Bibeli Luayãtaalá Yáasiↄ 21

1Kía nↄ̀sɛ ku Dii ↄzĩ lán ízɛwaɛ,

gu pↄ́ a yei ↄ̃ ì aà liliu.

2Baade ìↄ e a yãkɛa maaɛ,

ãma Dii mɛ́ ìↄ ń nↄ̀sɛ dↄ̃.

3Maakɛa ń yãkɛa a zɛ́wao

ì ka Diigu dɛ sa'oawàa.

4Zĩasɛa lɛsĩ ń ĩ́andão

ì vãikɛnaↄ duuna bↄ gupuau.

5Ãiade làasoo ì aà ka namawa,

nↄnwãade ì si pↄ́kɛ̃sãmau.

6Àizɛɛ pↄ́ gbɛ̃́ è ɛɛtoa guu

a gɛ̃ ń ĩ́anaoɛ, aàpi i ga.

7Vãikɛnaↄ pãsĩkɛa a táńnↄ,

asa aali we yã́zɛdekɛ̀o.

8Tàaede yãkɛa líↄ dↄ̀ↄ vĩo,

yãesaide yãkɛa ìↄ wásawasaɛ.

9Ia gↄ̃u zã́u maa dɛ

kua kpɛ́u sãnu ń nↄ sòledeola.

10Vãikɛna sↄ̃ ìↄ ku vãiwaɛ,

ìli a gbɛ̃́ wɛ̃nagwao.

11Tó wà ĩadà gbɛ̃́laanikɛnawa, mìsaide ì ↄ̃nↄkũɛ,

tó wà ↄ̃nↄna gbà laai, aà dↄ̃a ì kã́fĩɛ.

12Lua maa, ì vãikɛna bɛ tàasika,

ↄ̃ ì vãikɛnaↄ fuangba taasiu.

13Gbɛ̃́ pↄ́ i swã́kpa wɛ̃nade wiiio,

aàpi a wiilɛ sↄ̃, gbɛ̃e a wewào.

14Gbadaa asii guu ì pↄkũma kpálɛ,

gbagusaɛ sↄlↄa ulau ì pↄfɛ̃ midɛ.

15Yã́gↄ̃gↄ̃a a zɛ́wa ì gbɛ̃maa pↄ kɛ na,

ãma ì iwãa ka vãikɛna pↄaɛ.

16Gbɛ̃́ pↄ́ pã̀alɛ wɛ́kɛ̃a zɛ́ɛ

a ta gyaadeↄ kãaauɛ.

17Gbɛ̃́ pↄ́ ye pↄnakɛai a gↄ̃ pↄ́kɛ̃sãma guuɛ,

gbɛ̃́ pↄ́ ye vɛ̃ɛi ń blɛ nísideo a kɛ ↄde ũo.

18Vãikɛnaↄ mɛ́ gbɛ̃maaↄ awakpabↄ ũ,

wa ĩada náaisaideↄwa nↄ̀sɛpuadeↄ gbɛu.

19Zↄ̃lɛa sɛ̃gbãu maa dɛ

zↄ̃lɛa ń nↄ sòlede kpɛ̃nɛdeola.

20Blɛ maa ń nísio ìↄ kálɛ ↄ̃nↄna bɛ,

ãma sↄũ ì a pↄ́ mↄ́mↄ gↄ̃̀ↄɛ.

21Gbɛ̃́ pↄ́ ì yã́zɛde ń gbɛ̃kɛo wɛɛlɛ

ì wɛ̃ni ń yã́ nao ń bɛɛɛo e.

22Ɔ̃nↄna ì si gↄ̃gbãaↄzi ń wɛ̃́lɛu,

ì gbãa pↄ́ aalɛ a náaikɛ gboo.

23Gbɛ̃́ pↄ́ a lɛ́ fↄ̃̀ à a lɛ́na zùukɛ̀,

ade kɛ́sɛɛkɛ a wɛ̃niɛɛ.

24Gbɛ̃́ pↄ́ wala ń yↄ̃̀ↄo vĩ tↄ́n gbɛ̃́laanikɛna,

ì yãkɛ ń zaza zↄ̃ↄoɛ.

25Màade pↄeã ì aà kpa gai

kɛ́ à ↄkpà a sì yã́i.

26Ìↄ ku pↄnidɛau gↄↄpiiɛ,

gbɛ̃maa sↄ̃ ì gbada, ìli gio.

27Dii ye gbɛ̃vãi a gbagbaa gĩyãio,

atɛ̃sa tó àlɛ sapi o ń mↄafilio.

28Seelade vãi a midɛ,

gbɛ̃́ pↄ́ ì gbɛ̃́ yãma yã́ aↄ ku.

29Gbɛ̃vãi wɛ́ ìↄ pãsĩɛ,

nↄ̀sɛpuade ì wɛ́tɛ a yãkɛai.

30Ɔ̃nↄ ge wɛzɛ̃ ge lɛdama,

an kee a fↄ̃ pã Dii pↄeãlao.

31Wì sↄ̃́ sↄukɛ zĩkaa yã́iɛ,

ãma Dii mɛ́ zĩblea yã́ dↄ̃.