Bibeli Luayãtaalá Abaku 1

ABAKU

Yã́ pↄ́ kú láɛ bee guuↄ

Lápi lɛ́ dɛ̃ɛ pↄ́ ãnabi Abaku kà yãpãsĩ gↄↄ bↄↄlɛkɛwɛ̃ɛ. Ì wɛ̃nadↄ̃ gbɛ̃́ↄnɛ, ì vãi pↄ́ aaì kɛↄ bↄnɛ́ gupuau, ì wiilɛ Luawa a yã́ musu, ì pↄnakɛ tó Lua a wabikɛa mà. A lápi kɛ̃̀ e wàↄ gɛ́ Yesu Kilisi ii wɛ̃̀ 700 taawa. Gↄↄ bee Babiloniↄ gbãa lɛ́ kã́fĩ mɛ́ Isailiↄ ku bíli guu ń kua zia yã́ ń ń kua ń Luaoo yã́ musu.

Lua yãwè ãnabiwa, à yã'òɛ̀ aà gↄↄ gbɛ̃́ↄ yã́ musu ń gbɛ̃́ pↄ́ aaↄ ku gↄↄ bee gbɛaↄ lↄ à mɛ̀: À Lua náaikɛ, bee mɛ́ ì to gbɛ̃́ↄ aaↄ ku (2.4). À Lua náaikɛ, i mↄ dↄiálɛ (lɛɛ 3).

Yãpãsĩ gↄↄ gbɛ̃́ↄ laai ì ta Abaku lá yã́wa, kɛ́ aa Lua náaikɛ aai sↄ̃dilɛ. Lua zĩna Pↄlu waasokɛ̀ Yesude káauↄnɛ à mɛ̀ luanaaikɛapi mɛ́ Yesu Kilisi náaikɛa ũ tia (Lom 1.17, Gal 3.11, Ɛbɛ 10.38).

Abaku Lua tàae'ea

1Yã́ pↄ́ ãnabi Abaku èn kɛ:

2Málɛ wiilɛma à gɛ̃̀gɛ̃,

ńlɛ yãmaao, Dii.

Málɛ lɛzunzi yãpãsĩ yã́iɛ,

ńlɛ wá suabao.

3Bↄ́yãi ni to mà vãikɛa ei?

Àkɛa niↄ dàakɛa gwai?

Kaalɛ ń yãpãsĩↄ ku ma aɛ,

sòle ń yãkeleo fɛ̀lɛ.

4Bee yã́i ikoyã gↄ̃̀ plɛ̀gɛlɛgɛ,

wìli zĩkɛ yã́zɛdewao.

Gbɛ̃vãiↄ ì koezↄ̃ gbɛ̃maaↄzi,

ↄ̃ wì yã́zɛde fuangba.

Dii yã́zãsia Abakuwa

5À buiↄ gwa à gwa, yã́ i diwá,

asa málɛ yãkɛ á gↄↄɛ,

tó wa sìuɛ́, á sio.

6À gwa! Málɛ tɛ́kpa Kaladeↄgu.

Bui pãsĩ nↄnwãadepiↄ lɛ́ li dṹniaa píi,

aalɛ zↄ̃lɛkĩi pↄ́ dɛ ń pↄ́ ũoↄ símá.

7Aaì to vĩa ń kṹ,

sↄ̃ ì kɛ̃ gbɛ̃́ↄgu.

Aali ikoyãdao,

aaì ńzĩa sɛ lɛsĩ.

8An sↄ̃́ↄ wãa dɛ gbɛaanaa,

an pãsĩ dɛ àwalɛwan oosiɛlɛa.

An sↄ̃deↄ bↄ̀ bùsu zã̀zãu,

an sↄ̃́ↄ lɛ́ bàalɛ bìooo,

aaì kúu'o su pↄ́ lɛ́i.

9Ampii aaì zɛ ń pãsĩo,

aaì su sãnusãnu lán guwaiwai ĩ́anawa,

aaì zĩ̀zↄↄ naaa lán bùsu'ũfãawa.

10Aaì kíaↄ kɛ pↄ́ↄpↄↄ,

aaì gbãadeↄ yáalↄ,

aaì wɛ̃́lɛ bĩ́ideↄ àlafiikɛ,

aaì bùsu kãaa bĩ́izi aa sí.

11Aaì gɛ̃ gɛ́ aɛ lán ĩ́anawa.

Tàaedeↄnɛ, an gbãa mɛ́ ń lua ũ.

Abaku ɛa Lua tàae'ea

12Dii, ń kú za káaukaauɛ,

ma Lua pↄ́ n kua adoa, wá gao.

Dii, n buipi dìlɛ yã́kpalɛkɛawanↄ yã́iɛ,

ma gbɛsi, n buipi zɛ̀dↄ wá totoa yã́iɛ.

13N kua adoa, n gɛ̃ wɛsia vãilɛa,

ńyↄ̃ fↄ̃ yãvãikɛa gwao.

Bↄ́yãi niↄ bↄnkpɛdeↄ gwa ń wɛ́oi?

Tó gbɛ̃vãiↄ lɛ́ gbɛ̃maaↄ mↄmↄ,

bↄ́yãi niↄ nílɛi?

14N gbɛ̃nazĩna kɛ̀ lán ísia kpↄↄwa,

lán pↄ́ kelena pↄ́ aa kía vĩoↄwa.

15Ibɛɛↄ ì ń kṹ ń kokoao,

aaì ń gá ń bↄ.

Aaì ń kṹ ń sↄo,

aaì ń naaa ń ń táaluo,

ↄ̃ aaì pↄnakɛ, aaìↄ yáalↄ.

16A yã́i tò aaì ɛsɛkɛ táaluwa,

aaì tulaletikatɛa sↄɛ,

asa beeↄ mɛ́ tò aa ku nama guu,

aaì pↄ́ níside ble.

17Aaↄ kpↄ bↄlɛ ń táaluu gↄↄpii yã̀?

Aaↄ buiↄ dɛdɛ ń wɛgwasai láasai yã̀?

Notes