1Logakolile mazuwa mado, Yesu nakahiluka Kapanaumu wanhu nawahulika kota kahiluka hakaye. 2Wanhu wenji nawoya wamema mluga nakwali hela honhu ha kukola kuluta hali lwizi. Yesu yali yodamla usenga wa heye, 3mhela wanhu wane naweza, wamigale munhu yumwe kwa Yesu yaziliche. 4Ila kwa vila wanhu wali wenji, nawalemwela kumgala behi na Yesu. Ahyo, nawatubula kuchanya kuchindwiko honhu hoyawele Yesu. Lowatubule honhu, wamdulisa ayo munhu yawele yawasile mumcheka. 5Yesu loyawene vyowawele na makundo, kamlonjela ayo munhu yaziliche. “Mwanangu, kusilwa gehile gouditile.”

6Wamwenga wa walangusa wa malajizo ga Musa, nawawele ahala honhu, nawenjila majesa mnhumbula mwawo, 7Munhu ayu “Ndo choni kangulonga hino? Kangumkovula Nguluwi! Kuduhu munhu yawele na ludali lwa kumusila munhu gehile, ila Nguluwi yaliyeka.” 8Yesu nakavizela gala gowali wochijesa, kawalonjela, “Lekachoni mwangijesa ahyo mnhumbula za hemwe? 9Lilikohi liwele ubewe, kumlonjela ayu munhu yaziliche, ‘Kusilwa gehile ga hegwe,’ Au kumlonjela, ‘Winuche! Uhole mcheka ujende?’ 10Lelo, ndangugana mvizele kota heni Mwana wa Munhu ndina ludali lwa kuwosela wanhu gehile muisi.” Aho kamlonjela yula munhu yaziliche, 11“Ndangukulonjela wime, uhole mcheka wako ulute kaye.” 12Baho, wanhu weng'ha wawele womlola, ayo mtamwa kenuka, kahola mcheka wa heye kaluta kaye. Wanhu weng'ha nawabubuwala na kumtogola Nguluwi kuno wolonga, “Hatunayona mbuli kota ayi.”

13Yesu nakahiluka kahi hafungo mwa ilamba lya Galilaya. Lung'hongola lwa wanhu nalumlutila, na heye kaluka kuwalangusa. 14Loyali yokola, kamona Lawi mwanage Alufayo, yekalise mchituka cha kodi, Yesu nakamlonjela, “Umbinze!” Lawi kenuka, kamuwinza.

15Hamba, Yesu yali yolya chilyo mng'handa ya Lawi, wakongoza kodi weng'ha na awala wawele na gehile, waliwolya hamwe na Yesu na walanguswa wa heye, nawali wenji wamuwinzile Yesu. 16Walangusa wa malajizo ga Musa wala nawawele Mafalisayo, lowamuwene Yesu yolya na wanhu wawele na gehile na wakongoza kodi, wawauza walanguswa wa heye, walonga, “Lekachoni kangulya na wadita gehile?” 17Yesu vyoyawahuliche kawalonjela, “Wanhu wawele wakomu hawalingumlapa mteleka mikwandi, ila wawele watamwa. Suyile kuwachema wanhu wala watanganiche, ila mbuya kwa wanhu wawele na gehile.”

18Mhela umwe walanguswa wa Yohani na walanguswa wa Mafalisayo wali wokwesela kulya. Wanhu woya, wamuuza Yesu, “Lekachoni walanguswa wa Yohani na wa Mafalisayo wali wokwesela kulya, ila walanguswa wa hegwe hambe wesele kulya?” 19Yesu nakawedichila, “Yalalikwe kuli mnvina ya kuhesa, kokwesela kulya ndaze wone yawe hamwe na mkasano yalihela chilyo? Ndita hebu! Mhela weng'ha yowa hamwe na mkasano hokwesela kulya hebu. 20Mhela wokwiza hala mkasano hoyokusigwa kuli hewo, mhela awo ndo wokwesela kulya.

21“Haduhu munhu yoweza kuhona chibende chinyale kuli nguwo ya katali. Wone yadite ahyo, achila chibende chinyale choswina kulawa kuli yila nguwo ya katali, ileka ugazi ukulu. 22Munhu hambe yajele divai ya lehano kuli chizombe cha igozi cha katali, wone udite ahyo divai aila yotula achila chizombe cha igozi cha katali, divai na chizombe cha igozi chila vyotajigwa. Iwaga hino, uwiche divai mli chizombe cha igozi chinyale?”

23Yali zuwa lya kwesela Yesu yali yokola mu migunda ja wanhu jiwele na ngano iwhanile na uhemba na walanguswa wa heye wopulula miso wolya. 24Mafalisayo walonga, “Ulole, walanguswa wa hegwe wanguwifya wangudita chohachikundigwe kudita zuwa lya kwesela?” 25Yesu kawalonjela, “Hambi hamsomile Daudi na wayage vyonawaditile mhela lowali na nzala nachowaditile? 26Heye na kenjila mng'handa ya Nguluwi, kalya jila mibumunda jiwichigwe kumwando kwa Nguluwi. Mbuli ayi naikoleka mhela Abisali naloyali mtambika mkulu. Na ndo watambika waliyeng'ha nawakundizwe kulya mibumunda ajo. Ila Daudi nakajilya nakahi nakawapa wayage.” 27Hamba Yesu kawalonjela, “Zuwa lya kwesela naiwichigwa kwa wanhu, haiwele wanhu kwa zuwa lya kwesela. 28Ahyo Mwana wa Munhu ndo Mkulu wa zuwa lya kwesela na kana ludali lwa ayo zuwa lya kwesela.”