1He-an imbabalek donglom tun tugun kun he-a. Datuwen kalyok ke he-a ya kiphodam te mad-uman di punnomnom mu. 2Ya ta inilaom an mamilih maphod an atom ya maphod an kalyom.

3Hanan makilalakin babain ihuyop di nalgom an lalaki ya humaul te malumiiy kalinan kay iyyukan ya kay lanan di oliba. 4Mu deket ihikug mu ke hiya ya loktat ta munholholtap kan paddungnay imminum kah mapait an apgu ya kay ka nagogod hi hinalong. 5Hanan lalakin miunud hi athidin babai ya ipangulunan babaih katayana ta e mihaad nah boblen di nate. 6Adina hangudon di maphod an pangi-eh kitaguwan. Paddungnay takon di adi maphod nan dalan ya logmonay ee ya uggena inilay pangayana.

7Kinali dakayun linalakin imbabalek, un-unudon yu tun tugun ku ya adiyu kal-iwan. 8Midawwi kayuh athidin babai ya adi kayu mih-up nah balena. 9Te deket adiyu un-unudon tun tugun ku ya adi dakayu lispituwon hi tatagu ya boltanon di udum an tataguy kinadangyan yun adi dakayu homkon. 10Athidiy maat an ahi alan di udum an tataguy limmu yu ya kinadangyan yu. 11Ne hanah udidin di biyag yun ammuna moy mahmahhuyop kayu te kimmakkapuy di adol yu ya namahig moy babawi yu. 12Ya ahiyu nuppe kalyon di “Makakkahmok pey nitaguwan te adita dumngol hi tugun. 13Uggek hinangud di tugun nadan nungkanomnoman, 14ta deyan kababain ot ya abu moy nitaguwak.”

15He-an imbabalek, itugun kun adim oddahan di inayam, iohham ke hiyay pamhod mu, umat hi punhagobam an iohham nah bubun mu. Adika e humagob hi bubun di udum. 16Hanadan imbabalem an ilaglag-am hi udum an binabai ya maid di kiatan dan he-a. 17Hay iimbabalem ya imbabale yun nah inayam an ustu bokon hi udum an babai. 18Hana ot ta mabendisyonan nan inayam an kalpuwan di imbabalem ya hana ot ta umamlong kan hiyan in-inem handih kat-agu ka. 19Hiya ya paddungna nan babain makawan makakkaphod di ang-ang na ya hana ot ta umamlong kah kinamaddikit na ya nan pamhod nan he-a. 20Kinali he-an imbabalek, adika maawis nah babain bokon mu inayan ya nah babain waday inayana. Tipe mo anhan ta e pinhodon di babain adina iohhah inayanay pamhod na?

21Hi APU DIOS ya tibtibbonan am-in di at-atton di tagu kinali inilanan am-in. 22Hanan gaga-ihon tagu ya nadan gaga-ihon inat nay kay bitun kaknaana. 23Adina pakannomnomon on inat na, ta hidiyey humlun hi katayana te adina disiplinaon di adol na.