1Xa betsi to kia, lebi'i nuná raka xxattati gele lhe re xxatta lasia iláti le lhe. Lebi'i nuná ankale elha gwedeaka lasi kia, lhe ankale nu runi ki ra xxeni lasia lhe. Rulisaa le, tsitsi gwaltse'e de chi babale len Tata Xisiha.

2Evodia‑na lhe Síntique‑na lhe, rinnabaa lenkana ese'e tse len luesikani, lhe ttúba ulaba lekani de chi babakana len Tata Xisiha. 3Anágaba lu xa Sísigo benne abittuba rudhanlu neti, rinnabaa lenlu aka lenlu ka nuila‑na kini ese'e tsekana, kumu lakana lenkana Clemente‑na lhe adíru ka benne ribenke len neti, lake nuná begu'elha leke ki ugwadhi ka tisa ge Cristuha. Ka benne‑na nuná chi dia láke lo yetsi ata dia lá ka benne aka benke ttu dia lii yebáha.

4Satía gwaludú itta lele de chi babale len Tata Xisiha. Rulisaa le attu libe: gwalodú itta lele, 5lhe gwaluni kini iyá ka benne ilákanie deki lebi'i ankale benne re tse lele. Tata Xisiha chi tteba dabigana esie.

6Abittu uchacha ikile ge ttu bixa. Nu uinlale, gwalutso dula iyá nu ruchacha ikile geni arlo Tata Do Yebáha, gwalinnaba lenie lhe gwalugwe bie ixkixaru lhe. 7Aníha nna Tata Do Yebáha unie kini tse'ele xen su lasi. Ganna chi bese'ebie le xen su lasi, la'ania nna chi edú tse lele lhe ulaba tse lele de babale len Jesucristuha. Ri'i labí rite denri'i gasina ruin Tata Do Yebáha ki rise'eri'i xen su lasi.

8Nnanna xa betsi to, gwaludo ikile ge iyá nu anka gwalí, lhe ge iyá nu dika tsia le ka benne geni lhe. Gwaludo ikile gwaluni iyá nu dika ixú, lhe iyá nu abittu anka satsa arlo Tata Do Yebáha lhe. Gwaludo ikile gwaluni iyá nu dika tsu'u le ka benne, lhe iyá nu dika ebanani ka benne geni lhe. Ge iyá nu anka tse, lhe ge iyá nu dika inne tse ka benne geni lhe, ge iyá nuná gwaludo ikile gwaluni.

9Gwaluni iyá nu chi bedhetinia le lhe iyá nu chi bodha'anaa uinle lhe. Anágaba gwaluingaba iyá nu chi biyieninle xpeya le lhe iyá nu chi bilenle runia lhe. Nuní gwaltse'e gwaluni nna Tata Do Yebaa benne runie ki rise'eri'i xen su lasiha, benneha gwadúbe len lebi'i.

10Yalhá itta bedú lasia rugwea Tata Xisiha ixkixaru, kumu de nnannaliba bedulole ruchacha ikile kia attu libe. Neti yubaa gwa ruchachaba ikile kia, deba nna labí chi upale lo neda ki idhelhale nu riyasati. 11Bittu akinle rinnea aní de riyasati. ¡Ko'o! Neti chiba detia gwa raka xenruba lasia ttixaruba tee kia. 12Chiba yu neti ttixa anka elha dii lhe chiba yu neti tti tee tama lhe. Ge iyába deti neti ttixaba ratea: sila yiela súti lhe sila rattia ubina lhe, sila tee tama kia lhe sila riyasa kia lhe. 13Lo iyába nu ratea, gwa ridaabaa ridúa loni de babaa len Cristuha. Benneha rudú tsitsie neti. 14Laa kiga de nuha nna lebi'i tseba benle udhelhale kia ki bodilále neti lo nu ratea.

15Lebi'i gwa yúgabale xa benne ge Filipos, tti sisi'a tte utea utixxi'ania le ka tisa ge Cristuha nna tti bedáya ata se'ele‑na, delába daka Macedonia‑na, niruba ttu dhi ka benne ria leke Jesús‑ni a boteke ttu latti nu edenia ge neda kia de utixxi'ania ke ka tisa geeha. Sunruba lebi'i gwa udhelhale kia la'ania. 16Axtala tti rea lhe'esi Tesalónica‑na gwa udhelharugabale attu chupa libe to kia kini bixúti. 17Laa rinnegaa aní de rakaru lasia utele nu riyasati. Nu rakala lasia, lebi'i gattaru elha tse gele arlo Tata Do Yebáha. 18Nnanna yalhá ttela chi uxía, tee tamala kia. Len nu udhelhale che Epafrodito‑ni rexxa tama kia. Nu udhelhale‑ni ankana attiba ttu úna rure ixixxi ru'u le Tata Do Yebáha lhe rulabie na tti risinna arloe. 19Tata Do Yebaa kiaha xxeni anka elha tse ge benneha tee. Gutebe len lebi'i iyá nu riyasinle de babale len Jesucristuha. 20Tata Do Yebaa benne anke Xxudiri'iha, benneha inná xxeni lebie ttu dia lii. Amén.

21Gwalugwe ttu padiuxi kia iyá tte ka benne se'e naa, delába ka benne chi ankake ge Tata Do Yebáha de babake len Jesucristuha. Ka betsi to geri'i se'e len neti nii, ridhelhake ttu padiuxi gele. 22Anágaba iyába ka benne chi ankake ge Tata Do Yebáha se'e lhe'esi‑ni, ridhelhagabake ttu padiuxi gele, lenke ka benne riben lhe'e yo'o ge César nu rinnabia xeniha. Ka benne‑ni nuní ka benne ridhelharuke ttu padiuxi gele.

23Jesucristu benne anke Xxanari'iha edá lebie aka lenie le. Amén.