2Toe inahareo avao ro ondaty,

vaho hitrao-pihomak’

ama’ areo ty hihitse.

3Fa toe mahilala ka raho,

tsy inahareo avao;

Tsy zai’ areo raho.

Ia ty tsy mahafohiñe o raha rezao?

4Fiankahafa’ o rañekoo raho:

Kanjie’e t’i Andrianañahare,

vaho toiñe’e,

Fitohafañe i vañoñe tsy aman-kilay.

5Tsambolitio’ ty miagaregañe ty failo,

ie nihentseñañe ho a

o mipolititse am-pandiao.

6Mierañerañe ty kiboho-malaso,

le tsi-añoleñañe ty manigìk’ an’Andrianañahare,

o mitintiñe ty ndrahare’e am-pità’eo.

7Fe añontaneo o bibio,

hampandrendreha’ iareo;

naho o voro-mitiliñeo,

hitalilia’ iareo;

8ke misaontsia ami’ty tane toy,

hañòha’e azo,

apoho hitaroña’ o fian-driakeo.

9Ia amy rezay ro tsy mahafohiñe t’ie

nanoem-pità’ Iehovà?

10Kila am-pità’e ao ty fiai’ ze veloñe,

naho ty kofò’ ze hene ondaty.

11Tsy mpitsò-bolañe hao ty ravembia, manahake ty fitsopehan-dañilañy

ty mahakama?

12Amo antetseo hao ty hihitse,

amo lava’ androo hao ty hilala?

13Aman’Añahare o hihitse naho haozarañeo; ama’e o fanoroañe naho hilalao.

14Heheke, mandrotsake re,

le tsy hamboareñe ka;

agabe’e ao t’indaty,

vaho tsy ho hahañe ka.

15Hehe te kalaña’e o ranoo, le maike;

irahe’e ka iereo, le añinahinà’e ty tane.

16Ama’e ty hafatrarañe naho ty hilala;

aze ty finitake naho ty mpamitake

17Ampañaveloa’e tsy aman-kana

o mpanoroo,

vaho ampigege’e o mpizakao.

18Abala’e ty kitambem-panjaka

vaho diaña’e sokotry ty vania’e.

19Asese’e tsy aman-kana o mpisoroñeo naho gorè’e ty fanalolahy.

20Ampitsiñe’e ty lañona’ o matoeo, naho afaha’e ty hilala’o antetseo.

21Ampidoaña’e inje o ana-donakeo naho abala’e ty sadia’ o maozatseo.

22Ventabentare’e o raha mietak’ añ’ieñeo, aboa’e an-kazavàñe o talinjon-kavilasio.

23Onjone’e o fifeheañeo naho rotsahe’e; atratrañahe’e o fifelehañeo

vaho asese’e an-drohy añe.

24Ampimotsoe’e arofo

o mpiaolo’ ty tane toio,

vaho ampirerererè’e an-dratraratra

tsy aman-dalañe añe.

25Ie mijimejime añ’ ieñe ao

tsy an-kazavàñe;

midaleandaleañe hoe jike.