1Raahileysse Yaaq'ubus uşax uxas dəxəmee, məng'ee yuçeys paxılıyvalla haa'a. Məng'ee adamiylk'le eyhen:
– Zas uşax hele, deşxhee, qiyk'asda!
2Yaaq'ub Raahileylqa qəllamişxha eyhen:
– Nya'a zıne vas uşax hidele, nya'a zı Allahne vor?
3Raahilee eyhen:
– Yizda nukar Bilyhan alert'e, məng'ı'ka g'alixhe. Məng'ee uşax uxumee zı mana alyar'tu mang'us yedyvalla haa'as, zı uşaxdena imeexvacenva.
4Raahilee cena nukar Bilyhan adamiys xhunaşşe yixhecenva heele. Yaaq'ubur məng'ı'ka g'ılexhana. 5Bilyhan vuxhne ayxu, mang'us dix uxu. 6Raahilee eyhen:
– Allah məhkamee yizde sural ıxha, yizın nıq' g'ayxhı, zas dix huvu.
Mançil-allad məng'ee mang'un do Dani (Mang'vee məhkamee havacesda) giyxhe.
7Raahileyna nukar Bilyhan meer vuxhne eexvaa, məng'ee Yaaq'ubus q'ör'esda dix uxooxa. 8Raahilee eyhen:
– Zı yuçeyka saç'iyku, Allahne kumagıka ğamiyxhana.
Məng'ee mançil-allad uşaxın do Naftali (yizın saç'iykvuy) giyxhe.
9Leaysse sabara gahna uşaxar uxooxas vəvxü deş. Məng'ee mançil-allar cena nukar Zilypan Yaaq'ubus xhunaşşe yixhecenva heele. 10Leayne nukaree Zilypanee Yaaq'ubus sa dix uxu. 11Leayee eyhen:
– Nimee xəbna xoşbaxtiyvallayiy!
Məng'ee mang'un doyud Qad (xoşbaxtiyvalla) giyxhe.
12Leayne nukaree Zilypanee Yaaq'ubus q'ör'esda dix uxu. 13Leayee eyhen:
– Zı baxtivarır, yadaaşed zak'le baxtivarva eyhes.
Məng'ee uşaxın do Aşer (baxtivar) giyxhe.
14Ruvenık'le suk qiviyşalne gahıl çolead mandragorun ala iveeke, mang'vee manbı yedis Leays adayle. Raahilee Leayk'le eyhen:
– Yiğne duxee adıyn mandragorbışike zasıd helelan.
15Leayee məng'ı'k'le eyhen:
– Adamiy xılençe g'ayşuy ç'əvxha dişdee? Həşded duxayn mandragorbıne g'ayşes ıkkan?
Raahilee eyhen:
– Həməxüdxheene, hasre duxayne mandragorbışil-alla ine xəmdiys yizda adamiy vaka g'alixhecen.
16Yaaq'ub exheeqana çoleençe qööngə, mang'unee ögeeqa Lea qığeyç'u eyhen:
– Ğu g'iyna zaka g'alixhas, yizde duxee adıyne mandragorbışis zı ğu alişşu.
Yaaq'ub mane xəmde məng'ı'ka g'ılexha. 17Allahık'le Leayna düə giviyxhena. Lea vuxhne ayxu, Yaaq'ubus xhor'esda dix uxu. 18Leayee eyhen:
– Allahee zı yizda nukar yizde adamiys hiyvuy höötxüva, yizda hək' quvuna.
Məng'ee uşaxın do İssaxar (Mang'vee hək' quvuna) giyxhe.
19Leaye meer vuxhne eexvaa, məng'ee Yaaq'ubus yixhır'esda dix uxooxa. 20Məng'ee eyhen:
– Allahee zas sa yugna pay huvu. Həşde yizde adamee zas hı'rmat gyuvxhesda. Zı mang'us yixhıyre dix uxuva.
Məng'ee uşaxın do Zevulun (hı'rmat) giyxhe.
21Sabara gahıle məng'ee sa yiş yuxu, doyud Dina giyxhe.
22Allahee Raahile yik'el qiyelee'e, məng'ı'na düə g'avxhu, uşax uxasın xhinne qee'e. 23Mana vuxhne ayxu sa dix uxu eyhen:
– Allahee zalin pisın do ak'ani'iyn.
24«Allahee zas sayir dix helecenva» uvhu, Raahilee mang'un do Yusuf (Mang'vee sayir helecenva) giyxhe.