1Ka m nye malek titaꞌar siꞌa ka o yi arazana ni sigid na. Ka saŋgbauŋ daa ligil o wenne fuug ne, ka saa dindeog buenn gilig o zug. Ka o nindaa wenne nintaŋ ne ka o noba wenne bugum zaꞌantolis ne. 2Ka o daa mor gbauŋbil dine laki o nuꞌugin. Ka o datiuŋ nobir no ateuk, ka o dagobug nobir no teŋ. 3Ka o tans ne kukotitaꞌar line wenne gbigim kaasug ne. Ka on daa tansi naae, ka satansida ayopoi daa tansi siak. 4Ka ban pianꞌ naae la m daa bood ye m sob. Amaa m daa wum ka kukor pianꞌ yi arazana ni na ye, m suaꞌam dine ka satansida ayopoi la yel la. Ka ye m da sobi lii.

5Ka malek one ka m nye ka o ziꞌe ateukun ne teŋin la zianki o datiuŋ nuꞌug kpaꞌ saazug, 6ka po ne Winaꞌam one be saŋa dine kaꞌ benne ka maal saazug ne dunia ne ateuk ne bun lin wusa bee ba ni la, ye, li ku lem yuuge. 7Ka malek one peꞌesa ayopoi la yaꞌa ti piebi o naꞌatan, Winaꞌam na zaŋi o potenꞌesuaꞌadir la tumi li tuuma, wenne one da yeli o nodiꞌesidib bane aa o tumtumnib la siꞌem la.

8Ka kukor kan ka m wum ka li pianꞌ arazana ni n tisi m, lem pianꞌ tisi m yaꞌas n ye, m kem diꞌe gbauŋ dine laki be malek one ziꞌe ateukun ne teŋin la nuꞌugin.

9Ka m daa keŋ malek la saꞌan n yel o ye o tisim m gbauŋbil la. Ka o yeli m ye m nokimi li n di. Ye ka li na kilim toog m poogin. Ka ye amaa li na malis wenne siind m noorin. 10Ka m diꞌe gbauŋbil la o nuꞌugin n dii li. Ka li malis wenne siind m noorin. Amaa man vol la, li kilim ne toog m poogin.

11Ka soꞌ yeli m ye, asee ka m lem diꞌe Winaꞌam pianꞌad n tis nidib yaꞌas. Ye ka Winaꞌam pianꞌad la ane buudi ne teŋgbana ne pianꞌad ne naꞌanam bedego yela.