Muqeddes Kalam (latin yéziq)

Xudaning Yeshayani peyghember qilip chaqirishi
1Uzziya padishah alemdin ötken yili men Rebni kördüm;
U intayin yuqiri kötürülgen bir textte olturatti;
Uning toni muqeddes ibadetxanigha bir kelgenidi.
2Uning üstide saraflar perwaz qilip turatti;
Herbirining alte tal qaniti bar idi;
Ikki qaniti bilen u yüzini yapatti,
Ikki qaniti bilen u putini yapatti,
We ikki qaniti bilen u perwaz qilip turatti.  
3Ulardin biri bashqa birsige: — «Samawi qoshunlarning Serdari bolghan Perwerdigar, muqeddes, muqeddes, muqeddestur!
Barliq yer yüzi uning shan-sheripige tolghan!» — dep towlawatatti.  
4Towlighuchining awazidin derwazining késhekliri tewrinip ketti,
Öy is-tütek bilen qaplandi.
5Shuning bilen men: — «Özümge way! Men tügeshtim! Chünki men lewliri napak ademmen hem napak lewlik xelq bilen ariliship turup, öz közüm bilen Padishahqa, yeni samawi qoshunlarning Serdari bolghan Perwerdigargha qaridim!» — dédim.
6Shuning bilen saraflardin biri qolida qurban’gahtin bir choghni laxshigirgha qisip élip, yénimgha uchup keldi; 7u uni aghzimgha tegküzüp: — «Mana, bu lewliringge tegdi; séning qebihliking élip tashlandi, gunahing kafaret bilen kechürüm qilindi» — dédi.  
8Andin men Rebning: — «Men kimni ewetimen? Kim Bizge wekil bolup baridu?» dégen awazini anglidim.
Shuning bilen men: — «Mana men! Méni ewetkeysen» — dédim.
9We U: «Barghin; mushu xelqqe mundaq dep éytqin: — «Siler anglashni anglaysiler, biraq chüshenmeysiler;
Körüshni körüsiler, biraq bilip yetmeysiler.
10Mushu xelqning yürikini tash qilghin;
Ularning qulaqlirini éghir,
Közlirini kor qilghin;
Bolmisa, ular közliri bilen köreleydighan,
Quliqi bilen angliyalaydighan,
Köngli bilen chüshineleydighan qilinip,
Yolidin yandurulup saqaytilghan bolatti».  
11Andin men: — «Reb, bu ehwal qachan’ghiche dawamlishidu?» — dep soriwidim,
U jawaben: — «Ta sheherler xarab qilinip ahalisiz,
Öyler ademzatsiz,
Zémin pütünley chölge aylinip bolghuche,
12Perwerdigar ademlirini yiraqlargha yötkep,
Zémindiki tashliwétilgen yerler köp bolghuche bolidu» — dédi.
13«Halbuki, zéminda ademlerning ondin birila qalidu;
Ular zémin’gha qaytip kélip yene yutuwétilidu,
Késilgen bir dub yaki arar derixining kötikidek bolidu;
Kötek bolsa «muqeddes nesil» bolur.

■6:1 2Pad. 15:7

□6:2 «Saraflar» — ibraniy tilidiki söz bolup, «köygüchiler» «köyiwatqanlar» dégenni bildüridu. Ibraniy tilidiki mushu köplük isim bolsa «üch yaki üchtin köp»ni bildüridu. Shübhisizki, ular birxil perishtidur. Ular az dégende üch bolidu, biraq zadi qanchisi barliqini bilmeymiz.

■6:2 Weh. 4:8

□6:3 «...muqeddes, muqeddes, muqeddestur» — ibraniy tilida bir süpet ikki qétim tekralansa, intayin yuqiri derijide bolghanliqni bildüridu. Pütkül muqeddes kitabta melum bir süpetning üch qétim tekrarlinishi peqet mushu yerdila tépilidu; Xudaning pak-muqeddesliki, shübhisizki, «mukemmel, insan tessewur qilghusiz derije»de bolghanliqini bilduridu.

■6:3 Weh. 4:8

□6:5 «Men tügeshtim!» — ibraniy tilida bir söz bilenla ipadilinidu we «men parche-parche qilindim!» hem «men sükütte turghuzuldum» dégennimu ipadileydu.

□6:7 «... gunahing kafaret bilen kechürüm qilindi» — «kafaret» toghruluq «Mis.» 25:17 we izahati, shundaqla «Tebirler»nimu körüng.

■6:7 Yer. 1:9; Dan. 10:16

■6:9 Mat. 13:14; Mar. 4:12; Luqa 8:10; Yuh. 12:40; Ros. 28:26; Rim. 11:8

□6:10 «Mushu xelqning yürikini tash qilghin» — «yüriki tash» dégen söz, ibraniy tilida «yüriki mayliq» dep élin’ghan. «Közlirini kor qilghin; bolmisa, ular közliri bilen köreleydighan, ... yolidin yandurulup saqaytilghan bolatti» — mushu qorqunchluq sözlerge qarighanda, Yeshaya mezkur kitabtiki bésharetlerni yetküzgendin kéyin uning netijisi shundaq échinishliq boliduki, Israillarning köpinchisi öz gunahlirida téximu ching turup, halak bolush yolini tallaydighan bolidu.

■6:10 Yer. 5:21

□6:11 «Zémin pütünley chölge aylinip bolghuche,...» — «zémin» Israil turuwatqan zéminni körsitidu.

□6:13 «muqeddes nesil» — Xudagha sadiq bolghan, yuqirida déyilgen «qaldi», yeni Xudaning mömin bendilirini, Xudagha sadiq bolghanlarni körsitidu.