1Ti baꞌabiise, ti bood ye ya baŋ Winaꞌam popielim tum siꞌel Winaꞌam nidib bane be Masedonia teŋin la saꞌan. 2Ba daa nye makir bedego ba yeltood poogin ka o popielim la lee ke ka ba mor sumalisim bedego, ka sumalisim la ke ka ba nok ligidi bedego n tis ne ba sunf wusa ye ba suŋ Winaꞌam nidib laꞌam ne ban daa a noŋ dim la. 3M nyaŋe yeli ya ye ba daa tis ka li zemis ba paŋ tunꞌe siꞌem, hale ka li gaad ala. 4Ka ba daa sosi ti bedego ne ba meŋ boodim ye ti tisi ba suer ne yelsum ye ba laꞌam suŋ Winaꞌam nidib sieba la. 5Ka daa niŋ ka li gaad tiname tenꞌes siꞌem la. Ka yiiga ba daa zaŋi ba meŋ tis Zugsob la laꞌam ne tinam men, ka li dolne Winaꞌam boodim. 6Dinzugo ti kpeꞌeŋ Titus one pinꞌil ligidi laꞌasug tuuma ya saꞌan la ye o suŋi ya ka ya naae popiel tuumkaŋa la. 7Ya mor yelsum bedego ya zut, ka niŋ Kiristo yadda bedego ka tunꞌe pianꞌ Winaꞌam yela suꞌuŋa ka mor Winaꞌam miꞌilim bedego ka tiaꞌ ye ya suŋ nidib ka noŋi ti bedego. Kpeꞌeŋimi ya meŋ n me tum popiel tuumkaŋa bedego men.

8M pu yet nwa ne m paŋa. Amaa m zaŋ ne ninsieba n tum siꞌel la ye m maki baŋ ya sida noŋilim zem siꞌem. 9Ya miꞌ ti Zugsob Yesu Kiristo popielim a siꞌem. Hale laꞌam ne on daa a yelsum wusa daan la, o da lieb noŋ daan yanam suꞌum nyeeb zug. Ka li ane on lieb noŋ daan la ke ka yanam lieb yelsum dim.

10M ye m yeli ya man tenꞌes yelkaŋa siꞌem. Ye, li a suꞌum ka ya yuꞌun naae tuumkan ka ya daa pinꞌili tum yuum sa la. Ya daa bood bedego ye ya pinꞌili li. 11Ka li a suꞌum ka ya me bood nannanna ye ya naae li, ka li zemisi ya pinꞌilugin boodim la. Keli ka ya tisib la zemis yaname mor siꞌem. 12Soꞌ yaꞌa mor boodim ye o tis piini, Winaꞌam diꞌed o piini siꞌem la dolne one na tis ka li zemis on mor siꞌem, ka kaꞌane one pu mor siꞌem laa.

13Ti boodim kaꞌa ye ti yiis sieba ba namisugin ka li lebig pakir tisi yaa. Amaa li suꞌum ye li zem taaba. 14Ka yaname mor bedego nannanna la, suŋim bane a noŋ dim la. Ban me na ti mor bedego ka suŋi ya, ya boodim saŋa. Ka anwa ka ya wusa na zem taaba. 15Li dolne lin da sob Winaꞌam gbauŋin siꞌem la ye,

16Ti puꞌus Winaꞌam bareka one ke ka Titus mor potenꞌer ye o suŋi ya wuu tiname mor potenꞌer siꞌem la. 17O daa siaki ti kpeꞌeŋir la ka me daa mor potenꞌer ye o suŋi ya, ka gbanꞌe ne o meŋ boodim ye o keenn ya saꞌan na. 18Ka ti ye ti tum ti baꞌabiig soꞌ ye on ne Titus kena. O ane on ka Winaꞌam nidib wusa naꞌasid o on tum siꞌem ka moon labasuŋ la zug. 19Ka laꞌam ne neꞌ, ba me gaŋ o ye o giligid ne tinam ka suŋidi ti ne popielim tuumkaŋa. Ti tum popielim tuumkaŋa ye ti tis Winaꞌam naꞌasi, ka sid paꞌal ye ti bood ye ti suŋ. 20Ti guꞌusidi ti meŋ ye soꞌ da pianꞌ beꞌed tinam niŋ siꞌel ne piintitaꞌar kaŋa la yelaa, 21ka bood ye ti niŋ line a suꞌum Winaꞌam tuon ne ninsaalib saꞌan men.

22Ka ti ye ti tum ti baꞌabiig soꞌ yaꞌas ne ba. Ti daa nye on tum siꞌem saŋa bedego ka baŋ ye o tiaꞌ ye o suŋ. Ka nannanna o mor potenꞌer bedego ye o suŋi ya, on miꞌ suꞌuŋa ye ya na niŋ tiname yeli ya siꞌem la zug. 23Ka li yaꞌa aa ti baꞌabiig Titus yela, o ane m tumtum tiraan one tum ne man ye ti suŋi ya. Ka li yaꞌa aa ti baꞌabiis bane ye ba dol o la yela, ba ane bane ka Winaꞌam nidib tum la, ka ke ka Kiristo nyet naꞌasi. 24Paꞌalimini ba ya noŋilim, ka Winaꞌam nidib nye ka baŋi li, ka me baŋ ye tinam yiti nweꞌed nyoꞌog ya yela la a sida.