Muⱪeddes Kalam (yǝngi yeziⱪ)

Amosning dualiri — Hudaning ⱪarari
1Rǝb Pǝrwǝrdigar manga kɵrsǝttiki —
Keyinki ot-qɵp bax tartⱪan waⱪtida, mana U qekǝtkilǝrni yasidi (bu padixaⱨ ɵzigǝ ot-qɵp orƣandin keyinki, ikkinqi ⱪetimliⱪ ot-qɵp ɵskǝn waⱪit idi) 2ⱨǝm xundaⱪ boldiki, qekǝtkilǝr zemindiki ot-qɵpni ⱪaldurmay yǝwǝtkǝndin keyin, mǝn: —
«I Rǝb Pǝrwǝrdigar, ɵtünüp ⱪalay, kǝqürgǝysǝn! Yaⱪup ⱪandaⱪmu qidiyalaydu? U kiqik tursa!» — dedim.
3Pǝrwǝrdigar ǝmdi undaⱪ ⱪilixtin yandi: «Əmdi undaⱪ bolmaydu» — dedi Pǝrwǝrdigar.
4Rǝb Pǝrwǝrdigar manga kɵrsǝtti —
Mana, Rǝb Pǝrwǝrdigar hǝlⱪi bilǝn kürǝx ⱪilixⱪa otni qaⱪirdi;
Ot ⱨǝtta qongⱪur dengiznimu ⱪurutti,
Miras bolƣan zeminnimu yǝp kǝtti;
5Əmdi mǝn: —
«I Rǝb Pǝrwǝrdigar, ɵtünüp ⱪalay, tohtiƣaysǝn! Yaⱪup ⱪandaⱪmu qidiyalaydu? U kiqik tursa!» — dedim.
6Pǝrwǝrdigar xundaⱪ ⱪilixtin yandi: «Əmdi undaⱪ bolmaydu» — dedi Rǝb Pǝrwǝrdigar.
7Əmdi U manga mundaⱪ bir ixni kɵrsǝtti —
Wǝ mana, Rǝb tik ɵlqigüq yip bilǝn ⱪopurulƣan tam tüwidǝ,
Ⱪolida tik ɵlqigüq yipni tutⱪiniqǝ turatti; 8wǝ Pǝrwǝrdigar mǝndin: —
«Amos, nemini kɵrdung?» dǝp soridi.
Mǝn: «Tik ɵlqigüq yipni» — dedim.
Rǝb: «Mǝn yǝnǝ Ɵz hǝlⱪim Israil otturisiƣa tik ɵlqigüq yipni tiklǝymǝn; Mǝn yǝnǝ ularni jazalimay ɵtüp kǝtmǝymǝn;
9Ⱨǝm Isⱨaⱪning «yuⱪiri jayliri» ⱨalak bolidu,
Israilning tawapgaⱨliri wǝyran ⱪilinidu;
Yǝroboam jǝmǝtigǝ ⱪiliq bilǝn ⱨujum ⱪilixⱪa ornumdin turimǝn» — dedi.
Amosning butpǝrǝslǝrning tawapgaⱨi bolup ⱪalƣan Bǝyt-Əlning kaⱨini, yǝni «ximaliy padixaⱨliⱪ» Israilning «bax kaⱨini» Amaziya bilǝn bolƣan kürixi
10Xuning bilǝn Bǝyt-Əldiki kaⱨin Amaziya Israil padixaⱨi Yǝroboamƣa hǝwǝr yollap: —
«Amos Israil jǝmǝti arisida turupmu siligǝ suyiⱪǝst ⱪildi; zemin uning ⱪilƣan barliⱪ gǝplirini kɵtürǝlmǝydu. 11Qünki Amos: — «Yǝroboam ⱪiliqta ɵlidu, Israil ǝsirgǝ elinip ɵz zeminidin sürgün bolmay ⱪalmaydu!» — dǝydu» — dedi.
12Andin Amaziya Amosⱪa: — Ⱨǝy aldin kɵrgüqi! Bǝs, yoⱪal, Yǝⱨuda zeminiƣa ⱪaq, axu yǝrdǝ bexarǝt berip, xu yǝrdǝ nan tepip yǝ! 13Biraⱪ Bǝyt-Əldǝ yǝnǝ bexarǝt bǝrmǝ; qünki u padixaⱨning tawapgaⱨi, xaⱨliⱪ ɵydur, — dedi.
14Amos Amaziyaƣa jawab berip mundaⱪ dedi: —
«Mǝn ǝsli pǝyƣǝmbǝr ǝmǝs idim, yaki pǝyƣǝmbǝrning oƣlimu ǝmǝsmǝn; bǝlki mǝn bir qarwiqi, xundaⱪla erǝn dǝrǝhlirining mewisini tǝrgüqi idim. 15Biraⱪ pada beⱪiwatⱪan qeƣimda Pǝrwǝrdigar meni Ɵz ilkigǝ aldi wǝ manga: «Barƣin, hǝlⱪim Israilƣa bexarǝt bǝr» — dedi. 16Əmdi, i Amaziya, Pǝrwǝrdigarning sɵzigǝ ⱪulaⱪ sal! Sǝn manga: «Israilni ǝyiblǝydiƣan bexarǝtlǝrni bǝrmǝ, Isⱨaⱪ jǝmǝtini ǝyiblǝydiƣan sɵzlǝrni eytma», deding. 17Xunga Pǝrwǝrdigar mundaⱪ dǝydu: —
«Sening ayaling xǝⱨǝrdǝ paⱨixǝ bolidu, oƣul-ⱪizliring ⱪiliq bilǝn ⱪirilidu wǝ zemining ɵlqǝx tanisi tartilixi bilǝn parqilinidu; sǝn napak bir zeminda ɵlisǝn; wǝ Israil ǝsirgǝ elinip ɵz zeminidin sürgün bolmay ⱪalmaydu»».

□7:1 «Rǝb Pǝrwǝrdigar manga kɵrsǝttiki — keyinki ot-qɵp bax tartⱪan waⱪtida, mana u qekǝtkilǝrni yasidi...» — bu ixni (xundaⱪla -4-, 7- wǝ 8:1-ayǝttiki ixlarnimu) Amos bexarǝtlik ƣayibanǝ kɵrünüxtǝ kɵrgǝn bolsa kerǝk. Qünki 3-, 6-ayǝttǝ Pǝrwǝrdigar «bundaⱪ ixtin» yanidu.

□7:9 «Isⱨaⱪning «yuⱪiri jayliri» ⱨalak bolidu» — «yuⱪiri jaylar» taƣ qoⱪⱪiliri ⱪatarliⱪ jaylarda Hudaƣa ⱪurbanliⱪ ⱪilix ǝslidǝ Musa pǝyƣǝmbǝrgǝ qüxürülgǝn ⱪanunda mǝn’i ⱪilinƣanidi. Xundaⱪtimu, Israil ⱨǝm Yǝⱨudadikilǝr heli burunla taƣ qoⱪⱪiliri üstidǝ Pǝrwǝrdigarƣa ⱪurbanliⱪ ⱪilip ibadǝt ⱪilixⱪa baxliƣanidi. Keyin ular muxu «yuⱪiri jaylar»da butⱪa qoⱪunuxⱪa baxlidi.

□7:11 «Qünki Amos: — «Yǝroboam ⱪiliqta ɵlidu, Israil ǝsirgǝ elinip ɵz zeminidin sürgün bolmay ⱪalmaydu!» — dǝydu» — ǝmǝliyǝttǝ Amos: — «Pǝrwǝrdigar Yǝroboamning jǝmǝtigǝ ⱪiliq bilǝn ⱨujum ⱪilidu» — degǝnidi (9-ayǝt).

□7:13 «Bǝyt-Əldǝ yǝnǝ bexarǝt bǝrmǝ; qünki u padixaⱨning tawapgaⱨi» — «padixaⱨning tawapgaⱨi» ibraniy tilida «padixaⱨning «muⱪǝddǝs jay»i» deyilidu.

■7:16 Əz. 21:7