1Itue keupuꞌupuan neng mengeꞌ keyegangan neng lelaki i Noe. Itue mengeꞌ kelelekian neng pinegyegang kede Sem, Ham bekeꞌ Japet pegketbes et liyud.

2Itue mengeꞌ kelelekian neng yegang i Japet: si Gomer, si Magog, si Maday, si Jaban, si Tubal, si Mesek sampay si Tiras. 3Itue gasi mengeꞌ kelelekian neng yegang i Gomer: si Askinas, si Ripat sampay si Togarma. 4Itue mengeꞌ kelelekian neng yegang i Jaban: si Elisa, si Tarsis, si Kitim sampay si Dodanim. 5Teyeg kedye mengeꞌ taaw neng nemenglegdeng et lungsud na abit dagat. Nebagiꞌ dye et kekenyeng lungsud, kekenyeng bebresan, kekenyeng keusbaan, sampay kekenyeng bangsa.

6Itue mengeꞌ kelelekian neng yegang i Ham: si Kus, si Egipto, si Put sampay si Kanaan. 7Itue mengeꞌ kelelekian neng yegang i Kus: si Seba, si Habila, si Sabta, si Raama sampay si Sabteka. Itue gasi mengeꞌ kelelekian neng yegang i Raama: si Seba bekeꞌ si Dedan. 8Tebes, pinegyegang de Kus si Nimrod neng lelaki. Ya megunang taaw neng metaas et dunyaꞌ na nengmilik. 9Ya in sembatung mependey banar neng menugpuꞌ dut pemiriꞌ i Yahweh neng Empuꞌ Banar, angkansa kwan dye tiban, kwan, “Samat si Nimrod neng metaas neng menugpuꞌ dut pemiriꞌ i Yahweh neng Empuꞌ Banar.” 10Tinegnanan ye kenyeng megmilik dut Babilonia, Erek, sampay Akad. Ginsan itueng telu seled et bangsa et Sinar.* 11Teyeg et bangsa et Sinar siminurung si Nimrod dut Asiria bekeꞌ tinegnanan ye mengeꞌ bagung lungsud neng Ninibe, Rehobot-Ir, Kala, 12sampay Resen, ne dut tengaꞌ et Ninibe bekeꞌ Kala, neng kelang kebebenwanan. 13De Egipto gasi pinegyegang dye mengeꞌ tawʼt Ludeo, mengeꞌ Anameo, mengeꞌ Lihabeo bekeꞌ mengeꞌ Naptu, 14mengeꞌ Patruseo gasi, mengeꞌ Kasluheo sampay mengeꞌ Kaptoreo neng mengeꞌ keupuꞌupuan et mengeꞌ tawꞌt Pilesteo.

15Pinegyegang de Kanaan i Sidon neng ukaꞌ. Sumunud gasi si Het. 16Tutusan si Kanaan et mengeꞌ Jebuseo, mengeꞌ Amoreo, mengeꞌ Girgaseo, 17mengeꞌ Hibeo, mengeꞌ Arkeo bekeꞌ mengeꞌ Sineo. 18Maya negang yegang si Kanaan, mengeꞌ Arbadeo, mengeꞌ Simareo sampay mengeꞌ Hamateo.

Pegketbes nemegpekparak ne mengeꞌ keusbaan et mengeꞌ Kananeo, gay bersen, mengeꞌ keupuꞌupuan i Kanaan. 19Indyariꞌ sengkelungsuran et mengeꞌ Kananeo tihad dut Sidon, pesurung dut Gerar seked dut Gasa, surung gasi dut lungsud neng pelibuas dut Sodoma, dut Gomora, dut Adma sampay dut Seboim, seked rayuꞌ et Lasa. 20Itue gasi mengeꞌ kelelekian neng keyegangan i Ham. Nebagiꞌ dye et kekenyeng keusbaan, kekenyeng bebresan, kekenyeng lungsud, sampay kekenyeng bangsa.

21Maya gasi mengeꞌ kelelekian neng keyegangan si Sem neng ukaꞌ i Japet. Na si Sem, ya in tiniyegan et tutusan i Eber. 22Mengeꞌ keyegangan i Sem na si Elam, si Asur, si Arpaksad, si Lud sampay si Aram. 23Itue gasi mengeꞌ keyegangan i Aram: si Us, si Hul, si Geter sampay si Mas. 24Pinegyegang kede Arpaksad si Sela. Amaꞌ si Sela i Eber. 25Pinegyegang kede Eber duwang lelaki. Sembatu si Peleg, gay bersen Bagiꞌ, sabab binagiꞌ et mengeꞌ taaw kekenyeng lungsud dut sengkedunyaan. Ingaran et tipused i Peleg si Joktan. 26Si Joktan gasi amaꞌ i Almodad, i Selep, i Hasarmabet sampay i Jerah, 27i Hadoram, i Usal, i Dikla, 28i Obal, i Abimael, i Seba, 29i Opir, i Habila sampay i Jobab. Ginsan neng itue mengeꞌ kelelekian neng keyegangan i Joktan. 30Pinelegdengan et mengeꞌ keupuꞌupuan i Sem teyeg dut Mesa seked dut Separ na lungsud neng mebudbukid dut tegemihan. 31Itue mengeꞌ kelelekian neng keyegangan i Sem. Nebebagiꞌ dye et kekenyeng keusbaan, kekenyeng bebresan, kekenyeng lungsud, sampay kekenyeng bangsa. 32Angkansa, ginsan neng mengeꞌ ingaran neng sinurat mengeꞌ keupuꞌupuan et kelelekian neng keyegangan i Noe, kuyun et kekenyeng sugsugan dut kekenyeng bangsa. Teyeg et itueng mengeꞌ bangsa nemegpeparak mengeꞌ taaw dut sengkedunyaan pegketbes et liyud.