1Si̱ye Paulo ndimabasaba ndhooti̱ye kandi nteekaane ngoku Ki̱li̱si̱to aakolagha. Nankabha bantu banji mbakughilagha bati nkaakubaagha ndi eghi mba mwoba, bhaatu ntali eghi nsaakala. 2Ndimabeesengeleli̱ya nti obu nkwisa eghi ntasaakala ngoku naabbalagha kusaakala haabwa bamui mu bantu abakweli̱li̱kanagha bati etu̱we niibuwo twaneetwalikani̱ya ngoku abatali bahi̱ki̱li̱ja bakwetwalikani̱yagha. 3Nankabha tuli munsi muni nga bantu banji boona, tatukulwani̱i̱si̱yagha abakutuhakani̱yagha ngoku abatali bahi̱ki̱li̱ja bakukolagha. 4Byakulwani̱i̱si̱ya byatu, tabili bighambo ngʼebi abatali bahi̱ki̱li̱ja baku̱bu̱ghagha. Bhaatu bighambo byatu bili na bu̱toki̱ bwa Luhanga kumalʼo maani̱ ghaa ngi̱ghu̱ syatu, ngoku muntu angumalʼo bwebi̱si̱lo bya ngi̱ghu̱ yee. 5Tukumalaghʼo kuhakangana kwona na myepanko ya bu̱li̱ mulingo eghi ekulekagha bantu batasi̱i̱ma Makulu Ghasemeeye ghaa Luhanga. Tukulekagha bantu bahindula nteekeleja yabo niikuwo bahu̱ti̱ye Ki̱li̱si̱to. 6Ti̱ enu̱we nimwahu̱ti̱i̱ye kwonini Ki̱li̱si̱to, du̱mbi̱ tukweteekani̱ja kufubila boona abanakukola bikoluwa bya butaaghu̱wa.

7Enu̱we tamwetegheleei̱ye ngu, kaakuba muntu aba amani̱ye kwonini ati ni̱mu̱heeleli̱ya wa Ki̱li̱si̱to, abhonganuuwe kumanya dhee ngu naatu tuli kwonini baheeleli̱ya baa Ki̱li̱si̱to ngoku naye ali. 8Tankukwatuwa nsoni̱ kwesinda kwonini haabwa bu̱toki̱ obu Mukama Ki̱li̱si̱to aatuhaaye. Akatuha buwo ku̱gu̱mi̱ya ku̱hi̱ki̱li̱ja kwanu etali kuleka nkukuukilila, eki tankuhemuka haabwakiyo bbaa. 9Tambbali̱ye kuba nga muntu akwete kulengʼo kubahandiikila bbaluwa sya kuboobahi̱i̱li̱li̱ya. 10Nanga bamui mu enu̱we bakughilagha bati, “Paulo akuhandiikagha bbaluwa sisaakaaye kandi syamaani̱. Bhaatu nʼaba ali eni aba mwoba kandi abu̱gha ebitali na mughaso.” 11Bantu ngʼaba bali na kumanya ngu ebi tukuhandiikagaha mu bbaluwa tutali eghi niibiyo byonini tukukolagha.

12Tatukwetaaghisibuwa na kwelengeesani̱ya kedha kwesusaani̱ya na bamui mu bantu abakwete kwesinda boonini. Bakweli̱li̱kanagha bati mbagheji kusaali̱ya bantu banji, ti̱ babbala kweyoleka ngoku ebo basaai̱ye bantu banji. Eki kikwolekagha ngoku bali badhoma. 13Etu̱we tatukwesindagha haabwa kintu eki tutahi̱ki̱li̱ji̱bu̱u̱we kwesinda haabwakiyo bbaa. Tukwesinda haabwa mulimo oghu Luhanga aatu̱tu̱mi̱ye kukola, ti̱ naanu muli ki̱twi̱ke kya mulimo oghu. 14Taaniibuwo twesinda kusaalukaane ngʼoghu oti tatwahi̱ki̱ye ewaanu eghi, bhaatu tu̱hi̱ki̱i̱ye nanga ni̱i̱tu̱we twadu̱bhi̱ye kwisa eghi kubatebejʼo Makulu Ghasemeeye ghaa Ki̱li̱si̱to. 15Tatukwesinda kusaalukaane haabwa mulimo ghwa kutebeja oghu bantu banji bakoli̱ye mu ki̱i̱kalo. Ti̱ kunihila kwatu ni ngu, ngoku ku̱hi̱ki̱li̱ja kwanu kukweyongela kukula, mukutukoonela kugbaatikani̱ya mulimo ghwa kutebeja ewaanu eghi, 16niikuwo etu̱we tugubhe kughenda kutebeja Makulu Ghasemeeye ghaa Luhanga mu bi̱i̱kalo binji ebi̱selaanʼo naanu, hambali muntu onji aatakaghendi̱ye kutebeja, niikuwo twepanke haabwa kutebeja hambali muntu onji atakahi̱ki̱ye. 17Nanga kihandi̱i̱ku̱u̱we ngu, “Oghu akwepanka, oleke eepankile mu Mukama.”* 18Ti̱ muntu weena neesi̱ndi̱ye eenini, Mukama Ki̱li̱si̱to taakumusinda bbaa, kuuyʼo akusinda oghu eye eenini asi̱i̱mi̱ye.