1Tyryrykane konõto oepyryhtao, jeano tuhãko itamurume,

pyhseky kary se sã mã upuropuru winoino.

2Etatoko ke Ritonõpo omiry poko,

aomiry konomeru sã tũtãko mã ĩtae.

3Nenenehkane aropõko mana nono etyhpyry poe imepỹ etyhpyry pona, emero rokẽ pona roropa kapu zopikoko.

4Moromeĩpo omi konõto osetãko mana, panaikato konõto, konomeru exiry samo;

moro toehse ahtao nenenehãko ro mana.

5Ritonõpo omiry takararahãko mana;

tyjamitunuru ke imehxo exiketõ rĩko mana,

morohne onenetupuhsaromepyra sytatose.

6Aomiry omi poe newe epukãko konopo oepyry samo nono pona,

konopo itamurume jamihme roropa enehpõko mana.

7Moro ke tehme ahno ripõko mana itapyĩkõ tao.

Erohsaromepyra mã toto, zuaro toto ehtohme,

moro tyrise eya.

8Onokyro tõ omõnõko mã toto tosaka xine,

moroto rokẽ tõtonẽse mã toto.

9Tyryrykane konõto oehnõko mana ikurenaeino,

kuenime ehtoh oehnõko inikahpoe ino.

10Pu katoh ke Ritonõpo a tuna akyhnõko mana jerume.

Tuna zumõ tũpore exĩko mana jerume.

11Akurũ tõ atanonohnõko mana konopo maro,

nenenehkane emãko mana kapu zopikoko.

12Ritonõpo omi poe, sapararahme ytõko akurũ tõ mana emero rokẽ ehtoh tonõ pona.

Ritonõpo nyripohpyry ae ro exĩko mana, emero porehme, sero nono pona.

13Konopo enehpõko Ritonõpo mana nono pona, toitoine ahno wãnohtohme,

kypyno xine toehtoh waro kuehtohkõme roropa.

14“Etako pahne, Jo,

osenetupuhko aporo Ritonõpo nyriry kurã poko.

15Zuaro hma otãto nenenehkane tyripõko Ritonõpo nae akurũ tõ saerehkatohme?

16Zuaro hma otãto akurũ tõ tyhwyme exĩko nae kae?

Morohne mã enetupuhtohme tuarohxo Ritonõpo ehtoh poko.

17Omoro axitũ exĩko mase oupõ ao tyryrykane oehpyra ro ahtao isawã maro ikurenae,

18Ritonõpo akorehmary waro mah kapu riry poko esaka, tũpore tyritohme metau samo?

19Yna amorepako kure oturutohme eya, moro poko onenetupuhpyra yna exiryke.

20Ywy oseosezuhpyra ase Ritonõpo maro jenahkaporyino eya.

21“Xixi osenepyra mana tonẽse ahtao akurũ tomo a.

Yrome saereme exĩko ropa mana akurũ tõ tarose ropa ahtao tyryrykane a.

22Inikahpozakoxi saereh ãko mana uuru zemime exikety samo.

Ritonõpo saerehkatoh imehxo ehtoh eneryke eahmary se sytatose.

23Ritonõpo Jamihmehxo Exikety jamihme kuhse

mana, naeroro oehsaromepyra sytatose ipũtokoxi,

zae rokẽ mana, ahno onyryhmara mana.

24Morara exiryke zuno mã toto emero,

yrome oty kara mana tuaro osekaroketõ poko.”