1Gapu te tatagu dakayu ke APU DIOS an Dios yu ya deket ibaluwan yuy nate, adiyu punggogod di adol yu weno eyu mukmukan di tap-on di tuktuk yun umat hi aton di udum an tatagu, 2te tatagu dakayun APU DIOS an Dios yu. Dakayuy pinilinan am-in hi tatagu tuh lutan nabalol ke hiya.

3Adiyu kanon di nganneh diyen mibilang an adi malini. 4Datuwe nadan aggayam an mabalin an kanon yu: hay baka, kalnero, gulding, 5makawa, mailom an kalnero, mailom an gulding ya gasela, 6takon nadan aggayam an nagodway kukub dan panidwaon dan galgalon di kinan da. 7Mu adi mibilang an malini nadan aggayam umat hi kamel ya rabbit ya man-ut panidwaon dan galgalon di kinan da, mu ugge nagodway kukub da. 8Hanan babuy ya man-ut nagodway kukub na, mu adina panidwaon an galgalon di kinana ya adi mibilang an malini. Adiyu kanon weno dapaon di naten adol datuwen aggayam.

9Hanada ken mataguh danum an waday hiphip da ya ipeda ya damanan kanon yu. 10Mu nadan maid di hiphip na ya ipena ya adiyu kanon te adida mibilang an malini.

11Hanadan hamutin mibilang an malini ya damanan kanon yu. 12-18Mu wada nadan hamutin adinadaman kanon yu, dadiye ya tuldu, butbut, hay akup, nadan hamutin mangan hi adol di nate, hay gawwang, falcon, buzzard, ostrich, seagull, stork, heron, pelican, cormorant, hoopoe, littalit ya panniki.

19Ya am-in nadan insect an napayakan an dakol dan mungkukuyyug ya adi mabalin an kanon yu te mibilang dan adi malini. 20Mu wada nadan insect an napayakan an mibilang an malinin damanan kanon yu.

21Adinadaman kanon yuy datin naten aggayam te tagu dakayun APU DIOS an Dios yu. Idat yu weno igattang yu nadah hintaguwan an nakiboblen dakayu te mabalin an kanon da dadiye.

Ya adi mabalin an iha-ang yuy impan di gulding an pananum yuy gatas inana.

22Umappil kayuh katootoon hi mikapulun am-in hi inappit yuh intanom yu takon di page. 23Ie yu dadiyen page, mainum ya lanan di oliba nah pinilin APU DIOS an Dios yun pundayawan yun hiya ta eyu kanon hidi. Ya ie yuh di nadan namangulun lakin impan di kalnero ya baka yu ta gapun datuwen aton yu ya adalon yun mundayaw ya mangun-unud ta nangamung ke APU DIOS an Dios yu. 24Deket nidawwi nan pinilin APU DIOS an Dios yun eyu pundayawan ke hiya, 25ya damanan igattang yu dadiye ta nan pihhun nunggattangan yuy ie yuh di. 26Deket imme kayuh di ya gimmatang kayuh ngannen pinhod yun iappit, hay baka, kalnero ya hay ngannen mainum. Ta mun-an-anla kayu ya munhahamul kayu nadah pamilya yuh dih kad-an APU DIOS an Dios yu.

27Adiyu kal-iwan nadan holag Libay an nakiboblen dakayu te maid di lutan midat ke didah tawid da. 28Ie yuy mikapulun am-in hi in-appit yuh intanom yu nah poppog di mikatlun toon ta eyu idulin nah boble yu. 29Idat yu datuwe nadah holag Libay te maid nimpey nidat ke didah tawid da. Idatan yu damdama nadan tatagun nalpuh udum an boblen nakiboblen dakayu, nadan napuh-ig ya nadan nabalun ibbayun bimmoble ta waday kanon dat adida maagangan. Un-unudon yu datuwe ta bendisyonan APU DIOS an Dios yun am-in di aton yu.