Muⱪeddes Kalam (yǝngi yeziⱪ)

Mǝsiⱨning rosullirining hizmiti
1Birsi biz toƣruluⱪ birnemǝ demǝkqi bolsa, bizni Mǝsiⱨning hizmǝtkarliri wǝ Hudaning sirliri amanǝt ⱪilinƣan ƣojidarlar dǝp bilsun. 2Əmdi ƣojidar degǝnlǝrdin tǝlǝp ⱪilinidiƣini xuki, ular wapadar-sadiⱪ boluxi kerǝktur. 3Əmma mǝn silǝr tǝripinglardin yaki baxⱪa ⱨǝrⱪandaⱪ insaniy sot tǝripidin sürüxtürüp baⱨalansam, bu mǝn üqün ziƣirqilik ix; mǝn ⱨǝtta ɵzüm toƣruluⱪ sürüxtürüp olturmaymǝn. 4Qünki wijdanim ǝyiblǝydiƣan ⱨeqⱪandaⱪ ixlirimdin hǝwirim yoⱪ; ǝmma bu ixning ɵzi meni ⱨǝⱪⱪaniy dǝp aⱪlimaydu; meni sürüxtürüp baⱨaliƣuqi bolsa Rǝbdur. 5Xunga waⱪti-saiti kǝlmigüqǝ, yǝni Rǝb kǝlmigüqǝ ⱨeq ix toƣruluⱪ ⱨɵküm qiⱪarmanglar; Rǝb kǝlgǝndǝ u ⱪarangƣuluⱪtiki yoxurun ixlarni axkarilaydu, ⱪǝlb-dillardiki barliⱪ oy-niyǝtlǝrni ayan ⱪilidu; xu qaƣda ⱨǝrbiri Huda tǝripidin tǝriplinidu. 6Əmma, i ⱪerindaxlar, bu ixlarni silǝrning mǝnpǝǝtinglarni dǝp ɵzümgǝ wǝ Apollosⱪa tǝtbiⱪlidim; mǝⱪsǝt silǝr biz arⱪiliⱪ «pütülgǝnning dairisidin ⱨalⱪip kǝtmǝnglar» degǝn sawaⱪni ɵginixinglar, xundaⱪla ⱨeqⱪaysinglarning mǝlum birsini baxⱪa birsidin üstün dǝp pǝhirlinip tǝkǝbburlixip kǝtmǝslikinglar üqündur.  
7Qünki kim seni baxⱪa birsidin üstün ⱪilidu? Sanga ata ⱪilinƣan nǝrsidin baxⱪa sǝndǝ yǝnǝ nemǝ bar? Ⱨǝmmǝ sanga berilgǝn tursa, nemixⱪa «Mǝndǝ ǝsli bar idi» dǝp pǝhirlinip kɵrǝnglǝp ketisǝn?   8Silǝr alliⱪaqan toyunup kǝttinglar! Alliⱪaqan beyip kǝttinglar! Silǝr bizsiz padixaⱨlar bolup ⱨɵküm sürdunglar! Kaxki silǝr ⱨǝⱪiⱪǝtǝn ⱨɵküm sürgǝn bolsanglaridi — undaⱪta biz silǝr bilǝn billǝ ⱨɵküm sürgǝn bolattuⱪ! 9Qünki Huda rosullar bolƣan bizlǝrni ɵlümgǝ mǝⱨkum bolƣan adǝmlǝrdǝk ǝng ahirƣa ⱪoyup sazayi ⱪilip otturiƣa qiⱪarƣan, dǝp oylaymǝn; qünki biz pütkül alǝmgǝ, yǝni ⱨǝm pǝrixtilǝrgǝ ⱨǝm insanlarƣa bir hil tamaxa bolduⱪ. 10Biz Mǝsiⱨ üqün ǝhmǝⱪ sanalƣanlarmiz, ǝmma silǝr Mǝsiⱨdǝ danasilǝr! Biz ajiz, ǝmma silǝr küqlüksilǝr; silǝr izzǝtlik, ǝmma biz har;    11Ⱨazirⱪi dǝⱪiⱪigiqǝ aq-yalingaq, qangⱪap yürmǝktimiz, dumbalinip, sǝrgǝrdan, makansiz bolup yürmǝktimiz; 12  ɵz ⱪolimiz bilǝn ixlǝp japa tartmaⱪtimiz; aⱨanǝtkǝ ⱪalƣanda yahxiliⱪ tilǝwatimiz; ziyankǝxlikkǝ uqriƣanda, qidawatimiz; 13tɵⱨmǝtkǝ uqriƣanda, biz ularni qirayliⱪqǝ towiƣa ündǝymiz; biz jaⱨanning daxⱪili, insanlarning süpüründisi dǝp ⱪariliwatimiz, ta ⱨazirƣiqǝ xundaⱪ.
14Bu ixlarni yezixim, silǝrni hijalǝtkǝ ⱪaldurux üqün ǝmǝs, bǝlki sɵyümlük balilirim süpitidǝ silǝrgǝ nǝsiⱨǝt ⱪiliwatimǝn; 15qünki silǝrning Mǝsiⱨdǝ tümǝnligǝn tǝrbiyiligüqiliringlar bolsimu, silǝrning atanglar kɵp ǝmǝstur; qünki mǝn Mǝsiⱨ Əysada bolup silǝrni hux hǝwǝr arⱪiliⱪ tɵrǝldürüp ata boldum.    16Xunga mǝn silǝrdin ɵtünimǝnki, meni ülgǝ ⱪilinglar.
17Dǝl bu sǝwǝbtin mǝn Rǝbdǝ bolƣan ɵz sɵyümlük wǝ ixǝnqlik oƣlum Timotiyni yeninglarƣa ǝwǝttim; ⱨǝrⱪaysi jaylardiki jamaǝttǝ ɵgǝtkǝnlirimgǝ ǝgixip, u silǝrgǝ Mǝsiⱨdǝ bolƣan yollirim toƣruluⱪ ǝslitidu. 18Əmma bǝziliringlar, «Pawlusni yenimizƣa kǝlmǝydu», dǝp kɵrǝnglǝp kǝttinglar; 19biraⱪ Rǝb buyrusa mǝn pat arida yeninglarƣa barimǝn; xu qaƣda mǝn kɵrǝnglǝp kǝtkǝnlǝrning sɵzlirini ǝmǝs, bǝlki ularda bolƣan küq-ⱪudrǝtni kɵrüp baⱪay. 20Qünki Hudaning padixaⱨliⱪi sɵzdǝ ǝmǝs, bǝlki küq-ⱪudrǝttǝ ispatlinidu.    21Əmdi nemini halaysilǝr? Yeninglarƣa tayaⱪ kɵtürüp beriximnimu, yaki meⱨir-mulayimliⱪ roⱨida beriximnimu?

■4:1 Mat. 24:45; 2Kor. 6:4; Kol. 1:25; Tit. 1:7.

■4:2 Luⱪa 12:42.

□4:3 «ⱨǝrⱪandaⱪ insaniy sot tǝripidin...» — degǝn grek tilida «insaniy bir kün tǝripidin...». Adǝmlǝrning ixlirini sürüxtǝ ⱪilƣuqi bolsa mǝlum bir insanning küni ǝmǝs, bǝlki Mǝsiⱨning küni, yǝni ⱪiyamǝt künidur.

■4:4 Mis. 34:7; Ayup 9:2; Zǝb. 143:2.

■4:5 Dan. 7:10; Mat. 7:1; Rim. 2:1; Wǝⱨ. 20:12.

□4:6 «pütülgǝnning dairisidin ⱨalⱪip kǝtmǝnglar» — bu sɵzlǝr Tǝwratta ǝyni pütülmigini bilǝn, u Tǝwrat-Injildiki intayin muⱨim bir prinsiptur. «Ⱪoxumqǝ sɵz»imizgǝ ⱪarang.

■4:6 Pǝnd. 3:7; Rim. 12:3.

□4:7 «Kim seni baxⱪa birsidin üstün ⱪilidu?» — bu soalƣa bǝlkim mundaⱪ ikki toƣra jawab berilixi mumkin: (1) «mǝlum kixini baxⱪa bir kixidin baxⱪiqǝ ⱪilƣuqi pǝⱪǝt Hudadur» xunga tǝkǝbbur boluxning asasi yoⱪ; (2) ⱨeq insanning Hudaning uluƣluⱪi aldida «Mǝn baxⱪilardin üstün» dǝp tǝkǝbbur boluxining asasi yoⱪ. Xundaⱪ ⱪaraymizki, (1)-jawab Pawlusning demǝkqi bolƣinini kɵrsitidu. «Sanga ata ⱪilinƣan nǝrsidin baxⱪa sǝndǝ yǝnǝ nemǝ bar?» — demǝk, ⱨǝrbirimizning barliⱪi Huda tǝripidin bizgǝ ata ⱪilinidu; xunga «Mǝndǝ ǝsli xundaⱪ ⱪabiliyǝt (talant, küq, ⱪatarliⱪlar....) bar idi» dǝp tǝkǝbburlixip ketix ⱨamaⱪǝtliktur.

■4:7 Yⱨ. 3:27; Yaⱪ. 1:17.

□4:8 «Silǝr alliⱪaqan toyunup kǝttinglar! Alliⱪaqan beyip kǝttinglar! Silǝr bizsiz padixaⱨlar bolup ⱨɵküm sürdunglar! Kaxki silǝr ⱨǝⱪiⱪǝtǝn ⱨɵküm sürgǝn bolsanglaridi — undaⱪta biz silǝr bilǝn billǝ ⱨɵküm sürgǝn bolattuⱪ!» — xübⱨisizki, bu sirliⱪ ayǝtning kinayilik, mǝshirilik mǝnisi bar. Korint jamaitidiki kɵp adǝmlǝr tolimu tǝkǝbburlixip ketip: «Biz rosul Pawlus yaki baxⱪa rosullarƣa ⱨeq kerǝk ǝmǝsmiz; biz ⱨǝⱪiⱪǝtǝn «roⱨiy adǝmlǝr»miz, intayin bilimlik, Huda aldida intayin esilzadǝ bolup, padixaⱨdǝk bolduⱪ» dǝp kǝtkǝnidi. «Ⱪoxumqǝ sɵz»imizni kɵrüng.

■4:9 Zǝb. 44:22; Rim. 8:36; 2Kor. 4:11; Ibr. 10:33.

□4:10 «Biz Mǝsiⱨ üqün ǝhmǝⱪ sanalƣanlarmiz...» — grek tilida «biz Mǝsiⱨ üqün ǝhmǝⱪlǝr bolduⱪ...» — demǝk, kɵpqilik tǝripidin «ǝhmǝⱪ» ⱨesablanduⱪ.

■4:10 1Kor. 2:3.

■4:11 Ros. 23:2.

■4:12 Mat. 5:44; Luⱪa 6:28; 23:34; Ros. 7:60; 18:3; 20:34; Rim. 12:14; 1Tes. 2:9; 2Tes. 3:8.

■4:14 1Tes. 2:11.

□4:15 «silǝrning atanglar kɵp ǝmǝstur» — roⱨiy jǝⱨǝttin bolƣan atilarni kɵrsitidu, ǝlwǝttǝ.

■4:15 Ros. 18:11; Gal. 4:19; Flm. 10; Yaⱪ. 1:18.

■4:16 1Kor. 11:1; Fil. 3:17; 1Tes. 1:6; 2Tes. 3:9.

■4:19 Ros. 18:21; Ibr. 6:3; Yaⱪ. 4:15.

□4:20 «Hudaning padixaⱨliⱪi sɵzdǝ ǝmǝs, bǝlki küq-ⱪudrǝttǝ ispatlinidu» — yaki «Hudaning padixaⱨliⱪi sɵzdǝ ǝmǝs, bǝlki küq-ⱪudrǝttǝ namayan bolidu».

■4:20 1Kor. 2:4; 1Tes. 1:5; 2Pet. 1:16.