1Baŋim neꞌeŋa. Li na toe hale n tis Winaꞌam nidib, dunia naar saŋa la, 2nidib na a bane noŋi ba meŋ, ne bane noŋ ligidi hale, ne bane nweꞌedi ba nyoꞌog, ne bane mor nyeesim, ne bane tuꞌud nidib, ne bane pu siakid ba saamnam ne manam noya, ne bane pu mor bareka puꞌusum, ne bane pu dol Winaꞌam suere 3ne bane pu noŋ ban laꞌam kpin sieba, ne bane pu mor soꞌ nyoogo, ne bane saꞌami ba taaba yuda ne bane pu gbanꞌadi ba meŋa, ne bane ka ba taaba zoti ba dabiem, ne bane kis line a suꞌum, 4ne filim filim dim, ne haya dim, ne titaꞌalnam ne bane bood line na maꞌedi ba meŋ sunya n gaad Winaꞌam la. 5Ba niŋidne wuu ba dolne Winaꞌam suer, amaa ka pu paꞌani li paŋa. Zanꞌasim nimban nam buudi.

6Ka ba sieba suaꞌadi kpenꞌed yaani maꞌad poꞌab bane kaꞌ yaꞌam, ka tuumbeꞌed peꞌeli ba, ka ba yaꞌamleog nyaŋedi ba, 7ka ba kelisid soꞌ mekama ka ku nyaŋe baŋ line a sida laa, 8ka li wen wuu Jannes ne Jambres da zanꞌas Moses siꞌem la. Ala men ka nimbama me zanꞌasid sida la, bane ka ba tuumbeꞌed saꞌami ba yaꞌam, ka ba pu niŋ Yesu Kiristo yadda ne sidaa. 9Amaa nidib wusa na nye ka ba ane zon wuu Jannes ne Jambres ka ba tuuma ku keŋ tuone.

10Fu miꞌ m paꞌalug la wusa ne m tuuma niŋir ne m beilim potenꞌer, ne m yadda niŋir, ne suguru ne m noŋilim ne m modigir, 11ne m namisug Yesu dollim yela, ne m fara. Fu miꞌ line niŋi m Antiok teŋin, ne Ikonium teŋin, ne Listra teŋin, ne ban namisi m siꞌem Yesu yela la. Ka Zugsob la faann m neꞌeŋa wusa ni. 12Asida ka m ye bane wusa n bood ye ba dol Winaꞌam n a yinni ne Yesu Kiristo, ba na namisi ba. 13Ka nimbeꞌednam ne zam dim tuumbeꞌed na kpelim peꞌesid hale, n maꞌad nidib ka ba kpenꞌesidi ba meŋ damaꞌamin. 14Amaa fu nee, kpelim tenr lin ka fu zamis ka siak la kiŋ kiŋ; 15ka fu miꞌ bane saꞌan ka fu zamisi li. Ka fu biilimin sa fu baŋ Winaꞌam gbauŋ suꞌuŋa line na nyaŋe tis uf yaꞌam ye fu niŋ Yesu Kiristo yadda ka nye faangir. 16Ka Winaꞌam gbauŋ wusa yine o saꞌan na ka suŋidi ti n tisidi ti popielim paꞌalug ne saꞌalug line bigisid beꞌed ne suꞌum ne zamisug wusa. 17Dau kane dol Winaꞌam na naae o zamisug, ka tiꞌeb ne tuumsuŋ wusa.