1Nahabweki ngoku muli baana baa Luhanga aba aku̱ndi̱ye kwonini, mutwalikani̱ye ngoku eye akutwalikani̱yagha. 2Kandi muukale mukundangaane ngoku Ki̱li̱si̱to aatu̱ku̱ndi̱ye eehaayo nga kihonguwa ku̱tu̱kwi̱la kandi eki Luhanga asi̱i̱mi̱ye.

3Hatalibʼo mu̱hi̱ki̱li̱ja nʼomui oghu aku̱syana mu mulingo ghwona, kedha kuba na kweghomba ku̱bhi̱i̱hi̱ye, kedha mululu, nanga taki̱hi̱ki̱ye bantu baa Luhanga bahi̱ki̱li̱i̱ye kukola ebi. 4Kandi tamubhonganuuwe kuba eghi na kalimi kabhi̱i̱hi̱ye, ku̱bu̱gha bintu byakidhoma-dhoma, kedha kusandaala ku̱bhi̱i̱ye, ebi tabibabhonganuuwe bbaa, bhaatu muukalaghe ni̱mu̱si̱i̱ma Luhanga. 5Nanga mumani̱ye ngoku ataliyo mu̱syani̱, kedha oghu akukola bikoluwa bi̱bhi̱i̱hi̱ye, kedha wa mululu ghwa bintu oghuli nga kulami̱ya bisasani̱, oghu aliba mu bu̱lemi̱ bwa Ki̱li̱si̱to hamui na Luhanga. 6Mutasi̱i̱ma muntu nʼomui kubadimaaga na bighambo ebitali na mutuwe na maghulu, nanga bintu ngʼebi niibiyo bikuleka Luhanga naafubila bantu abamujeemeeye na ki̱i̱ni̱gha. 7Nahabweki muleke kuba mu bumui na bantu aba.

8Hambele mukaba muli nga bantu abali mu mweli̱ma nanga mukaba mutamani̱ye Luhanga, bhaatu endindi haabwa ku̱hi̱ki̱li̱ja Mukama muli nga bantu bali mu kyeleeli̱. Mwetwalikani̱ye nga bantu abali mu kyeleeli̱. 9(Nanga muntu oghu ali mu kyeleeli̱, akukolagha bilungi, bi̱hi̱ki̱ye, kandi byamajima.) 10Mutʼo ku̱lu̱ na nkokolo kukola ebi̱dheedhi̱ye Mukama. 11Mutakolagha bikoluwa bi̱bhi̱i̱hi̱ye bya mweli̱ma, ebitali na mughaso, bhaatu mwolekaghe bbeni̱-bbeni̱ ngoku bili bibhi. 12Nanga bintu ebi abatahu̱ti̱i̱ye Luhanga bakukolagha mu ki̱bi̱so na ku̱bi̱bu̱ghʼo kwonkaha kukukwati̱yagha nsoni̱. 13Bhaatu ebikukwati̱yagha nsoni̱ ebi, kyeleeli̱ kyamajima ghaa Luhanga kikaakubyolekagha, bantu bamanya bbeni̱-bbeni̱ ngoku bili bibhi kwonini. 14Nanga kintu kyona eki kyeleeli̱ kyoleki̱ye bantu bakukibonagha bbeni̱-bbeni̱. Niikiyo kikulekagha bantu baghila bati,

15Nahabweki mwelinde mu mitwalikani̱i̱ye yaanu, muteetwalikani̱ya nga bantu badhoma-dhoma, bhaatu nga bagheji, 16mu̱koleesi̱ye kulungi bwile obu muli na buwo buni, nanga bilo bini bantu bahingulaane kukola bikoluwa bi̱bhi̱i̱hi̱ye. 17Muteetwalikani̱ya nga badhoma-dhoma, bhaatu mwetegheeleli̱ye ebi Mukama Ki̱li̱si̱to akubbalagha ati mukole. 18Muteeha tamiilo ya vi̱i̱ni̱ eghi ekubaleeteleja bughuwa-ghuwa. Mu ki̱i̱kalo kyʼeki, muleke Mwoyo Ahi̱ki̱li̱i̱ye aliiye aakala mu bwomi̱i̱li̱ bwanu kwonini. 19Muukalaghe nimulimbila hamui Jabbu̱li̱ na bilimbo bya mwoyo. Mulimbaghe na mitima yaanu yoona bilimbo byakusinda Ki̱li̱si̱to Mukama waatu. 20Bwile bwona mu̱si̱i̱maghe Luhanga Eseetu̱we haabwa byona, mu li̱i̱na lya Mukama waatu Yesu Ki̱li̱si̱to.

21Mudhootelangane kwoleka ngoku mu̱hu̱ti̱i̱ye Ki̱li̱si̱to.

22Enu̱we bakali̱, mudhootele bʼebaanu̱we ngoku mudhooteeye Mukama Ki̱li̱si̱to. 23Nanga musaasa niiye mutuwe ghwa mukali̱ wee ngoku Ki̱li̱si̱to ali mutuwe ghwa ki̱bbu̱la kya bahi̱ki̱li̱ja, aba aaju̱ni̱ye kandi ebo baaba mubili ghuwe. 24Ngoku ki̱bbu̱la kya bahi̱ki̱li̱ja bali na kudhootela Ki̱li̱si̱to, niikuwo bakali̱ babhonganuuwe kudhootela beebabo mu bu̱li̱ kintu.

25Basaasa mukunde bakali̱ baanu ngoku Ki̱li̱si̱to aaku̱ndi̱ye ki̱bbu̱la kya bahi̱ki̱li̱ja kandi eehaayo kubakwi̱la, 26niikuwo babe bahi̱ki̱li̱i̱ye haabwa butumuwa buwe kandi kubanaabi̱ya na maasi kukwama mu kubati̱i̱ji̱buwa. 27Niikuwo eeku̱u̱ki̱li̱ye bahi̱ki̱li̱ja aba basemeleeye kimui, batali na kabhi koona kedha kalofu̱ haa mitima yabo, bhaatu bali bahi̱ki̱li̱i̱ye kandi batali na kyona bakubasoghosʼo. 28Niikuwo dhee na basaasa babhonganuuwe kukunda batiyo bakali̱ baabo, ngoku baku̱ndi̱ye mibili yabo yoonini. Oghu akukunda mukali̱ wee akuba nooleka ngoku eeku̱ndi̱ye eenini. 29Nanga taaliyo muntu oghu oohi̱ye mubili ghuwe bbaa, bhaatu aku̱ghu̱li̱i̱si̱yagha kandi oghuloleelela kusemeeye, ngoku Ki̱li̱si̱to akukolagha ki̱bbu̱la kya bahi̱ki̱li̱ja, 30nanga tuli bi̱twi̱ke bya mubili ghuwe. 31“Eki niikiyo kilalekagha musaasa alekaghe ese wee na ni̱na wee eebohelʼo mukali̱ wee, ti̱ babe muntu omui.”* 32Eni ni nsi̱ta yamaani̱ ku̱ghyetegheeleli̱ya, bhaatu eki nkwete ku̱bu̱ghʼo ni Ki̱li̱si̱to na ki̱bbu̱la kya bahi̱ki̱li̱ja. 33Nahabweki, bu̱li̱ mu̱hi̱ki̱li̱ja weena, akulaghiluwa kukunda mukali̱ wee ngoku eeku̱ndi̱ye eenini, kandi na mukali̱ akulaghiluwa ku̱hu̱ti̱ya eba wee.