Muⱪeddes Kalam (yǝngi yeziⱪ)

Muⱪǝddǝs jay, ǝng muⱪǝddǝs jay •••• Shemilarni kɵrüng
1U meni muⱪǝddǝshanidiki muⱪǝddǝs jayning aldiƣa apardi; u jayning kirix eƣizining ikki tǝripidiki yan tamni ɵlqidi, ⱨǝr ikkisining ⱪelinliⱪi altǝ gǝz qiⱪti. 2Kirix eƣizining kǝngliki bolsa on gǝz idi; muⱪǝddǝs jayning kirix eƣizidiki toƣra tamning iqki tǝripining kǝnglikini ɵlqidi, ⱨǝr ikkisi bǝx gǝz qiⱪti; u muⱪǝddǝs jayning uzunluⱪini ɵlqidi, ⱪiriⱪ gǝz qiⱪti; uning kǝngliki yigirmǝ gǝz qiⱪti.
3U iqkirigǝ ⱪarap mangdi, ǝng muⱪǝddǝs jayƣa kirix eƣizidiki toƣra tamning kǝngliki ikki gǝz; eƣizining kǝngliki altǝ gǝz idi; ikki tǝrǝptiki toƣra tamning uzunluⱪi bolsa, yǝttǝ gǝz idi. 4U muⱪǝddǝs jayning kǝynidiki «ǝng muⱪǝddǝs jay»ning uzunluⱪini ɵlqidi, yigirmǝ gǝz qiⱪti; kǝnglikimu yigirmǝ gǝz idi. U manga: «Bu ǝng muⱪǝddǝs jay» — dedi.
«Muⱪǝddǝshana»ƣa yandax kiqik hanilar
5U muⱪǝddǝshanining temini ɵlqidi, ⱪelinliⱪi altǝ gǝz qiⱪti; yandiki kiqik hanilarning bolsa, kǝngliki tɵt gǝz idi; kiqik hanilar muⱪǝddǝshanini qɵridǝp selinƣanidi. 6Yenidiki kiqik hanilar üq ⱪǝwǝtlik, bir-birigǝ üstilǝklik idi, ⱨǝr ⱪǝwǝttǝ ottuzdin hana bar idi; kiqik hanilarning limliri muⱪǝddǝshanining temiƣa qiⱪip ⱪalmasliⱪi üqün, limlar kiqik hanilarning sirtⱪi temiƣa bekitilgǝnidi. 7Yuⱪiriliƣanseri muⱪǝddǝshanining ǝtrapidiki kiqik hanilar kengiyip barƣanidi; qünki muⱪǝddǝshanining ǝtrapida ⱪurulux bolƣanliⱪtin bina egizligǝnseri hanilar kengǝygǝn. Xu sǝwǝbtin muⱪǝddǝshanimu egizligǝnseri kengǝygǝn. Tɵwǝndiki ⱪǝwǝttin yuⱪiridiki ⱪǝwǝtkiqǝ otturidiki ⱪǝwǝt arⱪiliⱪ qiⱪidiƣan pǝlǝmpǝy bar idi.
8Mǝn muⱪǝddǝshanining egiz ulluⱪ supisi barliⱪini kɵrdum; u ⱨǝm yenidiki kiqik hanilarning uli idi; uning egizliki toptoƣra bir «hada» idi, yǝni altǝ «qong gǝz» idi. 9-10Yenidiki hanilarning sirtⱪi temining ⱪelinliⱪi bǝx gǝz idi. Muⱪǝddǝshanining yenidiki kiqik hanilar bilǝn kaⱨinlarning ⱨujriliri ariliⱪidiki box yǝrning kǝngliki yigirmǝ gǝz idi; bu box yǝr muⱪǝddǝshanining ⱨǝmmǝ tǝripidǝ bar idi. 11Yenidiki kiqik hanilarƣa kirix eƣizi bolsa box yǝrgǝ ⱪaraytti; bir kirix eƣizi ximalƣa, yǝnǝ biri jǝnubⱪa ⱪaraytti. Supa üstidiki hanilarni qɵridigǝn box yǝrning kǝngliki bǝx gǝz idi.
12Ƣǝrbkǝ jaylaxⱪan, box yǝrgǝ ⱪaraydiƣan binaning uzunluⱪi yǝtmix gǝz idi; binaning sirtⱪi temining ⱪelinliⱪi bǝx gǝz; uning kǝngliki toⱪsan gǝz idi.
Ibadǝthanining yǝnǝ bǝzi tǝpsilatliri
13Ⱨeliⱪi kixi muⱪǝddǝshanining ɵzini ɵlqidi; uning uzunluⱪi yüz gǝz idi. Box yǝrning kǝngliki yüz gǝz idi, binaning tamliri ⱪoxulup jǝmiy kǝngliki yüz gǝz idi. 14Muⱪǝddǝshanining aldi tǝripi wǝ xǝrⱪⱪǝ jaylaxⱪan ⱨoylisining kǝngliki yüz gǝz idi. 15-16U muⱪǝddǝshanining kǝynidiki box yǝrgǝ ⱪaraydiƣan binaning kǝnglikini, jümlidin u wǝ bu tǝripidiki karidorni ɵlqidi, yüz gǝz qiⱪti. Muⱪǝddǝshanining «muⱪǝddǝs jay»i bilǝn iqki «ǝng muⱪǝddǝs jay»i wǝ sirtⱪa ⱪaraydiƣan dalini bolsa, yaƣaq tahtaylar bilǝn bezǝlgǝn; uning bosuƣiliri, iqidiki üq jayning ǝtrapidiki rojǝkliri ⱨǝm dǝⱨlizliri bolsa, bosuƣisidin tartip ⱨǝmmǝ yǝr, poldin derizilǝrgiqǝ yaƣaq tahtaylar bilǝn bezǝlgǝn (derizilǝr ɵzi rojǝklik idi).
17-18Dalandin iqki «ǝng muⱪǝddǝs jay»ƣiqǝ bolƣan torus, iqki wǝ sirtⱪi «muⱪǝddǝs jay»ning tamlirining ⱨǝmmǝ yeri kerub wǝ palma dǝrǝhliri bilǝn ɵlqǝmlik nǝⱪixlǝngǝnidi. Ⱨǝr ikki kerub arisida bir palma dǝrihi nǝⱪixlǝngǝnidi; ⱨǝrbir kerubning ikki yüzi bar idi. 19Kerubning insan yüzi bu tǝrǝptiki palma dǝrihi nǝⱪixigǝ ⱪaraytti; xir yüzi u tǝrǝptiki palma dǝrihi nǝⱪixigǝ ⱪaraytti; pütkül muⱪǝddǝshanining iqki ⱨǝmmǝ tǝripi xundaⱪ idi; 20dalanning poldin tartip torusiƣiqǝ, xuningdǝk «muⱪǝddǝs jay»ning tamliriƣa kerublar wǝ palma dǝrǝhliri nǝⱪix ⱪilinƣan.
21«Muⱪǝddǝs jay»ning ixik kexǝkliri bolsa, tɵt qasiliⱪ idi; «ǝng muⱪǝddǝs jay» aldidiki ixik kexǝklirimu ohxax idi.
22«Muⱪǝddǝs jay»ning egizliki üq gǝz, uzunluⱪi ikki gǝz bolƣan ⱪurbangaⱨi yaƣaqtin yasalƣan; uning burjǝkliri, yüzi wǝ tamlirining ⱨǝmmisi yaƣaqtin yasalƣan; ⱨeliⱪi kixi manga: «Bu bolsa Pǝrwǝrdigarning aldida turidiƣan xirǝdur» — dedi.
23 Muⱪǝddǝshanining «muⱪǝddǝs jay» ⱨǝm «ǝng muⱪǝddǝs jay»ining ⱨǝrbirining ⱪox ⱪanatliⱪ ixiki bar idi. 24Ⱨǝrbir ⱪanitining ikki ⱪatlimi bar idi; bu ikki ⱪatlam ⱪatlinatti; bu tǝrǝptiki ⱪanitining ikki ⱪatlimi bar idi; u tǝrǝptikisiningmu ikki ⱪatlimi bar idi. 25Ularning üstigǝ, yǝni «muⱪǝddǝs jay»ning ixikliri üstigǝ, tamlarning üstini nǝⱪixligǝndǝk, kerublar wǝ palma dǝrǝhliri nǝⱪixlǝngǝnidi; sirtⱪi dalanning aldida yaƣaqtin yasalƣan bir aywan bar idi. 26Dalanning u wǝ bu tǝripidǝ rojǝklǝr wǝ palma dǝrǝh nǝⱪixliri bar idi. Muⱪǝddǝshanining yenidiki kiqik hanilar wǝ aldidiki aywanning xǝklimu xundaⱪ idi.

□41:3 «U iqkirigǝ ⱪarap mangdi ... kirix eƣizidiki toƣra tamning kǝngliki ikki gǝz...» — alimlarning bu 1-3 ayǝttiki ɵlqǝmlǝr toƣruluⱪ baxⱪa-baxⱪa qüxinixliri bar. Shemilirimizni kɵrüng.

□41:4 «U muⱪǝddǝs jayning kǝynidiki «ǝng muⱪǝddǝs jay»ning uzunluⱪini ɵlqidi, ... U manga: «bu ǝng muⱪǝddǝs jay» — dedi» — Əzakiyal kaⱨin bolup, «muⱪǝddǝs jay»ƣa kirdi. Biraⱪ «ǝng muⱪǝddǝs jay»ƣa kirmidi; Musa pǝyƣǝmbǝrgǝ qüxürülgǝn ⱪanun boyiqǝ pǝⱪǝt «bax kaⱨin» «ǝng muⱪǝddǝs jay»ƣa kirixkǝ ⱨoⱪuⱪluⱪ idi.

□41:7 «muⱪǝddǝshanining ǝtrapida ⱪurulux bolƣanliⱪtin bina egizligǝnseri hanilar kengǝygǝn» — muxu «ⱪurulux» degǝn sɵz pütkül «Muⱪǝddǝs Kitab»ta pǝⱪǝt bir ⱪetimla tepilidu, xunga uning mǝnisini bekitix tǝs. Mumkinqiliki yǝnǝ barki, u «karidor» yaki «pǝlǝmpǝy» degǝn mǝnidǝ.

□41:8 «uning egizliki toptoƣra bir «hada» idi, yǝni altǝ «qong gǝz» idi» — oⱪurmǝnlǝrning esidǝ boliduki, «qong gǝz» «bir gǝzgǝ ⱪoxulƣan bir aliⱪan» (525 millimetr etrapida) (40:5ni kɵrüng).

□41:12 «binaning uzunluⱪi yǝtmix gǝz idi... uning kǝngliki toⱪsan gǝz idi» — bu binaning kǝngliki wǝ uzunluⱪi «iqki kǝngliki» wǝ «iqki uzunluⱪi»ni kɵrsǝtsǝ kerǝk. Shemimizda xundaⱪ ⱪiyas ⱪilimiz. Baxⱪa imkaniyitimu shemimizda kɵrsitilidu. Alimlar binaning ⱪaysi yɵlinixtǝ (toƣrisiƣa, uzunisiƣa) orunlaxturuluxi toƣruluⱪ ikki pikirdǝ bar.

□41:14 «xǝrⱪⱪǝ jaylaxⱪan ⱨoylisi» — ibraniy tilida « xǝrⱪⱪǝ jaylaxⱪan box yǝr».

□41:17-18 «iqki wǝ sirtⱪi «muⱪǝddǝs jay»» — demǝk, «muⱪǝddǝs jay» wǝ «ǝng muⱪǝddǝs jay».

□41:22 ««Muⱪǝddǝs jay»ning egizliki üq gǝz, uzunluⱪi ikki gǝz bolƣan ⱪurbangaⱨi yaƣaqtin yasalƣan...» — bu «ⱪurbangaⱨ» bǝlkim ⱪurbanliⱪlarning ɵzi üqün ǝmǝs, bǝlki Pǝrwǝrdigarning aldida «muⱪǝddǝs nan» ⱪoyulux üqün yasilidu; qünki ahirida «Bu bolsa Pǝrwǝrdigarning aldida turidiƣan xirǝdur» deyilidu.