Muⱪeddes Kalam (yǝngi yeziⱪ)

Ibadǝt qedirining tiklinixi
1Andin Pǝrwǝrdigar Musaƣa mundaⱪ ǝmr ⱪildi: —
2Birinqi ayning bexi, ayning birinqi küni sǝn jamaǝt qedirining muⱪǝddǝshanisini tikligin. 3Ⱨɵküm-guwaⱨliⱪ sanduⱪini uning iqigǝ ⱪoyup, iqki pǝrdǝ arⱪiliⱪ ǝⱨdǝ sanduⱪini tosup ⱪoyƣin; 4xirǝni qedirning iqigǝ ǝkirip, üstigǝ tizilidiƣan nǝrsilǝrni tizƣin; andin qiraƣdanni ǝkirip, üstigǝ qiraƣlarni orunlaxturƣin.    5Altun bilǝn ⱪaplanƣan huxbuy kɵydürgüqi ⱪurbangaⱨni ⱨɵküm-guwaⱨliⱪ sanduⱪining uduliƣa tiklǝp ⱪoyƣin; qedirning kirix eƣizining pǝrdisini esip ⱪoyƣin.  
6Kɵydürmǝ ⱪurbanliⱪ ⱪurbangaⱨini muⱪǝddǝshanining, yǝni jamaǝt qedirining kirix eƣizining aldiƣa ⱪoyƣin; 7andin yuyux desini jamaǝt qediri bilǝn ⱪurbangaⱨning otturisiƣa orunlaxturup, su toxturup ⱪoyƣin.
8Ⱨoylining qɵrisigǝ pǝrdilǝrni bekitip, ⱨoylining kirix eƣizining pǝrdisini asⱪin; 9andin «mǝsiⱨlǝx meyi»ni elip, ibadǝt qediri wǝ uning iqidiki barliⱪ nǝrsilǝrni mǝsiⱨlǝp, uni wǝ barliⱪ ⱨǝmmǝ ǝswablirini Hudaƣa atap muⱪǝddǝs ⱪilƣin. Xundaⱪ ⱪilip pütkül qedir muⱪǝddǝs bolidu. 10Sǝn kɵydürmǝ ⱪurbanliⱪ ⱪurbangaⱨini, xundaⱪla uning barliⱪ ǝswablirini mǝsiⱨlǝp, uni Hudaƣa atap muⱪǝddǝs ⱪilƣin; buning bilǝn ⱪurbangaⱨ «ǝng muⱪǝddǝs nǝrsilǝr» ⱪatarida bolidu.
11Sǝn yǝnǝ yuyunux desi wǝ uning tǝglikini mǝsiⱨlǝp muⱪǝddǝs ⱪilƣin. 12Andin Ⱨarun bilǝn uning oƣullirini jamaǝt qedirining kirix eƣiziƣa yeⱪin ǝkilip, ularni su bilǝn yuƣin; 13Ⱨarunƣa muⱪǝddǝs kiyimlǝrni kiydürüp, Manga kaⱨinliⱪ hizmǝttǝ boluxi üqün uni mǝsiⱨlǝp, Manga ayrip muⱪǝddǝs ⱪilƣin.
14Andin uning oƣullirini elip kirip, ularƣa halta kɵnglǝklǝrni kiydürüp, 15ularning atisini mǝsiⱨliginingdǝk Manga kaⱨinliⱪ hizmitidǝ boluxi üqün ularnimu mǝsiⱨligin. Xuning bilǝn ularning bu mǝsiⱨlinixi ular üqün ǝwladtin ǝwladⱪiqǝ ǝbǝdiy kaⱨinliⱪning bǝlgisi bolidu.
16Musa xundaⱪ ⱪildi; Pǝrwǝrdigar uningƣa nemǝ buyruƣan bolsa, u xundaⱪ bǝja kǝltürdi.
17Xundaⱪ boldiki, ikkinqi yilning birinqi eyida, ayning birinqi künidǝ ibadǝt qediri tiklǝndi.   
18Musa qedirni tikip, tǝgliklirini orunlaxturup, tahtaylirini tizip, ularning baldaⱪlirini bekitip, hadilirini tiklidi. 19Muⱪǝddǝs qedirning üstigǝ iqki yopuⱪni yapti, andin uning üstigǝ taxⱪi yopuⱪni yepip ⱪoydi; bularning ⱨǝmmisi Pǝrwǝrdigarning Musaƣa buyruƣinidǝk ⱪilindi.
20Andin u ⱨɵküm-guwaⱨliⱪni elip, uni sanduⱪ iqigǝ ⱪoydi; baldaⱪlarni ǝⱨdǝ sanduⱪining ⱨalⱪiliridin ɵtküzüp, «kafarǝt tǝhti»ni sanduⱪning üstigǝ orunlaxturdi.
21Əⱨdǝ sanduⱪini muⱪǝddǝs qedir iqigǝ elip kirip, otturiƣa «ayrima pǝrdǝ»ni tartti; xundaⱪ ⱪilip u ⱨɵküm-guwaⱨliⱪ sanduⱪini pǝrdǝ arⱪiliⱪ tosup ⱪoydi. Ⱨǝmmǝ ix Pǝrwǝrdigarning Musaƣa buyruƣinidǝk ⱪilindi.
22U xirǝni jamaǝt qediriƣa elip kirip, muⱪǝddǝs jayning ximal tǝripigǝ, «ǝng muⱪǝddǝs jay»diki pǝrdining sirtiƣa ⱪoydi. 23«Tǝⱪdim nanlar»ni xirǝning üstigǝ, Pǝrwǝrdigarning aldiƣa tizip ⱪoydi; bularning ⱨǝmmisi Pǝrwǝrdigarning Musaƣa buyruƣinidǝk ⱪilindi. 24Andin u qiraƣdanni jamaǝt qediriƣa elip kirip, uni muⱪǝddǝs jayning jǝnub tǝripigǝ, xirǝning uduliƣa ⱪoydi, 25qiraƣlarni Pǝrwǝrdigarning aldiƣa orunlaxturdi; bularning ⱨǝmmisi Pǝrwǝrdigarning Musaƣa buyruƣinidǝk ⱪilindi.
26Andin u huxbuyni kɵydürgüqi altun ⱪurbangaⱨni iqidiki pǝrdining aldiƣa tiklidi; 27Uning üstidǝ esil huxbuyni kɵydürdi; bularning ⱨǝmmisi Pǝrwǝrdigarning Musaƣa buyruƣinidǝk ⱪilindi.
28U ibadǝt qedirining kirix eƣiziƣa pǝrdǝ tartti. 29Andin kɵydürmǝ ⱪurbanliⱪ ⱪurbangaⱨini jamaǝt qediridiki muⱪǝddǝs jayning kirix eƣiziƣa yeⱪin ⱪoydi; uning üstidǝ kɵydürmǝ ⱪurbanliⱪ wǝ ⱪoxumqǝ axliⱪ ⱨǝdiyǝsini ɵtküzdi; bularning ⱨǝmmisi Pǝrwǝrdigarning Musaƣa buyruƣinidǝk ⱪilindi.
30Yuyunux desini jamaǝt qediri bilǝn ⱪurbangaⱨning otturisiƣa ⱪoyup, yuyuxⱪa ixlitilidiƣan suni dasⱪa toxⱪuzup ⱪuydi.
31-32Musa wǝ Ⱨarun bilǝn uning oƣulliri ⱪaqanla jamaǝt qediriƣa kirsǝ yaki ⱪurbangaⱨⱪa yeⱪin barsa, Pǝrwǝrdigarning Musaƣa buyruƣinidǝk ⱪollirini xu suda yuyatti. Bular Pǝrwǝrdigarning Musaƣa buyruƣinidǝk ⱪilindi.
33Andin u qedir ⱨǝm ⱪurbangaⱨning ǝtrapiƣa ⱨoyla pǝrdisini tiklǝp, ⱨoylining kirix eƣizining pǝrdisini tartti. Xu tǝriⱪidǝ Musa pütkül ixni tamamlidi.
Pǝrwǝrdigarning parlaⱪ nurining ibadǝt qedirini ⱪaplixi
34Xuning bilǝn bulut jamaǝt qedirini ⱪaplap, Pǝrwǝrdigarning julasi ibadǝt qedirini toldurdi. 35Bulut sayǝ qüxürüp, Pǝrwǝrdigarning julasi qedirni toldurƣini üqün, Musa jamaǝt qediriƣa kirǝlmidi.
36Ⱪaqanki bulut jamaǝt qediridin kɵtürülsǝ, Israillar sǝpǝrgǝ atlinatti. Ⱨǝrbir ⱪetim sǝpǝrdǝ xundaⱪ bolatti. 37Bulut kɵtürülmisǝ ular ⱪozƣalmay, taki kɵtürülidiƣan küngiqǝ sǝpǝrgǝ qiⱪmaytti. 38Qünki kündüzi Pǝrwǝrdigarning buluti muⱪǝddǝs qedir üstidǝ turatti, keqisi uning üstidǝ ot kɵrünǝtti; pütkül Israil jǝmǝtining kɵz aldida ularning barliⱪ ⱪilƣan sǝpǝrliridǝ xular kɵrünǝtti.

□40:2 «muⱪǝddǝshanisi» — demǝk, qedirning ɵzi, yǝni «muⱪǝddǝs jay» bilǝn «ǝng muⱪǝddǝs jay».

□40:4 «qiraƣlarni orunlaxturƣin» — yaki «qiraƣlarni yeⱪip ⱪoyƣin».

■40:4 Mis. 26:35; 27:20

□40:5 «huxbuy kɵydürgüqi ⱪurbangaⱨ» — huxbuygaⱨni kɵrsitidu.

■40:5 Mis. 26:36

■40:8 Mis. 27:16

■40:10 Mis. 29:37

□40:15 «Ularning atisini mǝsiⱨliginingdǝk manga kaⱨinliⱪ hizmitidǝ boluxi üqün ularnimu mǝsiⱨligin» — bu ixning, yǝni Ⱨarun wǝ oƣullirini mǝsiⱨlǝp kaⱨinliⱪⱪa tǝyinlǝx murasimining tǝpsilatliri «Law.» 8-babta hatirilǝngǝn.

□40:17 «ikkinqi yili» — demǝk, Misirdin qiⱪⱪandin keyinki ikkinqi yili.

■40:17 Qɵl. 7:1

□40:20 ⱨɵküm-guwaⱨliⱪ» — Huda Musaƣa tapxurƣan «on pǝrz» yaki «on ǝmr» pütülgǝn ikki tax tahtayni kɵrsitidu (31:18ni kɵrüng).

■40:21 Mis. 35:12

■40:23 Mis. 25:30

□40:26 «huxbuy kɵydürgüqi altun ⱪurbangaⱨ» — huxbuygaⱨni kɵrsitidu.

□40:29 «kɵydürmǝ ⱪurbanliⱪning ⱪoxumqǝ axliⱪ ⱨǝdiyǝsi» — ⱨǝrbir kɵydürmǝ ⱪurbanliⱪⱪa bir axliⱪ ⱨǝdiyǝ ⱪoxup sunuluxi kerǝk (mǝsilǝn, «Qɵl.» 28-29-bablarni kɵrüng).

■40:34 Qɵl. 9:15; 1Pad. 8:10

■40:38 Mis. 13:21; Qɵl. 14:14; Ⱪan. 1:33; Nǝⱨ. 9:19; Zǝb. 78:14; 105:39; 1Kor. 10:1