1Ki Elifas nba nyii Temann doo ni na jiin a: 2Nisɔɔ be-e, halii nan binba mantik tee subindamm nawa, bi sɔɔ be ki mɔk nyɔɔt Yennu boori-i? 3A toonŋana mɔk nyɔɔt Yennu boori, koo faa be niŋantin binbeŋ na mɔk sommir ki teenɔ-ɔ? 4Li ki tee faa mantik waa Yennu na paak kaa, ki u yakii nana, ki bu a buuti. 5Aaii, faa mantik biir na paake; li tee toonbiit nba kur ki a tun na paake. 6Faa saa te ki a ninja n pa likirii ki jiina na, ki a ji gaar u liant ŋaan nyikɔ yann, ki u ki mɔk waa saa lia linba. 7A yêt, ki ki tur binba bak na nyun, ki bia yêt ki ki dinn binba ki kon mɔkib na. 8Ki a jii yiikoo nan paŋ ki fat tiŋ na kur. 9Li ki tee a yêt fan somm pakɔi kuukɔɔ kaa, ŋaan a bia fat kpeebii bona ki ŋmaŋitib. 10Ŋanne teen ki bootit linta, ki a ji gbee nan jaŋmaanii. 11Ki li mantik bɔn, ki a kan fit la, ki nyunmɔnn piina.

12Yennu ki be Yendɔuŋ ni kaawa-a? Ki ŋmaabira na be sanpaapo, ŋaan ki u gorii sikint bi paaki. 13Ŋaan ki i bia lek boi a, “Yennu mi bee? U buu sanpagbant nie, ki tan saa teen nlee ki bu ti buuti?” 14I dukii a sanpagbant na dɔkinɔe, ki u lin somm sanpaapo ki ki laati.

15A loon fan somm sɔnjot nba ki toonbiit damm yɔɔ tɔkii nae-e? 16Nyunmɔnn diibe yiama, ŋaan ki bi yoo daa ki baari. 17Ŋamme tee niib nba yêt Yennu, ŋaan dukii nan u kan fit teenib siar na. 18Yennu nae lek te ki bi mɔkitir. N ji ki fit bann toonbiit damm na dudukit nba tee. 19Niŋamm na kpamme, ki binba ki tuun biit na laa, yoo nba ki bi la toonbiit damm na laat tubdatu. 20Barmɔnii, Yennu biir ti datai nae, ki muu dii biir bi mɔkint a.

21Li paak, Job, maŋit nan Yennu, ki nyik, ki daa nyiirɔ nan u tee a dataake na; li-i tee ki a tun nna, ŋann u saa teen piisin a paaka. 22A gaar u wannu nba ki u teen; ki teen u maan na a par ni. 23Nn, a sikin a mɔŋ ki jen Yennu boor, ki nyinn toonbiit nba kur tuun a ŋaak ni. 24Lubin a salima na, ki lu a salima nba ŋan na kpenkoouŋ na tanbiinii ni. 25Ŋaant ki Yabint Yennu-ii tee a salimmɔna nan salimpeena, kii kpek kii guua. 26Ki a sii yɔɔ tee Yennu yada, ki bia bann nan ŋɔɔe tee a parmaasir nyakir. 27Yoo nba ki a miarɔ, u saa tura gatu, ki a mun sii dia mɔsonn nba ki a lor nanɔ. 28Ki a saa nyann linba kur ki a tuun, ki yentu sii yentir a sɔnu ni. 29Yennu-e sikint karinbaandaanɔ, ŋaan tint sikin-n-mɔŋ daanɔ. 30U saa fat nyinna, li-i tee ki a ki tun kpet, ŋaan tuun linba ŋan.