1“Yrome seromaroro ahno poetomehxo exiketõ jeunohnõko mã toto.

Jũkõ toerokurukõ waro pyra toh nexiase.

Akĩme exiketyme toh nexiase.

Toto anaropopyra jexihpyryme kaikuxi tõ maro jeky tõ kaneru tõ pynanohtohme.

2Tupunatãse exiketomo,

jamihme pyra mã toto, erohsaromepyra exiketomo.

3Torẽse aehtyamo,

tomitapãse tuhke toexirykõke, toetuarimase toto.

Tykohmãse ahtao ahno esaka pyra ytõko mã toto otyro mity enahse, takyhse exiketomo.

4Otyro ary apoĩko mã toto, wewe pihpyry roropa,

imity tõ enahnõko repe, tonahsẽme pyra aexityamo.

5Taropose toh nexiase ahno a, ikohtary ke omato tõ aropory samo.

6Eutary ao tõsesarise toh nexiase, eutary tahkase ahtao eya xine ypy tõ pokona.

7Itu htao kui tykase toto onokyro tõ samo,

itu zopikoxi toytose toto oximõme.

8Popyra exiketomo, tosehke pyra, tynonory poe taropose toto.

9“Yrome seromaroro jeunohnõko ipoenõ mã toto toremiarykõ ke.

Inypoihtorykõme rokẽ ase.

10Nuriame rokẽ ase eya xine.

Ameke rokẽ exĩko mã toto ywino.

Oehnõko mã toto ituh kase jẽmyty pona.

11Tyjamihkehse jexiryke Ritonõpo a,

takorehmaneke pyra tyripose roropa jexiryke eya

itamurumehxo yzehnotokõ yyryhmãko toto.

12Mokaro, popyra exiketõ, osetapase oehnõko mã toto,

tururume jaropõko mã toto.

Jenahkary kuhnõko mã toto.

13Epasaromepyra ase mokaro poeino,

jenahkary kuhnõko mã toto.

Takorehmaneke pyra ase ipunaka mokaro poremãkatohme.

14Japurũ tõ tahkatopõpyry ae omõnõko mã toto.

Patãpo rãnao pohkane konõto sã osemãko mã toto ypona.

15Tonaroxitapãse ywy.

Ime jehtopõpyry tonahse, tarose sã tyryrykane a. Tymõkomoke jehtopõpyry tonahse akuru ehtopõpyry samo.

16“Seromaroro typenekehse ywy isene ro jehtoh poko;

sam katoh a typoremãkase ywy.

17Koko ahtao yzehpyry jetũ mã ipunaka.

Jetũ jehtoh enahpỹme mana.

18Jesenary tapoise Ritonõpo a jamihme samo,

jupõ anãnonohpopyra nexiase.

19Ikurepato htaka tomase ywy eya.

Typahsẽme sã rokẽ ase, nono sã rokene, oruno sã roropa.

20“Ritonõpo, kohtãko ase oya, jakorehmatohme,

yrome jezuhpyra mase.

Oturũko ase oya, yrome onetara mase.

21Yyryhmaneme toehse mase, ajamitunuru ke

yrohmanohpõko mase.

22Tyryrykane konõto ke jaropõko mase,

tyryrykane jamihme exikety ke jemajemãko mase mya, xiaro ropa.

23Jarõko mase aorihtyã esaka, zuaro ase.

Morotona isene exiketõ ytõko mã toto emero porehme.

24Oty katohme orutuame aexihpyry maro osetapãko mah?

Atakorehmasaromepyra mana ipunaka.

‘Ypyno exiko,’ ãko rokẽ mana.

25Otarame xitara exiase imehnõ etuarimaketõ maro?

Otarame tytineruke pyra exiketõ pyno nymyry pyra exiahse?

26Tãkye jehtoh eraximãko exiase,

yrome popyra ehtoh toehse;

saerehkatoh eraximãko roropa exiase,

yrome xinukutume sã toehse.

27“Torẽtyke ase jetuhxo jexiryke,

oseremasaromepyra ase;

kokoro rokẽ etuarimãko ase.

28Jytoryhtao emynyhmãko ase,

ẽmepyry xinukutume sã toehse,

xixi saerehkaryke pyra;

ahno rãnao owõnõko ase ajohpãme sã jakorehmapotohme.

29Jomiry pusuhkatoh emynyhmakety sã mana,

toiroro exikety samo, kaikuximo omiry samo, awexituruze omiry sã roropa.

30Ypihpyry xinukutume exĩko mana,

joko axitũ exĩko mana oxirohnõko.

31Torẽnase exiase eremiatoh tãkye etary poko, rue tõ maro, rira tõ roropa.

Yrome seromaroro ihnamory rokẽ etãko ywy,

ahno xitãko rokẽ rahkene.