1Dut sengketegnaan ginuna et Empuꞌ Elohim mengeꞌ langit sampay itueng dunyaꞌ. 2Seneꞌ tiꞌ itueng dunyaꞌ kaya dagbes, bekeꞌ kaya pegbiyag misan enu. Itueng danum nelkepan et dunyaꞌ, nelkepan gasi et kelingban. Indyari itueng Nakem et Empuꞌ Elohim meggeleng eset timbew et danum. 3Sinugid et Empuꞌ Elohim, kwan, “Tumlang.” Indyari megtuy timinlang. 4Nenep Empuꞌ Elohim ganang nebiriꞌ ye menunga telang. Pegketbes pinarak ye telang dut kelingban. 5Itueng telang ngineranan et Empuꞌ eldew. Itueng kelingban ngineranan ye et gebi. Gimimbi bekeꞌ neldew. Atin ne unang eldew.

6Pegketbes sinugid et Empuꞌ Elohim, kwan, “Keilangan eletan dut tengaꞌ et danum apang megparak.” 7Binaal et Empuꞌ eletan neng negpeparak eset danum atuʼt sirib bekeꞌ dut timbew. Angkansa atin ne neinabu. 8Itueng elatan ngineranan et Empuꞌ lelengew. Gimimbi bekeꞌ neldew, atin ne ikeruwang eldew.

9Sinugid et Empuꞌ Elohim, “Megtimung danum atuʼt sirib et langit dut sembatung lelegdengan apang lumbew metuug neng lugtaꞌ.” Angkansa atin ne neinabu. 10Lugtaꞌ ngineranan ye et dunyaꞌ. Kedenuman ngineranan ye gasi et dagat. Nenep Empuꞌ Elohim ganang nebiriꞌ ye menunga. 11Pegketbes, sinugid et Empuꞌ Elohim, “Tuhuan dunyaꞌ et indeginis neng luluwakan neng megulinseg bekeꞌ megbuaꞌ et kekenyeng ginisan.” Angkansa atin ne neinabu. 12Angkansa, timinuhuꞌ indeginis neng luluwaken neng megulinseg pasal et kekenyeng ginisan atuʼt dunyaꞌ. Nebiriꞌ et Empuꞌ kineradya ye menunga. 13Gimimbi bekeꞌ neldew, atin ne iketlung eldew.

14Indyari sugid et Empuꞌ Elohim, kwan, “Sumiluꞌ dut langit apang iparak et eldew bekeꞌ gebi. Indanan dye gasi mengeꞌ tendaꞌ, mengeꞌ timpu, sampay mengeꞌ eldew bekeꞌ teun. 15Tumlang siluꞌ dut langit apang benyaran ye dunyaꞌ.” Angkansa atin ne neinabu. 16Indyari ginuna et Empuꞌ Elohim duwang derekerang siluꞌ. Itueng kelaꞌ banar apang menyar et megsingeldew. Itueng sumengkerit apang menyar et gebi. Ginuna ye gasi mengeꞌ bituen. 17Binetang dye et Empuꞌ Elohim dut langit apang menyar et dunyaꞌ, 18apang memegbeg dye et eldew bekeꞌ gebi, sampay iparak et telang eset kelingban. Nebiriꞌ et Empuꞌ na menunga binwat ye. 19Gimimbi bekeꞌ neldew, atin ne ikeepat neng eldew.

20Sinugid et Empuꞌ Elohim, kwan, “Kumeldam mengeꞌ pebibiyag dut danum bekeꞌ lumpad mengeꞌ begit dut lelengew.” 21Angkansa, ginuna et Empuꞌ Elohim derekerang ginisan et seraꞌ dut dagat, bekeꞌ ginsan neng kekenyeng ginisan neng pebibiyag, bekeꞌ kimineldam dut danum. Ginuna ye gasi mengeꞌ begit kuyun et kekenyeng ginisan. Menunga dut pemiriꞌ et Empuꞌ Elohim. 22Binantug dye et Empuꞌ Elohim, kwan ye, “Megibun kew, kumeldam kew bekeꞌ behanaꞌ myu dagat.” Sinugid ye gasi dut mengeꞌ begit, kwan, “Kumansang kew dut dunyaꞌ.” 23Gimimbi bekeꞌ neldew. Atin ne ikelimang eldew.

24Sinugid et Empuꞌ Elohim, kwan ye, “Megibun bekeꞌ kumeldam mengeꞌ pebibiyag dut dunyaꞌ kuyun et kekenyeng ginisan, mengeꞌ meklag bekeꞌ meguep sampay meglempey.” Angkansa atin ne neinabu. 25Ginuna et Empuꞌ Elohim iba-ibang ginis neng mengeꞌ ayup neng meguep sampay meklag bekeꞌ meglempey. Menunga et pemiriꞌ et Empuꞌ Elohim.

26Sinugid et Empuꞌ Elohim, kwan ye, “Bealen tyu taaw samat dagbes tyu, kuyun et seraba tyu. Kepegbayaꞌ dye et mengeꞌ seraꞌ et dagat, mengeꞌ begit et lelengew, mengeꞌ ayup neng meguep, bekeꞌ ginsan neng pebibiyag et dunyaꞌ, sampay ginsan neng mengeꞌ meglempey atueʼt dunyaꞌ.”

27Angkansa, ginuna et Empuꞌ Elohim taaw samat diri yeng dagbes. Ginuna ye dye samat seraba et Empuꞌ. Ginuna ye dye et lelaki bekeꞌ libun. 28Pegketbes, binantug ye dye, kwan et Empuꞌ Elohim kedye, “Megyegang sampay kumeldam kew. Latap kew apang begbegan sengkelungsuran. Kemyu kepegbayaꞌ dut mengeꞌ seraꞌ et dagat sampay dut mengeꞌ begit et lelengew, bekeꞌ dut ginsan neng mengeꞌ pebibiyag na megpanew et timbew et lugtaꞌ.” 29Sinugid et Empuꞌ Elohim, “Birinaꞌ! Binggeyan ku kemyu et tegsengginis neng luluwaken et dunyaꞌ neng tegulinseg sampay tegsengginis neng puun et kayu neng megbuaꞌ neng tegulinseg apang mekedyaring kekanen myu. 30Indyari eset tegsengginis neng ayup dut lugtaꞌ bekeꞌ tegsengginis neng begit sampay mengeꞌ ayup neng megpanew, gaay bersen, ginsan neng pebibiyag, binggeyan ku et tegsengginis neng luluwaken apang mekaan dye.” Angkansa atin ne neinabu. 31Nebiriꞌ et Empuꞌ Elohim ginsan neng ginuna ye menunga banar. Gimimbi bekeꞌ neldew. Atin ne ikenem neng eldew.