1Yennu kunkɔr nyii wouŋ ni ki pak tur Job, ki yet a:

2A tee ŋmee ki biris n yanfoon po, ki ki mi siar, ŋaan piak mɔbon-yana na? 3Mɔtana, teent siir na jɔɔ na, ki jiin n buboit nba ki n yaa n boia na. 4A din be yoo nba ki n nan durinya na-a? Li-i tee ki a mi fanu, fan betin. 5Ŋma poe senn li yabint nba sii tee biaŋinba? Ŋmee jii ŋmiiuk ki bikin li fɔkinti? A mi buboit na jiinu kuri-i? 6Bee tee jaantarii ki dia tingbouŋ na? Ŋmee fɔkin durinya na fiakiri? 7Li daar sanyafaare ki ŋmaabira lakin ki yin yaŋ, ki malakanba yikin nan kpinkpammuk. 8Ŋmee gɔɔr mɔkgbeŋa na nyun, yoo nba ki li put nyii tinpɔɔr ni na? 9Mine din dɔkin mɔkgbeŋa na nan sanpagbant ki pɔbinir, ki li be bunbɔnn ni. 10Mine dɔk ki bir mɔkgbeŋir kpaar, ki kpar li tammɔkɔɔka, 11ki yetir a, “A tuu saan ki dian nna, ŋaan daa gaar, ki a nyunpana na n tuu dian nna na.” 12Job, faa be a manfoor niwa, a tan ban yet dasiar ki li yenti-i? 13A tan ban yet sanyiɔk ki li yent tingbouŋ na paak, ki nyinn toonbiit damm bi bɔra niwa-a? 14Ki yonnu yentir tingbouŋ na paak nan li kunkona nan baat na ni, ki li nyɔɔn fanu nan liatir paak nyarimu na, ki bia nyɔɔn fanu nan yɔk paak bɔɔni na. 15Daar yentu mantik yeen ki tur toonbiit damm, ki li gɔib, ki bi ji ki fit tuun toonbiiti.

16A ban saan nyuntona nba be mɔkgbeŋir tiŋ po na boori-i? A tan ban somm mɔknyun tiŋ po-o? 17Sɔɔ ban wanna tammɔkɔɔka nba loo kpeentiŋ nba tee bunbɔnn nawa-a? 18A fit bann durinya na yabint nba tee biaŋinbawa-a? A jiin turin gatu, li-i tee ki a mi.

19A mi yentu koo bunbɔnn nba nyi siaminba-a? 20A saa fit wannib biaŋinba ki bi saa saan fɔkit koo ki bia jen namma-a? 21N mi nan a saa fita, kimaan a mantik kpet halii, ki din be yoo nba ki n nan durinya na!

22A tan ban saan ki gɔn diit nba ki n bekii saak nan sakaana nawa-a? 23N bekirire ki guun daamii yoo, nan kunkɔna nan tɔbii yoo. 24A ban saan siaminba ki yonnu nyi nawa-a, koo ki saan siaminba ki yondo po wouŋ da ki nyi nawa-a?

25Ŋmee gbiir bootuk nba ki saak tɔkii li ni ki baa na, ki bia ŋamm sɔnu nba ki satianii tɔkii na? 26Ŋmee te saak baa siaminba nirɔ ki kɔɔ na? 27Ŋmee maant tinkooŋ na nyumi, ki li te mɔɔt kpaatiri? 28Saak koo marin mɔk baa-a? 29Sakaana nan waat naa tee ŋmee? 30Ŋmee te ki nyu wakii nan tana na, yoo nba ki waat baar bonchianni?

31A saa fit taan ŋmaalore ki lakin loribi, koo ki bobit linba dia ŋmaajari-i? 32A saa fit kii ŋmakitir ŋmaajara sakir n tuu sakiri, kii biaki ŋmakitir bob-gbeŋa nan bob-bis na ki bii chari-i?* 33A mi sennu nba dia sanpaaki-i? Ki a saa fit te sennu maŋ n dia tingbouŋ na-a?

34A saa fit te saak n yin sanpagbant ni, ki tan baa-a? 35Ki li-i tee ki a yet sanyikintii a wun nyikint, li kan baar a boor ki beta a, “Timme na.” 36Ŋmee teen nɔɔnii nan korii yanfoomi?

37Ŋmee mantik sub ki saa fit kan sanpagbanti, ki labirir ki bin te saak n baa? 38Saak nae tuu te tant n matik.

39A loon jeet ki teen yanbɔra ki bi di, koo ki fit dint yanbɔrbis na ki bi gbooti 40yoo nba ki bi bɔr be bi tanfiat ni, koo ki dɔɔ bi dindɔɔboa ki guu-u? 41Ŋmee dint kinkaati, yoo nba ki bi lin ki kpaan jeeti, ki tee yoo nba ki bi bonbis mɔ nanin ki loon jeeti?