1Lanin’ug, mpining e sorok ngak SOMOL!
A SOMOL ni Got rog, rib sorom!
Fanam rir nge fanam maluplup’ e kemang mad rom;
2ma kam par u fithik’ e tamilang.
Kam filath lanelang ni gowa ba tent,
3ma kam tay e naun rom nga daken e ran u lang.
Pi manileng e ke mang chariot rom,
ma ga be yan u daken pon e nifeng.
4Nifeng e ke mang pi tamol’og rom,
ma uluch e ke mang tapigpig rom.
5Fayleng e kam tay nga daken e def riy nri be par nib mudugil,
ni dabiyag ni nge mithmith.
6Ka mu tay e pi ran nga daken ni bod ba wuru’ e mad,
ma ran e ke tharey e pi burey.
7Nap’an ni mu puwan’ ngak me mil;
nap’an nrung’aged ni ka mu tolulnag e tin ngan rin’, me chuw nge yan nib machreg.
8Me lul’ u daken e pi burey nga but’ ngalan e pi loway,
ko gin kam tay tagil’ riy.
9Ka mu tay ba mathil ni dabiyag ni nge th’ab nga wuru’,
ya nge par ni dabki tharey e fayleng bayay.
10Ga be gagiyegnag e pi alublub ngi i yan e ran riy u lan e yu pa’ i loway,
ma pi lul’ be yan u thilin e pi burey.
11Be pi’ fapi alublub e ran ni nge unum e pi gamanman ni malboch;
be chuw e belel rok e pi dongki ni malboch.
12Ma yu ke gek’iy nib chugur ko pi ran nem
e ke toy e pi arche’ taferad nga l’ugun yad be tang.
13Ga be pi’ e n’uw u lanelang be yib nga daken e pi burey,
ma fayleng e ke sug ko pi tow’ath rom.
14Ka mu tugulnag e pan ni fan ko garbaw,
nge woldug ni fan ko girdi’,
ya nge yag ni gu yunged e woldug romad,
15nge yib e wayin riy ni nge felfelan’ nagmad,
nge gepgep ni olive ni nggu felan’gad ngay,
nge flowa ni nge pi’ gelnginmad.
16Pi gek’iy ni cedar nu Lebanon e bo’or e n’uw ni be aw ngay,
ni SOMOL e gek’iy rok, me ir e yung.
17Ireram e gin be toy e arche’ taferad riy;
arche’ ni stork e ka ra toyed taferad u ran’ e gek’iy ni fir.
18Kaming ni malboch e yad be par u daken e pi burey nib tolang,
ma gamanman ni badger e yad be mith u taban e yungi war nib tolang.
19Mu sunumeg e pul ni nge turguy e yu pul;
ma yal’ e manang e ngiyal’ ni nge ling.
20Gur e mu sunumeg e nep’, ma ra nep’
me yib urngin e gamanman ni malboch nga tamilang.
21Pifak e layon e ra yad be fita’ ma be mada’ lungrad ngalang,
ni yad be changarnag e ggan nma pi’ Got.
22Ma nap’an nra m’ug e yal’ miyad sul
ngranod ra pagedrad nga but’ u taferad.
23Girdi’ e yad ma yan ko maruwel
ngar marwelgad nge blayal’.
24 SOMOL, ri ba pire’ ban’en ni ka mu sunumiy!
Ri gab gonop nga rogon ni mu sunumiy ni gubin!
Ke sug e fayleng nga urngin e tin ka mu sunumiy!
25Ma bay e day nib ga’ nib ga’,
ni tin be par u fithik’ e dabiyag i the’eg,
nta’reb rogon e tin ba ga’ nge tin ba’achig;
26be milekag e barkow u langgin, ma Leviathan e be fafel u langgin,
ni fare kokow nu maday ni gur e mu sunumeg.
27Gubin e pin’em ni gur e yad be taga’ ngom,
ni ngam pi’ garad ko ngiyal’ nike t’uf rorad.
28I gur e ga be pi’ ngorad yad be kay;
gur e ga be pi’ e ggan ngorad, ka ra fosgad ngay.
29Nap’an ni ga ra pi’ keru’um ngorad, miyad rus;
ma nap’an ni ga ra chuweg e pogofan rom rorad, miyad yim’,
miyad sul ko but’ ni ir e ra sumgad riy.
30Ma nap’an ni ga ra pi’ e pogofan ngorad, miyad fos;
gur e ga be pi’ e yafos ni be’ech nga fayleng.
31I SOMOL e bay i par nib gilgilbuguwan ni dariy n’umngin nap’an!
I SOMOL e bay i par nib felfelan’ ko n’en nike ngongliy!
32Ra sap ko fayleng, me durru’ e fayleng;
ma ra math ko pi burey, me waer e ath riy.
33Bay ug tangnag SOMOL u n’umngin nap’an e yafos rog;
n’umngin e yafos rog ni bay u gu tangnag e sorok ngak e Got rog.
34Manga yigi fel’ u wan’ e tang rog,
ya ir e ke felfelan’ nigeg.
35Mang e yugun nthang mit urngin e pi tadenen nu fayleng;
mang e math mit e pi’in kireb!
Lanin’ug, mu pining e sorok ngak SOMOL!
Mu pining e sorok ngak SOMOL!