1Winaꞌam a siꞌem la, ya me aa ala, wuu biis bane ka ba saam noŋ la. 2Ka more noŋir wuu Kiristo noŋi ti siꞌem la, ka pesig o meŋ n maal maan suŋ n tis Winaꞌam ti yela la.

3Da ke ka poꞌasaꞌuŋ ne dausaꞌuŋ ne dianꞌad wusa ne yaꞌamleog kudum pudug li yuꞌure, yaname sadigim a Winaꞌam nidib la. 4Ala mene da more pianꞌayood ne galim yood line pu dol suere, amaa lee puꞌusum Winaꞌam bareka. 5Baŋimi neꞌeŋa ye poꞌasaꞌuŋ sob bee dausaꞌuŋ sob bee dianꞌad sob bee fufum sob ku di faar Kiristo ne Winaꞌam soꞌolim la nii. Ka one mor fufum wenne baꞌamaan ne.

6Neꞌenam zug, ka Winaꞌam sunf pelig ne bane zanꞌas o noor la. Dinzugo, da ke ka soꞌ maꞌa ya ne pianꞌa zaalise. 7Da laꞌas ne baa.

8Saŋsiꞌen sa ya da bene likin, amaa ya yuꞌun be ne neesim ni ka a yinni ne Zugsob la. Linzug, niŋimi wuu bane be neesim ni n niŋid siꞌem la. 9Ka neesim beilim nyood ane popielim ne yelsida ne yelsum wusa. 10Ka kpeꞌeŋi baŋi line maꞌed Zugsob la suunr. 11Ka da ke ka ya baꞌa be ne likin tuuma line kaꞌ nyood laa, amaa viigimini ba gbin, 12ka li mor nyan hale ne soꞌ na pianꞌ line ka ba suaꞌ niŋid la. 13Ka ba yaꞌa viig siꞌel gbin likin n yiisi li paalo ni, li paꞌal lin a siꞌem la nyain nyain. 14Ka line nied wusa liebidne nyain. Dinzug ka li sob ye,

15Guꞌusimi ne ya meŋ ne ya beilim a siꞌem. Maalimi ne wuu bane mor yaꞌam ka kaꞌa wuu bane kaꞌa yaꞌam, 16ka ya yaꞌa nye suer yanam niŋim line a suꞌum, ka saŋa la ane tuumbeꞌed saŋa. 17Dinzugo da ae zon ne, ka baŋimi Zugsob la boodim a siꞌem.

18Da nuud daam kooleyaa, ka li ane tuum yaalis. Amaa keli ka Winaꞌam Siig Suŋ peꞌeli ya. 19Pianꞌami tisimi taaba ne yuuma bane sob Winaꞌam gbauŋin, ne yuuma bane ka Winaꞌam nidib sob, ne yuuma bane ka Winaꞌam Siig Suŋ tis, ka yuꞌum yuuma wusa zunꞌod Winaꞌam yuꞌur ne ya sunf wusa. 20Ka siꞌel mekama ni, puꞌusimi ti Baꞌ Winaꞌam bareka ne ti Zugsob Yesu Kiristo yuꞌurin saŋa mekama.

21Siakimi taaba noya, yaname naꞌasid Kiristo la.

22Poꞌaba, siakimini ya sidib noya wuu yaname siakid Zugsob la noor siꞌem la. 23Ka sid la soꞌe poꞌa la wen wuu Kiristo soꞌe Winaꞌam nidib siꞌem la, bane aa o niŋgbiŋ line ka o faaenn la. 24Ka Winaꞌam nidib sadigim siak Kiristo noor la, poꞌab me niŋimi ala mene n tisimi ba sidib yela mekama wusa ni.

25Sidiba, noŋimini ya poꞌab wuu Kiristo noŋ Winaꞌam nidib ka pesigi o meŋi tisi ba yela la. 26O niŋ ala ye o gaŋi ba ka ba a Winaꞌam din ka suu ba Winaꞌam kuꞌom ka ba a nyain labasuŋ la ni, 27ye o zaŋi ba ka ba a yinni keŋi o meŋ tuon ka a nyain ka gbada kaeꞌ wen wuu poꞌa kun sid ne venlim pilpil ka siꞌel kaeꞌ saꞌami o venlim la. 28Ala mene sidib noŋimi ba poꞌab wuu ba meŋ niŋgbiŋ ne. Ka one noŋi o poꞌa noŋi o meŋ. 29Ka soꞌ kaeꞌ kisi o meŋ niŋgbinaa. O lee diisidi li ne ka gosidi li wuu Kiristo niŋid siꞌem n tisid Winaꞌam nidib la, 30tiname a o niŋgbiŋ wila la zug. 31Linzug ka li sob ye, “Dau na basi o baꞌ ne o ma ka toꞌoŋ ne o poꞌa ka ba bayi la lieb niŋgbiŋ yinni.” 32Neꞌeŋa ane yelsuaꞌadir titaꞌar ka m baŋ ka li gbin ane Kiristo ne Winaꞌam nidib la yela. 33Keli ka ya wusa yinni yinni noŋi o poꞌa wuu o meŋ ne. Ka poꞌa la me naꞌasimi o sid.