Bibeli Luayãtaalá Yáasiↄ 27

1Ńsu ĩ́anadã zia yã́ musuo,

asa ń dↄ̃ yã́ pↄ́ zia a io.

2To wà n sáaukpa, ńsu ǹ nzĩa sáaukpao.

To à bↄ gbɛ̃pãleↄ lɛ́u, asu bↄ n lɛ́uo.

3Gbɛ gbia, ũfãaá asoɛ,

kási sↄũ ĩadama ì tↄ̃́má dɛ beea.

4Pↄkũma pãsĩ, pↄfɛ̃ ì dańla,

démɛ a nↄ̀sɛgↄ̃a fↄ̃ sↄ̃i?

5Gbɛ̃́ gbaa laai bíla wáa maa

dɛ yea gbɛ̃́zi yãe oaɛ̀ saia.

6Gbɛ̃na yã'ↄ̃ma kpaańzi náai vĩ,

ibɛɛ lɛ́pɛama mↄafili vĩ.

7Gbɛ̃́ pↄ́ kãa ì zazakũ zↄ́waɛ,

ãma nↄandɛna pↄ́ kĩ̀sã dↄ̃o.

8Gbɛ̃́ pↄ́ kɛ̃̀ a uawa àlɛ bɛbɛbɛbɛ

dɛ lán bã pↄ́ sã̀sã a sakpɛwawaɛ.

9Nísi gĩnana ń tulaletio ì ń pↄ kɛ na,

lɛdaakↄ̃wa ń nↄ̀sɛmɛndoo ì gbɛ̃naↄ kɛ na.

10Ńsu ǹ n gbɛ̃na vũaao ge n mae gbɛ̃na.

Tó yã́ n le, ńsu gɛ́ n vĩ̀i ge n dãuna bɛo.

N gbɛ̃́dee pↄ́ kú kãi maa dɛ n bɛ gbɛ̃́ pↄ́ kú zã̀a.

11Ma nɛ́, ǹyↄ̃ ↄ̃nↄ, ma pↄ i kɛma na,

mí e yã́zãsi ma sↄ̃̀sↄ̃naↄwa.

12Laaide ì dↄaa vãi e ↄ̃ ì ulɛɛ̀,

làasoosaide ì gi àↄ gɛ́ ↄ̃ ì yã'e.

13Tó gbɛ̃́ nibↄ fĩa dì a miwa, ǹ aà ula sí,

ǹyↄ̃ kũa tↄ̀ↄma ũ gbɛ̃́pi gɛ̃ɛ ũ.

14Tó n lɛdà ía n samaa'ò n gbɛ̃́deeɛ kↄↄkↄↄ,

wa dilɛ savãi ũɛ.

15Nↄ sòlede muaa

ń í pↄ́ lɛ́ tↄ̃tↄ̃ zɛsai lou zã́oɛ.

16Aà zùukɛaá ĩ́ana zùukɛaɛ,

ade lɛ́ í ↄkũkpaɛ.

17Lá mↄↄ ì kↄ̃ lɛkɛ,

màa gbɛ̃nazĩna ì a gbɛ̃́dee kɛkɛ.

18Tó n laaidↄ̀ lí nɛ'inawa, ńyↄ̃ a nɛ́ ble,

tó n ↄlìa n diizi, a n kpɛla.

19Lá gbɛ̃́ ì a oa e í guu,

màa gbɛ̃́ ì a nↄ̀sɛ dↄ̃ a yãkɛawa.

20Lá gɛↄ lí mↄ́ bɛda ń tɛ́owao,

màa gbɛ̃́ wɛ́ yea pↄ́i lí mↄ́wào.

21Wì ã́nusu ń vuao maa dↄ̃ a baasaa guuɛ,

màa wì gbɛ̃́ bɛɛɛ dↄ̃ aà tↄbↄa guu.

22Baa tó n faasaide kà góu

ńlɛ aà sabo ń pↄ́wɛnao sãnu,

aà faasaikɛ a kɛ̃wào.

23Nìliↄ n pↄtuoↄ kua dↄ̃ maamaa,

laaidↄ n kpàsa pↄ́ↄwa.

24Asa àizɛɛ líↄ ku gↄↄpiio,

mɛ́ gawi líↄ gɛ́ wɛ̃ ń wɛ̃oo.

25Sɛ̃ ì láa, a dafu ì bↄlɛ,

ni a tàaa kpá pↄ́ↄnɛ,

26ni pↄkasa kɛ ń n sãↄ kã́o,

ni bú lú ń n blè ↄ̃ao,

27ń bleↄ vĩ iↄ dinzi n pↄblea ũ,

ni n uadeↄ ń n nↄɛ zĩkɛnaↄ gwaò.

Notes

*27:1 Zaa 4.13-16

†27:6 Luk 22.47-48