensalin tic pusicꞌal.

C Yum, pꞌʌtyʌlet bʌ xajolel c chaꞌan, caj cotyayajet.