1Munhu yumwe yali yochemigwa Lazalo yali mtamwa. Munhu ayo yali yochikala hali muji wa Besania. Muji awo ndo kwali hakaye ha Maliya na lumbulye Malita. 2Maliya ayu ndo yuyula yambakaze Mkulu Yesu mafuta ga kubakaliza na kubagusa kwa mnvili za heye. Lelo Lazalo, lumbulye ndo yali yotamika. 3Awala wadala wahilika usenga kwa Yesu walonga, “Mkulu, mkulugwe ulingumgana Lazalo kangutamika.”

4Yesu vyoyahuliche ago, nakalonga, “Utamwa awu haumkopola hebu Lazalo, ila ni kwa mbuli ya ukulu wa Nguluwi. Lazalo kotamika leka kwa kukolela ayo Mwana wa Nguluwi yapegwe ukulu.”

5Yesu nakamgana heko Malita na lumbulye na mkulu wawo Lazalo. 6Vyoyahuliche kota Lazalo mtamwa, kekala bahala hoyawele mazuwa gayage meli.

7Hamba nakawalonjela walanguswa wa heye, “Tucheni tuhiluche Yudeya.”

8Walanguswa nawamwidichila, “Mlangusa, kusemwa mhela udo hela Wayahudi vyowali wogana kukusubula na maganga, kahi kwangugana uhiluche kuko?”

9Yesu nakawalonjela, “Zuwa limwe lina saa kumi na meli, si ndo vyoili? Lelo heye yojenda kuzelu hochikwang'wala hebu, kwavila kanguwona uzelu. 10Ila wone munhu yojenda nechilo, kochikwang'hbwala, kwa vila kahela lumuli mgati mwa heye.” 11Yesu nakalonga ago na konjezela, “Mganwa wa hetwe Lazalo kawasa, heni ndoluta ndikamwinule.”

12Walanguswa nawedichila, “Mkulu, wone yawasile kowa mkomu.”

13Yesu yali yolonga mbuli ya kubagama kwa Lazalo, ila walanguswa hewo nawavizela kota Lazalo kawasa hela. 14Hamba Yesu nakawatubulila kalonga, “Lazalo kabagama. 15Ndangusangalala kwavila nasali ako ila mkunde. Lelo tucheni koyali.”

16Tomasi yali yochemigwa mnyambili kawalonjela walanguswa wayage kalonga, “Tucheni na hetwe tukabagame hamawe na heye.”

17Yesu vyoyafichile, nakafika wamtilile Lazalo katali mazuwa gane nagakola. 18Besania kwali kutali kwa kota maili zidatu hino kulawa Yelusalemu. 19Wayahudi wenji nawoya kuwahembuliza Malita na Maliya kwa kufiligwa na lumbulyawo Lazalo.

20Malita vyoyahuliche kota Yesu kanguya, nakaluta kumbochela, ila heye Maliya nakapona hakaye. 21Malita nakamlonjela Yesu, “Mkulu, na uwe baha, lumbulyangu hali bagama! 22Ila ndivizela kota na sambi, Nguluwi kokupa choneche choumlanda!”

23Yesu nakamlonjela Malita, “Lumbulyake heye kozilipuka kahi.”

24Malita nakedichila, “Ndivizela kota kozilipuka kuli zuwa lya mwiso.”

25Yesu nakamlonjela, “Heni nda uzilipulo na ukomu. Munhu yoneche yalingung'hunda, kowa mkomu Ila wone yabagame. 26Na munhu yoneche yalingikala na kung'hunda hobagama hebu! Lelo kwangukunda aga?”

27Malita nakedichila, “Ena Mkulu! Ndangukunda kota hegwe uli Kilistu Mlohozi, Mwana wa Nguluwi yalinguya muisi.”

28Malita vyoyalonjile ago, nakahiluka mng'handa na kumchema lumbulye Maliya hafungo yaliyeka. Kamlonjela, “Mlangusa koya, kangukuchema hegwe.” 29Maliya vyoyahuliche ago, nakenuka na kubilimila kunze kumbochela Yesu. 30Yesu nayali yang'hali kwinjila hali chijiji chila, yali yang'hali hahala honhu Malita hoyamting'hanize. 31Wayahudi nawekale hamwe na Maliya womhoza vyowamuwene yokwinuka yolawa kunze, nawo nawenuka na kulawa kunze. Nawejesa kota kanguluta ko wamtilile Lazalo yakalile kahi.

32Maliya vyoyafichile koyali Yesu na vyoyamuwene, nakafugama mmagulu ga Yesu, nakamlonjela, “Mkulu, na uwe baha, lumbulyangu nahambe yabagame!”

33Yesu vyowamuwene Maliya yolila, na awala Wayahudi welongozase nawo wolila, nakawa na masinzo ng'hatu mnhumbula mwa heye na kwinjililwa na isungu. 34Yesu nakawauza, “Mumuwika kohi?”

Nawamwidichila wata, “Mkulu, uye ulole.”

35Yesu nakalila mahozi. 36Wayahudi nawalonga wata, “Mlole navyoyali yamganile lukami!”

37Baho wanhu wanji nawalonga wata, “Hino hawele yuyu yamgubule meho ayula yohambe yalole? Nakalemwela ndaze kumdita Lazalo yaleche kubagama?”

38Yesu vyoyali na isungu ng'hatu mnhumbula mwa heye, nakaluta kuli chilaga. Chilaga acho chali mhalika, kahi liganga likulu naliwichigwa hamlango. 39Yesu nakawalonjela, “Muse iganga hali lwizi.”

Malita, lumbulye Lazalo nakalonga, “Mkulu, kaluka kunhung'ha, kwa vila kawichigwa mchilaga lehano zuwa lya kane!”

40Yesu nakamlonjela Malita, “Sikulonjele kota wone ukundile kowona ukulu wa Nguluwi?” 41Nawosa iganga hali lwizi na baho Yesu kalola kuchanya, nakalonga, “Ndangukutogola Mhaza kwa vila hegwe kwangunyhulichiza. 42Ndivizela kota kwangunyhulika heni mazuwa gose. Ila ndangulonga aga kwa chiwalo cha wanhu awa leka wakunde kota hegwe ndo unhumile heni.” 43Vyoyalonjile ago, nakachema kwa lizi ng'hulu kalonga, “Lazalo, ulawe kunze!” 44Lazalo nakalawa kunze, moko na magulu gawopigwe na sanda, na chibende chimgubike chihanga. Yesu nakawalonjela wanhu, “Mumdohole na mumleche yalute.”

45Wayahudi weng'ha wawele ahala kwa Maliya nawagona goyaditile Yesu, nawamkunda. 46Ila wamwe wa hewo nawahiluka kwa Mafalisayo nawawalonjela goyaditile Yesu. 47Baho Mafalisayo na wakulu wa watambika wating'hana wata, “Tudite ndaze? Mlole vinduzanduza vyoyalingulajila na kudita munhu ayu! 48Wone tumleche, wanhu weng'ha womkunda heye, hamba wakulu wa Loma wohola isi ya hetwe na kuwifya ng'handa ya Nguluwi ya hetwe!”

49Munhu yumwe wa hewo yali yochemigwa Kayafa yali Mtambika Mkulu mhela ula nakawalonjela, “Hemwe hamchizelele chinhu! 50Hamvizelele kota yowa goya munhu yumwe yabagame kwa mbuli ya wanhu wenji, kuleka isi yeng'ha igwiswe?” 51Kayafa halonjile ago kwa ludali lya heye, ila kwa vila nayali Mtambika Mkulu mhela ula, yaliyolonga kota Yesu kanguzabagama kwa mbuli ya isi ya hewo. 52Kahi haiwele hela kwa hewo, ila kahi kowegala hamwe wanhu wa Nguluwi wasambaluche.

53Ahyo kulawa zuwa lila wakulu wa Wayahudi waliwoheha na kupala nzila ya kumkopola Yesu. 54Ahyo Yesu nahawele yojenda hazelu hagati mwa Wayahudi, ila kalawa aho, nakaluta honhu habehi na hagunuche, hali muji wa Efulaimu. Kekala kuko na walanguswa wa heye.

55Mnvina ya Pasaka ya Wayahudi vyoyali habehi, wanhu wenji wali woluta Yelusalemu kulavya nhambiko kihovuga yawe Yelile Pasaka ing'hali. 56Wali wompala Yesu, na vyowamemile mli Ng'handa ya Nguluwi, weuza wata, “Hemwe mwangijesa ndaze? Hino hokuya hebu kuli ino mnvina?” 57Mtambika mkulu na Mafalisayo nawalavya ilajizo kota wone munhu yamone Yesu koyali, yoye yalonje wakamibate.