1Ka Yesu loꞌoŋ Galilee beuŋ line a Tiberias beuŋ la. 2Ka nidib bedego dol o, bozugo ba nye o tuumnyalima ban ka o maal n tis banꞌadnam la. 3Ka Yesu du zuer zug n zinꞌin anina ne o nyaꞌandolib. 4Kuꞌum malek gaadug tienr maluŋ dabisir saŋa daa liꞌelne.

5Ka Yesu gorigi o zug, ka nye nidib bedego bane kenne o saꞌan la na ka buꞌos Filip ye, “Yaa ni ka ti na nye diib n daꞌ n tis nidib nwa, ka ba di?” 6O yel nwa ne ye o mak o n gos, bozugo o meŋ miꞌ on na niŋ siꞌem.

7Ka Filip lebis o ye, “Ligidi yaꞌa kun zuꞌe siꞌem li ku nyaŋe daꞌ diib ka nidib nwa nye biꞌel biꞌel n nyiꞌige.”

8Ka Yesu nyaꞌandol yinni, on yuꞌur buon Andrew, Simon Piita baꞌabiig la, yel o ye, 9“Biribiŋ be kpela n mor bodobodo anu ne zimbibis ayi. Ka nwa na niŋ nidib bedego nwa bo?”

10Ka Yesu yel ye, “Keli ka nidib la zinꞌin.” Mood bedego daa be zinꞌikan la. Ka dap la zinꞌin. Ba kal daa ane wuu tusa nu. 11Ka Yesu diꞌe bodobodo la n puꞌus Winaꞌam bareka, ka pudug n tis nidib bane zinꞌi la, ka niŋ ala ne zimi la men. Ka ba wusa dii tig.

12Ka ban di tig la, ka o yel o nyaꞌandolib la ye, “Laꞌasem bodobodo line kpelim la, ka da ke ka siꞌel saꞌam.” 13Ka ba vaae dizoris la wusa. Ka li peꞌel peed piinayi. Li ane bodobodo anu la dizoris ka ba vaae, nidib la di naae la nyaꞌaŋ.

14Dinzugo nidib bama nwa n nye Yesu tuumnyalima la, ka ba yel ye, “Ameŋa, o sid ane Winaꞌam nodiꞌes one ka ba da yel ye, o na kenn dunia ni na la.” 15Ka Yesu baŋ ye ba na gbanꞌ o, n diis o naꞌam la, o leb n keŋ zueya baba o konꞌo konꞌ.

16Ka zaamnoor ka o nyaꞌandolib la sig beuŋin na 17ka kpenꞌ aaruŋin loꞌoŋid beuŋ la n tuꞌae Kapeenum teŋin. Ka yuꞌuŋ sobid ka Yesu nam pu keŋi ba saꞌane. 18Ka sisiꞌetitaꞌar daꞌad kuꞌom la duꞌosid kuꞌopila. 19Ka ban gaad ne ba aaruŋ la n keŋ wuu mail atanꞌ bee anaasi la, ka nye ka Yesu ken kuꞌom la zug n liꞌel aaruŋ la ka li lidigi ba. 20Yesu yeli ba ye, “Li ane man. Da zoti dabiem.” 21Ka ba mor sumalisim ka siak ye o kpenꞌ aaruŋ la. Ka toꞌoto yim ka ba kpelim paae zinꞌikan ka ba da waꞌae la.

22Ka beug nie ka nidib bane kpelim beuŋ la gbekaŋa la nye ka aaruŋ yinni maꞌaa be, ka ba me miꞌ ye Yesu sa pu kpenꞌ aaruŋ ne o nyaꞌandolib la, amaa ba bas o ne ka keŋ. 23Ka aaruma sieba yi Tiberias keŋ ziꞌe kpiꞌe zinꞌikan ka Zugsob la sa tis Winaꞌam bareka puꞌusug ka ke ka nidib di diib la. 24Ka nidib la pu nye Yesu ka o be anina bee o nyaꞌandolib la, dinzug ba kpenꞌ aaruma ni n keŋ Kapeenum n ied o.

25Ka nidib la nye Yesu ka o be gbekaŋa la ka buꞌos o ye, “Paꞌana, saŋkane ka fu kenn kpela na?”

26Ka o lebisi ba ye, “Asida ka m yeti ya ye, ya iedne man yanam onb bodobodo n tig la zug, ka li kaꞌane m tuumnyalima ban ka ya nye la zugo. 27Da tum ye ya diꞌe dikane na saꞌam, amaa lee tumme n diꞌe dikane na yuug ka tisid nyovur kane kaꞌ naare. Mam, Ninsaal Biig la, na tisi ya dikaŋa, bozugo m Baꞌ Winaꞌam gaŋi m ka li paꞌal ye m paae o yaꞌam.”

28Ka ba buꞌos ye, “Ti na niŋ wala ka tum Winaꞌam tuuma?”

29Ka Yesu lebisi ba ye, “Tuumkane ka Winaꞌam bood ane ye ya siak one ka o tum la na.”

30Ka ba buꞌos o ye, “Ka tuumnyaluŋ bo ka fu maal ka li zanbin ka ti na nye ka niŋ uf yadda? 31Ti yaanam da di dikan ka ba buon ye manna la moogin wuu lin sob siꞌem ye, ‘O tisi ba dikane yi arazana ni na ka ba di.’ ”

32Ka Yesu lebisi ba ye, “Asida ka m yeti ya ye, li kaꞌane Moses n da tisi ya dikane yi arazana ni na laa, ka ane m Baꞌ Winaꞌam tisidi ya diib ameŋa line yi arazana ni na la. 33Ka dikane ka Winaꞌam tisi ya la ane line yi arazana ni sig na, ka li tisid dunia dim nyovur.”

34Ka ba yel o ye, “Zugsoba, tisimi ti dikaŋa saŋa wusa.”

35Yesu lebisi ba ye, “Mane a nyovur diib la. One mekama keenn m saꞌan na, koꞌom ku gbanꞌe oo, ka one me lem niŋi m yadda, kuꞌonuud ku mor oo. 36M deŋim yeli ya ye ya nye m, ka laꞌam ne wala ya pu niŋi m yaddaa. 37Ban wusa ka Winaꞌam tisidi m keenn m saꞌan na. Ka one ken ne m saꞌan na m ku kad o basi; 38ka m yi arazana ni sig na ye m tum ne one tum man la boodim ka kaꞌ m meŋ boodim. 39Ka one tum man la boodim ane anwa, ye on tisi m ninsieba wusa la, ye m da ke ka baa yinni bodige. Amaa o lee bood ye m vuꞌugi ba wusa dunia naar daar la. 40Ka m Baꞌ la boodim ane neꞌeŋa ye one mekama nye Biig la ka niŋid o yadda na nye nyovur kane kaꞌ benne, ka m na vuꞌug o dunia naar daar la.”

41Ka Jew dim nyon ne o, on yel ye, “Mane a dikane yi arazana sig na la zug.” 42Ka ba buꞌos taaba ye, “Dau kaŋa nwa kaꞌane Josef biig Yesu, one ka ti miꞌ o baꞌ ne o ma laa? Ka li niŋ wala ka o yuꞌun yel ye o yine arazana ni na.”

43Ka Yesu yeli ba ye, “Da nyonini ya lema nii. 44Soꞌ kaeꞌ na nyaŋe keenn m saꞌan naa li yaꞌa kaꞌa ye m Baꞌ one tumi m na la niŋi li. Ka m na vuꞌug o dunia naar daar la. 45Ka Winaꞌam nodiꞌesidib da sob ye, ‘Winaꞌam na zamis nidib wusa.’ On mekama wum ka zamis m Baꞌ yela kenne m saꞌan na. 46Soꞌ kaeꞌ nye m Baꞌ laa, li yaꞌa kaꞌa one yi Winaꞌam saꞌan na, on gullim nye o. 47Asida sida ka m yeti ya ye, one niŋi m yadda mor nyovur kane kaꞌ benne. 48Mane a nyovur diib la. 49Ya yaanam da di dikan ka ba buon ye manna la moogin ka laꞌam ne wala ba kpiya. 50Dikane yi arazana ni sig la na ane anwa ye saal na dii li ka ku kpii. 51Mane a dikane voe ka yi arazana ni sig na la ka soꞌ yaꞌa di dikaŋa o na voe saŋa mekama. Ka dikane ka m na tis ka dunia dim mor nyovur ane m niŋgbiŋ.”

52Ka Jew dim la nwaꞌas taaba yet ye, “Dau kaŋa na niŋ wala tisi ti o niŋgbiŋ ka ti di?”

53Ka Yesu yeli ba ye, “Asida sida ka m yeti ya ye, asee ka ya di Ninsaal Biig la niŋgbiŋ ka nuu o ziim, ka yaꞌa ka alaa ya pu mor nyovure. 54One di m niŋgbiŋ ka nuu m ziim mor nyovur line kaꞌ naare, ka m na vuꞌug o dunia naar daar la. 55Ka m niŋgbiŋ ane diib ameŋa ka m ziim a bun nuudir ameŋa. 56One di m niŋgbiŋ ka nuu m ziim kpelim a yinni ne mam ka mam me a yinni ne on. 57M Baꞌ soꞌe nyovur ka tumi m na ka on zug ka m voe, ala men ka one di mam niŋgbiŋ, na voe mam zug. 58Neꞌeŋa a dikane yi arazana ni sig na, ka li kaꞌane wuu dikane ka ya yaanam da di ka kpi laa. Amaa one di dikaŋa la, na voe saŋa wusa.” 59O yel neꞌeŋa ne on daa paꞌan nidib Kapeenum laꞌasug doogin la.

60Ka o nyaꞌandolib la bedego n wumi li la, ba yel ye, “Paꞌalkaŋa toe. Anoꞌon na tunꞌe diꞌe li?”

61Ka Yesu baŋ o potenꞌerin ye o nyaꞌandolib la nyoni li yela la ka yeli ba ye, “Ya noki li ka li ane poꞌogire? 62Ka ya yaꞌa nyeen ka Ninsaal Biig la dutin zinꞌikan ka o da been la ya na niŋin wala? 63One tisid nyovur la ane Winaꞌam Siig Suŋ, ka niŋgbiŋ la ane zaalim. Pianꞌakan ka m pianꞌ tisi ya la tisid Siig ne nyovur. 64Amaa ya sieba be ka pu siake.” Yesu yel nwa bozugo o deŋim baŋ pinꞌilugin sa bane pu niŋ o yadda ne one na ti zam o la. 65Ka o lem yel ye, “Neꞌeŋa yela ka m daa yel ye, soꞌ ku nyaŋe keenn m saꞌan na asee m Baꞌ la na tis suer.”

66Ka neꞌenam nyaꞌaŋ o nyaꞌandolib titaꞌam sa buaki keŋ ka pu lem dol o yaꞌase.

67Yesu buꞌos o nyaꞌandolib piinayi la ye, “Yanam me na bood ye ya keŋe.”

68Ka Simon Piita lebisi buꞌos o ye, “Zugsoba, ti ye ti keŋe anoꞌon saꞌane? Fune mor pianꞌakane tisid nyovur kane kaꞌ ben la. 69Ka ti siaki li ka baŋ ye, fun maꞌaa a niŋkane a suꞌum nyain ka yi Winaꞌam saꞌan na la.”

70Ka Yesu lebisi buꞌosi ba ye, “Kaꞌa mane gaŋi yanam piinayi la laꞌam ne wala ya yinni a Sutaana nidaa?” 71O da pianꞌ neꞌeŋa Judas one a Simon Iskariot biig la yela. O da ane nyaꞌandolib piinayi la nid yinni one da na ti zam o.