Bibeli Luayãtaalá Abaku 2

Dii yã́zãsia Abakuwa

1Má zɛ ma gudↄ̃akĩi,

má tepɛ bĩ́iwa,

má itɛ̃kɛ mà gwa lá asu omɛɛ,

lá a a tàae pↄ́ málɛ e yã́zãsia.

2Ɔ̃ Dii òmɛɛ à mɛ̀:

Yã́ pↄ́ ń è dalau,

kɛ̃ gbɛ̀ pɛ̀pɛɛwa wásawasa,

kɛ́ kyokɛna e kɛ ń wãao.

3Asa yã́pi gↄↄ dilɛaɛ,

yã́pi lɛ́ a kɛgↄↄ yá, a gí kɛio.

Baa tó a gↄↄ lɛ́ gɛ̃gɛ̃, ǹyↄ̃ dã́,

gↄↄpi a ká, wa sↄ̃òo.

4Gwa! Gbɛ̃́ pↄ́ a nↄ̀sɛ maao a fu,

ãma gbɛ̃́ maa aↄ ku

ma náai pↄ́ àlɛ kɛ yã́i.

5Àizɛɛ náai vĩo,

yↄ̃̀ↄde sↄ̃ líↄ daa doũo.

A asia vĩ lán bɛdawaɛ,

ìli kã́o, a dɛ lán gawa.

Ì buiↄ kãaaazi,

ì bùsu píi gbɛ̃́ↄ kṹkũ zĩ̀zↄↄ ũ.

6Aà yã́ a gↄ̃ ń baadeɛ yãa ũ,

aa aà àlafiikɛ aa aà láanikɛ aa mɛ:

Waiyoo n gbɛ̃́ pↄ́ ni dãↄ pↄ́ kãaa nzĩaɛ,

ni nzĩa dilɛ gbia gbɛ̃́ bↄ́ↄ'imia yã́ musu.

7N fĩadeↄ fɛlɛnnↄ kã́ndoɛ,

aa vu iu, ní gↄ̃ ń lualuao,

ní gↄ̃ ń gbãablema ài ũ.

8Lá bui pↄ́ n ń pↄ́ↄ sìmá yãaↄ dasi,

an kↄ̃naↄ n pↄ́ↄ sima sa sↄ̃ɛ,

asa n gbɛ̃́ↄ dɛ̀dɛ, n bùsuↄ kàalɛ

ń wɛ̃́lɛↄ ń gbɛ̃́ pↄ́ kúuↄ píiɛ.

9Waiyoo n gbɛ̃́ pↄ́ ni n ua kã́fĩ ń ài vãio,

ni n sakpɛpi da musu,

kɛ́ músi su n leo yã́i.

10N lɛkpàaĩ gbɛ̃dɛdɛa dasi yã́i,

ↄ̃ n widà n uawa,

ńyↄ̃ wɛ̃ni kɛ lↄo.

11N kpɛ́ gbɛↄ mɛ́ aa wiidↄma,

a zaↄ i yã́pi zã́simá.

12Waiyoo n gbɛ̃́ pↄ́ ni wɛ̃́lɛ kṹ ń gbɛ̃dɛao,

ni mɛɛwia kálɛ ń dìidiinkɛao.

13Gbɛ̃nazĩnaↄ isimagakpaa gbɛ a gↄ̃ yàa ũɛ,

buiↄ ì ńzĩa kpasa pãɛ.

Dii Zĩgↄ̃de mɛ́ dìlɛ màao lò?

14Asa Dii gawi dↄ̃a a li dṹniaaɛ,

lá í ì dagua ísiaiwa.

15Waiyoo n gbɛ̃́ pↄ́ ni íkaka n gbɛ̃́deeↄnɛ,

ni naɛnaɛmá e ípi gɛ zↄ̃lɛomá,

kɛ́ ǹ e wɛ́tɛ an puizii yã́i.

16Wí mɛ́ a n kṹ, i kɛ gawi no.

Imi, asa wa n puizi e sↄ̃ɛ.

Imibↄ pↄ́ kú Dii ↄzĩ lɛ́ suma,

wí i gↄ̃ n gawi gbɛu.

17Yãpãsĩ pↄ́ ń kɛ̀ Libã a kúlɛmaɛ,

n nↄ̀bↄↄ kaalɛa yã́ a sↄ̃ kɛ̃ngu.

Asa n gbɛ̃́ↄ dɛ̀dɛ, n bùsuↄ ↄ̃̀ↄkpàɛ,

n wɛ̃́lɛↄ ń gbɛ̃́ pↄ́ kúuↄ kàalɛ píi.

18Bↄ́ ài tã́aↄ vĩi? Gbɛ̃nazĩna mɛ́ ã̀.

Bↄ́ ài pↄ́ kásaa pↄ́ aaì ń da ɛɛupiↄ vĩi?

Gbɛ̃́ pↄ́ kɛ̀ ì a pↄkɛa náaikɛ,

ì tã́a pↄ́ lí fↄ̃ yã'òopiↄ kɛ.

19Waiyoo n gbɛ̃́ pↄ́ ni o líɛ

aà yãmama,

ge ni o gbɛ̀ wɛ̃nisaiɛ àↄ ku.

A fↄ̃ dↄaanɛe?

Wà vua ge ã́nusu'i lɛ̀wà,

kási wɛ̃ni ku a guuo.

20Dii ku a bɛ pↄ́ a kua adoau.

Dṹnia gbɛ̃́pii à kɛ kílikili aà aɛ.

Notes

*2:4 Lom 1.17, Gal 3.11, Ɛbɛ 10.38

†2:14 Isa 11.9